I Yesus ronga i Zakheus
19
1 Satelaroakonomo koie i Yesus hai Yerikho, sai-saino tealo molaahi kota. 2 Kokeena dahoo me'asa miano kawasa da meneehako i Zakheus, ponggawano miano mpontagi sima. 3 Mokeaho ontoo ra'ino koie i Yesus, sawali nasai to'ori, name'alu miano, mainaapo owawa'o wotoluno. 4 Nangkuamo kai pekalulu liusakohira miano me'alu, kai pomone hai keu ara nta ontoo koie i Yesus, danta tealo na'ico.5 Sadungkunomo koie i Yesus na'ico, kai pesoso'e ronga kanahi, « O Zakheus, peruru merare, kana'umpe die oleo dahaku nta todo hai laicau. » 6 Kai peruru nde'e tekara-karai ronga mohende lawatio.
7 Sawali luwu miano da ontoo koie da kadadia pengunguhiramo kanahi, « Dahoo todo mekoli hai laicano miano madosa. »
8 Sawali i Zakheus namentade kai po'awaakono Apu Yesus kanahi, « Apua, mentongano kawasangku dahaku nta weehakono'o miano ngkadee-dee, ronga kicanano dahoo da ari nigau-gauku, dahaku nta mokompohule'akono'o pato luku'a. »
9 Kai polawani koie i Yesus kanahi, « Die oleo Apu Alla mokosalama'omo ihino die laica, kana'umpe die miano na'ana leenosi i Ibrahim.a 10 Kana'umpe kai leu Ana Nto Manusia yahoo u'ungkee ronga pokosalama'o miano da isa. »
Parereno doi wulaa
(Mat. 25:14-30)
11 Kai omputako ino'awano i Yesus, momparereakondo ko'ira miano da konainoo modeaho. Kana'umpe hina okudamo hai Yerusalem, ronga da ponto'orindo, pomparentaano Apu Alla dahomo nta oru kadadia. 12 Kai koharatia, « Dahoo me'asa mokole danta lako hai wonua mentala nta pinotoro tewali mokoleno wonua, kai aripo kai pohule. 13 Kai boboihira hopulu sangkinaano ronga moweehira te'asa lewendo doi wulaa kanahi, ‹ Mimpadala'omo die modagaako dungku kaku pohule mbule. ›
14 Sawali ko'ira miano sasukuno ndona mengkokoleaho, nangkuamo, sa'arino lako, kando pontena opia miano nunutako ronga mo'awaakono koie mokole'ea danta engka'o kanahi, ‹ Nako ehee die miano tewali mokolemami. ›
15 Sa'arinomo inengka tewali mokole, kai pohule, kai boboihira sangkinaano da ari pinoweehi doi kando leu mera'iako. Mokeaho to'orio ki te'opia labando tee'asa miano.
16 Lamoro me'asa leu kai kanahi, ‹ Apua, doimiu da asa lewe hopulumo labano. ›
17 Kai kanahi ponggawano, ‹ O ata ngkototu, moicoo koie pohedoau! Konianto'uko pasipolee pohedoa da mopuro, nangkuamo koie, dahaku nta moweeko kau kuasaiho da hopulu kota. ›
18 Yahopo kai leu sangkinaa ko'orua kanahi, ‹ Apua, doimiu da asa lewe olimamo labano. ›
19 Kanahiomo koie hai sangkinaano, ‹ Ronga co'o, dahaku nta moweeko kau kuasaiho da olima kota. ›
20 Kai leu koie sangkinaano suere ronga kanahi, ‹ O Apua, diemo doimiu, ariaku tongoo hai pongkikihi hondo. 21 Kuna momeetakokomiu, kana'umpe comiumo miano da mosoko; mo'ala dahamiu sai paisa modio, ronga mongkotu dahamiu sai paisa motasu. ›
22 Kai kanahi koie apuno, ‹ Hoo co'o ata ngkabaria! Dahaku nta hukumako kana da kanahiu panta'u. Dakomo to'orio hicua aku die miano mosoko, da mo'ala da sa'iaa nidiongku ronga mongkotu da sa'iaa tinasuku. 23 Kicana koie, yo hapa koie doicu kasau dioho hai bank kando padala'o? Kaku pohule, kaku alaamo ronga bungano. ›
24 Kai tena'ira miano da mpentade na'ico, ‹ Mi'alaamo koie da asa doi da nidiono, kami weeho koie da kolaba hopulu doi. ›
25 Kanahi'iramo, ‹ Apua, dahomo iaa hopulu lewe doino koie. ›
26 Kai koharatia, ‹ Kupo'awaakokomiu, naiho da mompokodio, dahopo nta tiniani. Sawali naiho da sai mompokodio, hapamo da pinokodiono, dahoo nta inala mpiha. 27 Sawali ko'ira pedalungku da sai eheaku kaku tewali mokoledo, miwawahiramo na'ai kami mpepatehira die hai ra'incu. › »
I Yesus nilawati hai Yerusalem
(Mat. 21:1-9; Mk. 11:1-10; Yah. 12:12-19)
28 Sa'arino koharatia kana koie, kai lako koie i Yesus meri'ouhakondo ana guruno me'o'ala hai Yerusalem. 29 Sa'okudahiomo Betfage ronga Betania, da da'a hai wawo ntangkeno Zaitun, kai pontena orua ana guruno lako meri'ou, 30 kanahi, « Milakomo hai kampo da nirora'into; kimi dungkumo na'ico, dakomiumo nta awaa me'asa ana ngkolodai da tekoo, da sai paisapo pine'uleahino miano. Miwuwuomo kami wawaa na'ai. 31 Ki da'a miano da metukanaicomiu hapa kami daa wuwuhio, milawaniomo kanahi, ‹ Apu da paraluukio. › »
32 Lako'iramo nde'e ko'ira da ari tinena, ronga ndo'awaamo kana da ari kanahino i Yesus. 33 Dahiramo konainoo wuwuo ulano koie kolodai, kando kanahi ko'ira apuno kolodai, « Hapa kami daa wuwuo koie ana ngkolodai? »
34 Polawanihiramo, « Apu da paraluukio. »
35 Kando wawaakono'o i Yesus, yahopo kando lapa'akono'o pinodaido kando pokompe'uleaho. 36 Maina nta tealoano, dahandomo miano mewoleako babu mentiindo hai bolo sala.b
37 Okudaamo nta dungku'ano hai Yerusalem, konaa ponguliano sala mebinta hai tangkeno Zaitun, mpetampu'uhiramo luwu ko'ira ana guruno mpekora memohende kando daa reree'o Apu Alla tendenomo peto'o tekangka da ari inontondo kanahi,
38 « Tereree'omo Mokole da leuhako neeno Apu.c
Tepokonaamo suruga ronga wita'ea,
ronga pinoko'owose'omo Apu Alla hai montoehano. »
39 Dahoo opia miano golonga Farisi da merongahira miano me'alu mogau'akono i Yesus kanahi, « O tuangguru, tabe'irapo ko'ira ana gurumiu. »
40 Kai lawanihira kanahi, « Kupo'awaakokomiu: Kindo lako mpengio di'ira miano, ko'ira watu dahira nta mpogora. »
41 Sa'okudanomo koie i Yesus kai ontoo koie kota, namewowoakono. 42 Kai koharatia, « O ka'asi, taperano moicoo die oleo kimi to'orio na'amiu hapa danta tinepokonaakomiu. Sawali diekana nami da'a nta tule'i ontoo. 43 Kana'umpe dahoo nta leu oleono dahando pedalumiu nta libuticomiu kando mpoweweu tondo lilicukomiu, ronga dadasakokomiu koa-koa'o mata ngalu. 44 Dahira nta rowakio Yerusalem kai merete wita, ronga itai mianono. Nando da'a nta moturusio te'asapo watu moo'ia tesusu hai poo'iahano. Kana'umpe nasami to'orio wotuno Apu Alla leu nta mokosalamakomiu. »
I Yesus mokowuaho raha mpesombaa
(Mat. 21:12-17; Mk. 11:15-19; Yah. 2:13-22)
45 Kai pewiso koie i Yesus hai uluano raha mpesombaa kai petampu'u saarihira ko'ira miano da mpebalu-balu na'ico. 46 Koharatia'omo hai ira, « Dahoo teburi hai Boku Haratiano Apu Alla kanahi, ‹ Rahangku nta neeno yahoo laica amalaa, › sawali icomiu mina weweuho poo'iahando parampo. »d
47 Tapio oleo pompotisu'ano hai uluano raha mpesombaa. Ko'ira kapala pua'ima ronga guru agama naamo kamotu'ano miano Yahudi mpo'u'ungke akala kando to'ori pepatee. 48 Sawali nasando to'orio ki kana'umpe nta poweweundo, kana'umpe nasando mentepobinta miano me'alu da mokea to'u mompodedea pompotisuno.