Ponggawando miano Yahudi metukanaako pebintaano kuasano i Yesus
(Mat. 21:23-27; Mk. 11:27-33)
20
1 Konaa me'asa oleo tempono i Yesus mompotisu miano me'alu hai uluano raha mpesombaa ronga moleleako Lele Mohende, leuhiramo raro ngkapala pua'ima, guru agama, ronga kamotu'a, 2 kando petukanaiho, « Po'awaakami, kuasano inai kami ntule'i moweweu ko'ira luwu? Inai da moweekomiu koie kuasa? »3 Kai lawanihira koie i Yesus, « Dahaku na'angku nta metukanaicomiu, mimpo'awaakuo: 4 Inaiho da tena'o i Yahya kai pobaho? Apuno suruga atawa to manusia? »
5 Kando mpekapetukanai kanahi, « Kito kanahi, ‹ Apuno suruga, › dahoo nta kanahi, ‹ Yo hapa kasami ehe parasaeaho? › 6 Sawali kito kanahi, ‹ To manusia, › luwu miano me'alu dahiramo nta watuicita, ndona memparasaeaho koie i Yahya hicua me'asa nabii. »
7 Yahomo kando mpolawani kanahi hi sando to'orio.
8 Kai lawanihira koie i Yesus, « Kicana koie, naku da'a na'angku nta mo'awaakomiu inaiho da ari moweehaku kuasa kaku to'ori hedoo koie da niweweungku. »
Parereno miano da mposewa uma angguru
(Mat. 21:33-46; Mk. 12:1-12)
9 Yahopo koie i Yesus kai tuluraakondo'o miano me'alu die parere: « Dahoo me'asa miano da mombulaiho umano angguru, kai pasewaa hai miano mpohedo, yahopo kai lako hai suere wonua, ronga mengkauho nta lakono. 10 Saleuho wula mpe'upuiha angguru, koie apuno wita montena me'asa sangkinaano lako tarimaakono'o tila angguruno hai miano da hedoo. Sawali ndona lawa o'anuo koie sangkinaa, kando tena'o mohule mpena. 11 Yahopo koie ntei uma kai pontena penda sangkinaano da suere, sawali ndona o'anuosi ronga koko'anuiho, kando tena'o mohule lima woa. 12 Yahopo penda kai tena'o sangkinaano da ko'otolu, sawali ndona belaihosi, kando basiako hai bungku uma.
13 Yahopo kai kanahi koie apuno uma, ‹ Kana'umpemo die nta niweweungku? Nta tena'akondo'omo ana pine'o'oloincu; aipo dahira nta tangkoro'o. ›
14 Sawali tempondo ko'ira da mpohedo ontoo hicuamo anano, mpogau'iramo kanahi, ‹ Koiemo nta tewali apuno, tompepateemo, kato alaa wita nta tilarino. › 15 Yahomo nde'e kando basiako hai bungku uma kando pepatee.
Diekana kana'umpemo nta niweweuno koie ntei uma hai ira miano mpohedo? 16 Dahomo nta leu pepatehira ko'ira da mpohedo, kai pasewaa koie uma angguru hai miano suere. »
Sando podeaho ko'ira miano, nangkanahi'ira hai Yesus, « Osie to'u. »
17 Sawali koie i Yesus na'o'ontohira kai koharatia, « Kicana koie, hapamo batuano die ayati:
‹ Watu da ari nibasiakondo tuka,
tewaliomo watu mpompu'ui. ›a
18 Pera miano da tuuna koie hai wawo watu dahoo nta telolotu, ronga nai-naiho da nidapono, dahoo nta mopuro. »
Mowada sima hai mokole'eano Roma
(Mat. 22:15-22; Mk. 12:13-17)
19 Ko'ira guru agama ronga kapala pua'ima mpo'u'ungkehiramo akala nta rako'o i Yesus koie tempo, ndona nto'oriomo hicua ira da kinonano koie parere, sawali ndona momeetakohira ko'ira miano me'alu. 20 Yahomo kando tarimaa wotudo da moico, kando pontena opi-opia miano da ari niwadado danta mompe'anu-anuto'u kana miano moico nta metukanaiho i Yesus. Santo'u-to'uno petukanando koie yahoo kana bengkaro nta porakodo i Yesus ki sala mpogau'a, kando to'ori soroakono'o kuasano gubernur. 21 Ko'ira miano mpetukanaiho i Yesus, « O tuangguru, koto'orio luwu da nigaumiu ronga pompotisumiu menonaa. Nami mperuruki miano, sawali samongko-mongkoteano himi mpompotisu miano kai nunu'o da po'eheno Apu Alla. 22 Mimpo'awaakami, tewalio bara topowada sima hai mokole'eano Roma, atawa nai tewali? »
23 Sawali koie i Yesus nanto'orio akalado, yahomo kai koharatia'akondo, 24 « Poko'ontoniaku koie te'asa doi pera. Gambarano ronga neeno inai da teburi koie hai doi? »
Polawanihiramo, « Gambarano ronga neeno mokole'eano Roma. »
25 Kai koharatia koie i Yesus, « Kicana koie, miweehakono'o anuno mokole'ea, ronga miweehakono'o na'ana tarono Apu Alla. »
26 Nangkuamo kasando pokobengkaro'o hi daa mogau hai ra'indo miano me'alu. Te'iaasi mpengio ronga mebanga'ako polawanino.
Miano Saduki metukanaako dadaano miano mate hi pewangu
(Mat. 22:23-33; Mk. 12:18-27)
27 Yahopo kando leu opi-opia miano golonga Saduki hai Yesus, da sai akui'o hindo mpewangu miano mate. Kando petukanaiho kanahi, 28 « O tuangguru, nabii Musa ari moburi parenta danta mekona hai cita kanahi: Ki tibo tama mate nahina anano, petilano paraluu'o kai kawinio waluno, kai to'ori da'a leeno koie petilano da mate.b 29 Dahira opitu tama mpetitilado. Da tetukaka mesamporaako me'asa tina, dungku mate nahinapo anano. 30 Yahopo da ko'orua mesamporaiho koie waluno tukakano, 31 yahopo da ko'otolu, kanamo koie menteposusu dungku da ko'opituhira mpetila, kando memate luwu nahina da mobinta ana. 32 Perumbuino kai mate na'ana koie tina. 33 Diekana, kana'umpemo koie tina? Inaihomo danta tewali samporano ki dungkumo oleo mpewanguando miano mate? Kana'umpe opituhira mpetila arihira mpesamporaakono. »
34 Kai lawanihira koie i Yesus kanahi, « Miano die wita'ea kawi ronga pinakawi, 35 sawali ko'ira miano da inangga pantasi mewangu mebinta hai miano mate ronga tora hai dunia danta leu, nahina danta kawi atawa pinakawi. 36 Kana'umpe nasando to'orimo mate pendua, pengkenahiramo mala'ekati, ronga tewalihiramo anano Apu Alla, kana'umpe arihiramo pinokompewangu. 37 Hai larono tulurano tangkalasic da lolanga, arianomo nabii Musa pokomentoda'o hindo daa nta niwangusako miano mate. Kana'umpe na'icomo dahano neehakono'o Apu Alla Apuno i Ibrahim, Apuno i Ishak, ronga Apuno i Yakub.d 38 Apu Alla na'iaa Apuno miano mate sawali yahoo Apuno miano ntora, kana'umpe hai ra'ino, luwu miano dahirasi mentora. »
39 Sando podeaho koie, opi-opia guru agama kanahi, « O tuangguru, moicoo koie da nigaumiu. » 40 Kana'umpe nasando mosekamo metukanaiho meha-mehano.
Mehohapa'ira i Yesus ronga i Daud
(Mat. 22:41-46; Mk. 12:35-37)
41 Kai po'awaakondo koie i Yesus kanahi, « Kana'umpe ko'ira miano kando mengkanahi Mokole Pompokosalama hicua leeno i Daud? 42 Kana'umpe nabii Daud wotoluno ariomo kanahi hai bolo boku Mazmur,
‹ Apu Alla koharatia hai Apungku:
Totoromo hai muanangku,
43 dungku luwu pedaluu Kudiohira hai tonto karu'u. ›e
44 Dadi, ki tibo i Daud neehakono'o Apuno, kana'umpemo kaicuasi penda leeno? »
Oliwino i Yesus kando mpedagai hai ira guru agama
(Mat. 23:5-7; Mk. 12:38-40)
45 Dahira konainoo ko'ira miano me'alu mpompodedea, kai koharatia koie i Yesus hai ana guruno, 46 « Mimpedagai hai ira guru agama, da mehawado mpebabu mentii kando mengkolako-lako, kai sosampotae nte'angga'ira miano hai bolo ntadoha. Mehawado totoro hai totoro'a da te'a-te'angga hai laica sambahea'a ronga totoro'a da moico hai ndo'ua. 47 Mehawado pokomporehira ntina walu kando alaakondo'o laicando, kando amala kai mentaa nta podampondo niweweu ngkabariado. Yahomo kai daa nta kolalo mobea hukumando. »