I Yesus mewangu mbule
(Mat. 28:1-8; Luk. 24:1-12; Yah. 20:1-10)
16
1 Satekabuno oleo mpekolia, i Maria Magdalena, i Salome, ronga i Maria tinano Yakobus mpo'olihiramo mina-mina da mowondu nta niwawando kindo lako minakio maeatino i Yesus. 2 Dumondo'ea konaa oleo Mincu, sasabano oleo, melako'iramo hai koburu. 3 Pada mpekapetukanaihiramo, « Ki nai danta lincaakita'o watu pontampono koie koburu? » 4 Sa'okudandomo kando ontoo hi telincamo koie watu da owose'ea. 5 Sapewisodo hai bolo ngkoburu, kando ontoo me'asa tora mongura da mebabu mentii mopila totoro hai muana. Nangkuamo kando dompa tebibinco.6 Sawali koie tora mongura nangkanahi, « Mi'osie momee, da inu'ungkemiu, yahoo Yesus miano Nazaret da ari nibasiropa, toraamo mbule, nai da'amo na'ai. Mi'ontoomo diemo ariano leleha. 7 Diekana milakomo mpo'awaakondo ana guruno ronga i Petrus: Dahomo meri'ouhakomiu hai Galilea. Kokeenamo dahamiu nta ontoo, kana hi ari montuluraakomiu. »
8 Tendenomo hindona mentebibinco kando mebibi, yahomo kando mpeluarako mpekalulu bintanio koie koburu. Nai te'asa miano pino'awaakondo tende momeedo.
[Nai da'a mengkau hindo ari montuluraakondo luwu i Petrus ronga simbauno. Sa'arino koie Yesus wotoluno montena ana guruno leleako lele mebinta hai Apu Alla da sai nta pura, dadaano salama'a samengka-mengkauno, mebinta hai mata oleo dungku hai pada oleo. Amin.]
Kompempiano i Yesus mepopo'ontoniako ronga moleka'ano
(Mat. 28:9-10, 16-20; Luk. 24:13-53; Yah. 20:11-23; Tul. Ras. 1:6-11)
[ 9 Sapewanguno koie i Yesus mebinta hai matea, konaa dumondo oleo Mincu, da iso sinabanino yahoo i Maria Magdalena, ari pinontilaakono opitu setani da lawuiho. 10 Iaamo da lako montuluraakondo ko'ira miano da nte perongano i Yesus da konainoo mpepoe-poe laro ronga mpewowo. 11 Sawali sando mempodeaho hi toramo mbule koie i Yesus, ronga hi arimo i Maria ontoo, nando ehe parasaea.
12 Sa'arino koie, sueremo penda hulano koie i Yesus hi popo'ontonihira da orua ana guruno da konainoo lolako hai kampo. 13 Pohule'iramo nde'e kando po'awaakondo ko'ira simbaudo meha, sawali nando parasaeahira.
14 Kompura-puraano koie i Yesus poko'ontonihira da hopulu ka'asa ana guruno da konainoo mpongkaa, ronga awaihira hindo mengkura parasaea ronga hi motea rapando, kasando parasaeaho miano da ari ontoo hi toramo mbule. 15 Yahopo kai tena'ira, « Milakomo hai upu-upuo wita leleako Lele Mohende hai pera to manusia. 16 Inai da parasaea ronga nibaho, dahoo nta salama, sawali inai da sai parasaea, dahoo nta nihukuma. 17 Di'iramo peto'o danta merongaa miano da parasaea: Dahira nta montilaako setani neengku, dahira nta mpogau'ako gau da sai tino'orindo. 18 Mau kindo po'ungkaari ule molea, ronga mondo'u ratu, nando da'a nta memohapa. Kindo dampasako pelendo hai miano morungku, dahira nta mentido. »
19 Sa'arino koie Apu Yesus mogau'akondo, nilakono moleka sabe hai suruga, ronga totoro hai muanano Apu Alla. 20 Yahopo kando lako leleako Lele Mohende hai upu-upuo wita, ronga Apu mohedo merongahira naamo moweehira kuasa mompokoda'a peto'o tekangka kai pokomentoda'o haratia da nileleakondo hi menona.]