Ponggawano miano Yahudi mpekosi nta pepatee i Yesus
(Mat. 26:1-5; Mk. 14:1-2; Yah. 11:45-53)
22
1 Okudaamo ndo'ua Tewawea Roti Sai Kotulu, da nineehako oleo Ntepulosi'a. 2 Raro ngkapala pua'ima ronga guru agama po'u'ungkehiramo akala ki kana'umpe nta pompepatendo i Yesus, kana'umpe ndona momeetakohira miano me'alu.I Yudas mepatudu nta soroakondo'o pedaluno i Yesus
(Mat. 26:14-16; Mk. 14:10-11)
3 Yahopo ponggawano bilisi kai pewiso'io i Yudas, da meneehako Iskariot, me'asa simbaudo ana guruno i Yesus da hopulu orua. 4 Kai lako nde'e koie i Yudas tepo'awaakondo raro ngkapala pua'ima ronga ponggawando miano mparonda hai raha mpesombaa kando pogau ki kana'umpe kai to'ori soroakondo'o koie i Yesus. 5 Taperano sanaa larondo, ronga meboboto nta moweeho doi. 6 Koie i Yudas ehe'omo, ronga metampu'u koie tempo kai po'u'ungke wotu moico dahano nta soroakondo'o i Yesus, kando osie to'orio miano me'alu.
Mompasadia nta tewawea oleo Ntepulosi'a
(Mat. 26:17-19; Mk. 14:12-16)
7 Kai dungku nde'e oleo pokomaroahano ndo'ua Tewawea Roti Sai Kotulu, yahoo oleo nta nisumbele'ano domba nta pompokomaroando oleo Ntepulosi'a. 8 Yahopo i Yesus kai tena'ira i Petrus ronga Yahya kanahi, « Milakomo, pasadia'akita'o nta mengkinaanto hai ndo'ua oleo Ntepulosi'a. »
9 Petukanahiramo, « Mainaa dahano po'ehemiu kako pompasadia'akita? »
10 Kai polawani, « Kimi mpewiso hai kota, dakomiu nta awaa me'asa miano da molemba bengki da ko'ihiako e'e. Minunutakomo dungku hai laica pewiso'ano. 11 Ronga mogau'akono koie ntei laica, ‹ Tuangguru metukana, maina suo dahangku nta tewawe moko'owose'o oleo Ntepulosi'a meronga ana guruku? › 12 Dahomo nta tisu'akomiu'o me'asa suo owose hai wawo da te'atoromo. Kokeenamo kami mpompasadia'akita. »
13 Lako'iramo nde'e kando awaa luwu kana hi ari tena'ira. Na'icomo nde'e pompasadia'ando nta tewawea moko'owose'o oleo Ntepulosi'a.
Pinatantuano tewawea merongaakono Apu Yesus
(Mat. 26:20-29; Mk. 14:17-25; Yah. 13:21-30; 1 Kor. 11:23-25)
14 Sadungkunomo tempono, kai totoro koie i Yesus tewawe merongaakondo ko'ira rasuluno. 15 Kai koharatia, « Moko'au to'uaku tewawe moko'owose'o oleo Ntepulosi'a merongakomiu, hi saku da'apo marasai. 16 Kana'umpe Kupo'awaakokomiu, naku da'amo nta kaaho die kinaa ndo'ua Ntepulosi'a, dungku kai leu peleleuhaano hai laro pomparentaano Apu Alla. »
17 Yahopo kai alaa koie pondo'ua, kai pontarimakasi ronga koharatia, « Alaamo die kami mpekuu mpondo'u luwumiu. 18 Kana'umpe Kupo'awaakokomiu: metampu'u diekana, naku da'amo nta paisa mondo'u angguru dungku kai leu pomparentaano Apu Alla. »
19 Yahopo kai po'ala roti, kai pontarimakasi hai Apu Alla, kai sisibio titila'akondo'o ana guruno ronga koharatia, « Diemo wotolungku da ari sinoro tendenomo comiu. Miweweuhomo die, dahamiumo nta nte mokopehawa'aku. »
20 Kanasi penda poweweuno koie pondo'ua hindo arimo mpongkaa, kai koharatia, « Die pondo'ua yahoo pedandi da tonia, tendenomo reaku da tesolo nta taromiu. 21 Sawali ontoopo! Limano miano danta soroaku dahoo merongaaku die hai wawo meda. 22 Kana'umpe Ana Nto Manusia dahoo nta nunu'o sala da ari pinatantuno Apu Alla, sawali masilaka'o miano da soroakondo'o pedaluno. » 23 Petampu'uhiramo nde'e mogau'ako inaiho koie hai ira danta moweweuhako.
Mekakahiako inai da te'a-te'angga
24 Kando mpegagahiako ko'ira ana guruno i Yesus kinaihomo da kolalo te'angga hai ira. 25 Kai koharatia koie i Yesus hai ira, « Ko'ira mokoleno suku suere parentahira mianono. Mau kicana koie, ko'ira da mengkuasa nineehako pontotonga miano. 26 Sawali comiu nai tewali kana koie. Inai da owo-owose hai comiu, kahioomo kai tewali kana ana'ate da okidi, ronga da tewali ponggawa kai tewali kana miano da montadehi. 27 Kana'umpe inai da owo-owose: da totoro mongkaa, atawa da montadehi? Na'iaa bara da totoro mongkaa? Sawali i'aku tewali pontadehi hai comiu.
28 Larono luwuo posoba-soba da konaaku, comiumo da sadia perongaaku. 29 Nangkuamo koie, kaku poweekomiu kuasa kami mpomparenta, kana Tamangku da moweehaku kuasa kaku pomparenta, 30 kami daa nta itai mohende ronga te'angga mpongkaa ronga mpondo'u mpe'asa meda'akuo hai laro mpomokole'angku. Ronga dakomiumo nta itai totoro hai kadera mpomokole'a parentahira da hopulu orua suku Israil. »
I Petrus dahoo nta mehapuiho i Yesus
(Mat. 26:31-35; Mk. 14:27-31; Yah. 13:36-38)
31 « O Simon, Simon, ontoopo, ponggawano bilisi mo'itaa nta topihicomiu kana montopihi inii. 32 Sawali ariakumo amalaakoko, kai osie monangi imaniu. Ronga co'o, kiu tegili mbule, pokomokorahira raro mpetila'u. »
33 Polawaniomo koie i Petrus, « Apua, sadia'akumo nta metorungku ronga mate merongakomiu! »
34 Sawali koie i Yesus nangkoharatia, « Kupo'awaakoko, Petrus, die malo nai da'a nta totorea manu, ki sau ari mehapuihaku tepentolu hi sau da'a to'oriaku. »
Kadu-kadu doi, wonua ngkinaa, ronga taa
35 Yahopo koie i Yesus kai petukanaihira kanahi, « Tempongku tenakomiu lako sai mowawa kadu-kadu doi, wonua ngkinaa, atawa sandala, dakomiu bara kakuranga? »
36 Kando mpolawani, « Mau te'asapo nako kakuranga. »
Koharatia'omo koie i Yesus, « Sawali diekana, naiho da da'a kaduno atawa wonua ngkinaano, kahioomo kai wawaa. Ronga inai da sai hina taano, balu'omo babu mentiino kai po'oli taa. 37 Kupo'awaakokomiu, dahoo nta kadadia hai aku hapa da teburi hai Boku Haratiano Apu Alla kanahi, ‹ Inangga'omo kana miano mosa'o. ›a Kana'umpe hapa da teburi mekona hai wotolungku kadadiahomo diekana. »
38 Kanahi'iramo, « Apua, dahoo die orua taa. »
Kai polawani kanahi, « Koa'omo. »
I Yesus amala hai tangkeno Zaitun
(Mat. 26:36-46; Mk. 14:32-42)
39 Yahopo kai lako i Yesus bintanio kota, ronga kana biasano me'o'ala hai tangkeno Zaitun. Ronga ko'ira ana guruno dahira itai. 40 Sadungkuno na'ico nantena'ira, « Amala kai osie konakomiu posoba-soba. » 41 Yahopo kai pesuahako kira-kira asa mpepandoa watu mentalano, kai kokolontuu ronga amala kanahi, 42 « O Tamangku, kimi ehe, kahioomo kai laloaku die pondo'ua ngkarasai. Sawali na'iaa po'ehengku, sawali po'ehemiu danta tenunu. » [ 43 Kai popo'ontonio koie me'asa mala'ekati mebinta hai langi mokomorosoakono'o pelaroano. 44 Ntaperano marasai, nangkuamo kai amala santo'u-to'u, ronga hondono daa turu-turu hai wita kana to'u rea.]
45 Kai pewangu hi arimo amala, kai pohule awahira ana guruno hindo daa moturi tende mopoeno larondo. 46 Kai koharatia, « Hapa kami daa mpoturi? Pe'engkamo kami amala, kai osie saru konakomiu posoba. »
I Yesus nirako
(Mat. 26:47-56; Mk. 14:43-50; Yah. 18:3-11)
47 Dahopo koie i Yesus konainoo mogau, kando meleu asa lunu miano da niwawano i Yudas, me'asa simbaudo da hopulu orua ana guruno. Kai leu awaa i Yesus nta uma'o. 48 Sawali nametukana, « O Yudas, yahomo bara hiu uma'aku, posoroumo Ana Nto Manusia? »
49 Sando ontoo ko'ira miano da perongano i Yesus hapa danta kadadia, kanahi'iramo, « Apua, tewalio bara kako peta'oako taa? » 50 Yahopo koie me'asa simbaudo kai popolee sangkinaano pua'ima'ea ronga tongka'o biri muanano kai tuuna.
51 Sawali koie i Yesus nantabe'ira, « Ari-arimo, koa'omo! » Kai hedoakono'o birino koie miano, tade-tadeno tido mbule.
52 Yahopo koie i Yesus kai pogau'akondo ko'ira kapala pua'ima, ronga ponggawando miano mparonda hai raha mpesombaa, naamo kamotu'a da meleu nta rako'o kanahi, « Ponto'orimiu Aku die miano mosa'o, yahomo kami leu mpowawaakuo taa ronga kalangku? 53 Mainakaa tapio oleo dakitasi mperonga hai uluano raha mpesombaa, nami da'apo rako'aku. Sawali diemo wotumiu da moico, diemo wotuno kuasa da rondoma. »
I Petrus mehapuiho i Yesus
(Mat. 26:57-58, 69-75; Mk. 14:53-54, 66-72; Yah. 18:12-18, 25-27)
54 Kando merako'o koie i Yesus mewawaa hai laicano pua'ima'ea. Ronga koie i Petrus dahoo merumbuihakondo sawali mentalaa. 55 Hai tonga uluano koie laica dahandomo mpompekaa api kando daa mpenguru. Koie i Petrus na'ana dahoo totoro merongaakondo. 56 Koie me'asa ata ntina ontoo koie i Petrus hi daa totoro kai panario api, kai totakai mataa ronga kanahi, « Die miano yahosi perongano i Yesus. »
57 Sawali i Petrus namehapu kanahi, « Na'iaa, Iaa koie naku da'a to'orio! »
58 Nai da'a lembahi, dahoo penda me'asa miano da ontoo kai kanahi, « Ico'o na'au yahosi salakodo! »
Sawali i Petrus nangkanahi, « Na'iaa i'aku! »
59 Sa'arino kira-kira asa damu, kai daa penda me'asa miano suere da daso'o kanahi, « To'u-to'uo die miano peronganosi i Yesus, kana'umpe iaa na'ana miano Galilea. »
60 Sawali i Petrus nangkanahi, « Na'iaa, naku to'orio hapa koie da kanahiu. » Koiemo nde'e wotu hi daa mogau, kai totorea manu. 61 Poliheemo nde'e Apu Yesus o'ontoo koie i Petrus. Pokopehawa'omo nde'e haratiano Apu Yesus hai iaa da kanahi, « Nai da'apo totorea manu die malo, pentolukomo mehapuihaku. » 62 Yahopo kai peluarako ronga mewowo kana da inuhu pelaroano.
I Yesus mera'iako hai pongadila'eano agama
(Mat. 26:63-68; Mk. 14:55-65; Yah. 18:19-24)
63 Ko'ira miano da daga'o i Yesus dahiramo mempoko'anu-anuo ronga melangkuiho. 64 Ndomedampoo ra'ino kando mpetukanaiho kanahi, « O nabii, po'awaakami kinaiho da o'anuko. » 65 Ronga dahopo me'alu gau ngkabaria da po'anu-anundo.
66 Sameantanomo, kando mpekompulu powawaino miano Yahudi, raro ngkapala pua'ima, ronga guru agama, kando wawaa koie i Yesus mera'iako hai pongadila'eano agama. 67 Kanahi'iramo, « Kicuamo ico'o Mokole Pompokosalama, po'awaakamimo. »
Kai polawani koie i Yesus, « Mau kicu po'awaakomiu, nami da'a nta parasaea. 68 Ronga mau kicu petukanaicomiu, nami ehesi molawani. 69 Sawali metampu'u diekana, Ana Nto Manusia dahomo nta totoro hai muanano Apu Alla da kuasa'ea. »
70 Kando mengkanahi, « Kicana koie, ico'o die Anano Apu Alla? »
Kai polawani koie i Yesus, « Comiusi da kanahi, I'aku die Anano Apu Alla. »
71 Kanahi'iramo, « Hapapo kato daa nta paraluu saksii meha? Tona mpodeahomo mebinta hai ngangano pantano. »