Pesombano ntina walu
(Mk. 12:41-44)
21
1 Sapento'ano koie i Yesus ontohira ko'ira miano ngkawasa da mpowiso pesombando hai poti mpedoromaa'a, 2 kai ontoo na'ana me'asa ntina walu ngkadee-dee da mowiso pesombano rua doi tambaga da okidi to'u. 3 Kai koharatia koie i Yesus, « Santo'u-to'uahano Kupo'awaakokomiu: Koiemo ntina walu ngkadee-dee da me'a-me'alu pedoromaano ka'iaa luwuo di'ira miano. 4 Kana'umpe di'ira miano mpedoromaa'ako tora pebalandado, sawali koie ntina walu, mau ki kadee-dee, medoromaa'ako luwu da nidiono ronga danta tinoraakono. »Nta nirowakiano raha mpesombaa
(Mat. 24:1-2; Mk. 13:1-2)
5 Koie tempo dahoo opi-opia miano da reree'o koie raha mpesombaa nanibunga-bungaako watu da memokokolaro ronga pera giuno pesomba. Sapodeaho koie i Yesus nangkoharatia'o, 6 « Koie da inontomiu, dahoo me'asa oleo dahano nta nirowaki luwu, dungku kasai hina te'asa watu da tesusu hai wawo sawatuno. »
Petampu'uano karasai
(Mat. 24:3-14; Mk. 13:3-13)
7 Kando mpetukana ko'ira ana guruno i Yesus kanahi, « O tuangguru, impia koie nta kadadiahano? Ronga hapa peto'ono ki daa nta kadadia? »
8 Kai polawani koie i Yesus, « Mimpedagai kami osie pinokompore. Kana'umpe me'aluo miano danta mesaba meneehako neengku kanahi, ‹ Akumo die Mokole Pompokosalama, › ronga kanahi, ‹ Okudaamo tempono. › Mi'osie nunu'ira. 9 Mi'osie momee kimi mpodeaho lele mamusua ronga ihino wonua da ta'oo pamarentano. Kana'umpe luwu koie dahoo nta kadadia meri'ou, sawali na'iaapo batuano hi daamo nta oru kiama. »
10 Kai po'awaakondo penda, « Me'asa wonua nta mamusu bali'o da me'asa wonua, ronga pada-pada mokole nta mpedaluhiramo. 11 Dahoo nta medadi lelu owose, me'aluo wonua danta konaa murota ronga rungku ngkalelei. Dahoo nta kadadia da pinomeetako ronga tanda-tanda da owose hai langi.
12 Sawali nai da'apo dadi ko'ira luwu, peri'oukomiumo nta menirorako kami mpinakasea. Nta inadili hai raro laica sambahea'a ronga niwiso hai torungku. Ronga dakomiu nta niwawa mera'iako hai ira mokole ronga gubernur tendenomo himi daa nunu'aku. 13 Kimi me'inadilimo, koiemo wotu dahamiu nta tewali saksiicu. 14 Nangkuamo koie, mimpokomorodoo pelaroamiu, kami osie mompekiri meri'ou ki hapa nta polawanimiu kara-karamiu. 15 Kana'umpe dahakusi nta moweekomiu ino'awa mandara nta polawanimiu, kasai hina balimiu da to'ori lawanio atawa tapa'o gaumiu. 16 Deenapo miano motu'amiu, petila asa ngkadumiu, ronga raro mpetilamiu, naamo tokiamiu nta sorokomiu hai pedalumiu, naamo opi-opia simbaumiu dahira nta pinopate. 17 Ronga pera miano dahira nta kokoleakomiu tendenomo himina nunu'aku. 18 Sawali nai te'asa lewe wuu hai rapamiu danta isa. 19 Sawali kimi megaga tineiho karasai, dakomiusi nta awaa toraaha. »
Dadaano Yerusalem hi daa nta morowa
(Mat. 24:15-21; Mk. 13:14-19)
20 « Sami ontoo Yerusalem ki licu'omo tantara, minto'oriomo hi okudamo nta morowa'ano. 21 Koie wotu kahioomo miano da meda'a hai wonua Yudea kando mpolai hai tangkeno, ronga miano da da'a hai bolo ngkota, ndopeluarakomo, ronga miano da da'a hai kampo, ndo'osiemo mpewiso hai kota. 22 Kana'umpe koie oleo pepokongkoa'anomo luwu hukuma da teburi hai Boku Haratiano Apu Alla. 23 Taperando nta marasai koie tempo tina da mentia ronga da mpetesusu. Kana'umpe dahoo nta kadadia karasai da mobea hai upu-upuo wonua, ronga Apu Alla dahoo nta sosa'oki laroiho di'ira miano Israil. 24 Dahira danta mateako taa, ronga dahira danta niwawa tewali miano nterako hai luwu wonua. Ronga ko'ira miano da sai to'orio Apu Alla dahira nta lesa-lesa'o Yerusalem, dungku kai koa wotudo da ari pinatantuno Apu Alla. »
Nta leuhano Ana Nto Manusia
(Mat. 24:29-35; Mk. 13:24-31)
25 « Dahoo nta inonto tanda-tanda da owose hai mata oleo, wotiti, ronga hai olimpopo. Ronga hai wita'ea, pera suku nta momee ronga banga tendenomo nduuno ronga hembono tahi. 26 Miano nta kempatea tendenomo momeetako pera da konaa wita'ea die, kana'umpe ko'ira apuno laamoa dahira nta molelu. 27 Koie tempo dahandomo miano nta ontoo Ana Nto Manusia leu hai seru meronga kuasano ronga tereree'ano da owose.a 28 Ki petampu'umo luwu koie kadadia, mimpe'engkamo mento'a, kana'umpe okudaamo nta pinokosalama'amiu. »
29 Yahopo koie i Yesus kai tuluraakondo'o die parere, « Mi'ontoomo keu ara atawa keu hapamo. 30 Kimi ontoo ko'ira keu kindo tumirimo, minto'oriomo hi okudamo wula modaraano oleo. 31 Kanamo koie na'ana, kimi ontoo ko'ira da kadadia, minto'oriomo hi okudamo pomparentaano Apu Alla.
32 Santo'u-to'uahano Kupo'awaakokomiu: Di'ira miano da tora diekana nando da'apo nta mate luwu, ki sai ari luwu koie kadadia. 33 Langi ronga wita'ea dahoo nta isa, sawali haratiaku nai da'a nta paisa isa. »
Oliwi mpedagai
34 « Dagai'o wotolumiu kami osie bebeatiakono'o pelaroamiu pongkaaha ronga pondo'ua liwa, langu, ronga da tinewereakono miano die wita'ea. Kicanamo koie pekirimiu, ki dungkumo oleo leuhano Ana Nto Manusia, nta kanamo bengkaro da tibo oho'o wotolumiu. 35 Kana'umpe koie oleo ki leu, dahoo nta konahira luwu miano upuo wita'ea. 36 Mimpedagai ngkaida'a ronga me'amala, kami daasi moroso kami ntealohio luwu koie danta kadadia, ronga kami ntule'i mentade hai ra'ino Ana Nto Manusia. »