Parereno hakim da sai mongkote
18
1 Kai tuluraakondo'o koie i Yesus me'asa parere hai ira ana guruno motisu'ira kando sadia me'amala ronga kai osie mo'otu pomperahi-rahindo. 2 Koharatia'omo, « Hai larono me'asa kota dahoo me'asa hakim da sai momee hai Apu Alla ronga nai po'angga mau te'asapo miano. 3 Ronga koie hai kota dahoo me'asa ntina walu da sadia leu koie hai hakim kanahi, ‹ Otuhiakuo kai adili kara-karaku, kicu tepora'iakono balicu. › 4 Isono koie hakim nai ehe montarima. Sawali perumbuino kai kanahi hai larono, ‹ Mau ki saku momee hai Apu Alla ronga sai mompaduli te'asapo miano, 5 sawali hina sadia koie ntina walu pokomasusa'aku, dadisi kicu pokontekonaa, kai osiemo leu ngkaida'a mokomarasaihaku. › »
6 Koharatia'omo Apu Yesus, « Mimpeehawa'o hapa da kanahino koie hakim da sai mongkote. 7 Nai da'a bara Apu Alla nta mokontekonaa pera miano nirurukino da me'e'eta mengkena malo ronga meanta? Pontadoo bara hi daa nta tulumihira? 8 Kupo'awaakokomiu: Apu Alla dahoo nta oru mokontekonahira. Sawali ki leu Ana Nto Manusia, dahosi bara nta mo'awa miano da ko'imani die hai wita'ea? »
Parereno miano golonga Farisi ronga miano pontagi sima
9 Kai pomparereakondo koie i Yesus ko'ira miano da angga'o wotolundo tekona ronga da mompatuna-tunai suere miano, 10 « Dahoo orua miano da lako hai uluano raha mpesombaa nta amala; me'asa miano golonga Farisi ronga me'asano yo miano mpontagi sima. 11 Koie miano golonga Farisi mentade ntesinca kai amala hai larono kana die: ‹ O Apu Alla, kupontarimakasi hai Comiu, nasaku da'a kana ko'ira luwu miano, na'iaa parampo, na'iaa miano mosa'o, naku endeo, ronga naku da'a kana koie miano mpontagi sima.a 12 Poasaaku pendua asa mincu, pompoweehiaku pesomba tila hopuluno pera da inawangku. ›
13 Sawali koie miano mpontagi sima namentade mentala, deenapo nai moseka meso'e hai langi. Te'iaasi pedehio o'ono peto'ono hi pesosoori, kai kanahi, ‹ O Apu Alla, Milolaroaku i'aku die miano ngkodosa. ›
14 Kupo'awaakokomiu: Kai pohule die miano hai laicano kana miano da ari pinokontekonano Apu Alla, sawali koie miano golonga Farisi nai da'a. Kana'umpe pera miano da mepa'angga dahoo nta pinaruru, ronga inai da meparuru dahoo nta pinokonte'angga. »
I Yesus mobarakati ana'ate
(Mat. 19:13-15; Mk. 10:13-16)
15 Kando meleu miano wawaa ana'atedo hai Yesus kai dampasako peleno hai rapando. Sando ontoo ko'ira ana guruno, nilakodo awaihira ko'ira miano motu'a. 16 Sawali koie i Yesus naboboihira ko'ira ana'ate kai po'awaakondo ana guruno, « Poturusihiramo ko'ira ana'ate kando meleu hai Aku! Mi'osie tabe'ira, kana'umpe miano da kana di'ira ana'ate yahomo danta merapio pomparentaano Apu Alla. 17 Santo'u-to'uahano Kupo'awaakokomiu: Inai da sai tarimaa pomparentaano Apu Alla kana me'asa ana'ate, nai da'a nta mewiso hai larono. »
Miano ngkawasa mohalio pewiso'ano hai pomparentaano Apu Alla
(Mat. 19:16-30; Mk. 10:17-31)
18 Dahoo me'asa ponggawano miano Yahudi da metukanaiho koie i Yesus kanahi, « O tuangguru da kolaro, yo hapa nta niweweungku kaku po'awa tora ngkaidaaha? »
19 Polawaniomo koie i Yesus, « Yo hapa ona kau neehaku kolaro? Nahina da kolaro te'iaasi Apu Alla. 20 Dakomo to'orio parentano Apu Alla: ‹ Osie meduluakono da sa'iaa samporau, osie mompepate, osie mononako, osie mesaksii ngkule, pa'angga'o tamau ronga tinau. › »b
21 Kanahiomo koie miano, « Luwuo koie dahakumo nunu'o mebinta sakidihangku. »
22 Sapodeaho koie i Yesus nangkoharatia'o, « Dahopo me'asa penda kau weweuho. Balu'omo luwu inawau, kau titila'akondo'o miano ngkadee-dee, dakomo nta mo'awa kawasaa hai suruga. Yahopo kau leu nunu'aku. »
23 Sapodeaho koie, nilakono mopoe larono, tendenomo hina dompa kawasa. 24 Yahopo koie i Yesus kai o'ontoo ronga koharatia, « Taperano mohali miano ngkawasa nta pewiso'ano hai pomparentaano Apu Alla. 25 Kana'umpe mobu-mobunaa yo unta molaahi birino seu, ka'iaa miano ngkawasa nta mewiso hai pomparentaano Apu Alla. »
26 Ko'ira miano da mempodeaho koie kanahi'iramo, « Kicana koie, naihomo danta pinokosalama? »
27 Polawaniomo koie i Yesus, « Hapa da sai tule'i hai to manusia tule'io hai Apu Alla. »
28 Kanahiomo i Petrus, « Icami die kobintaniomo luwu da nidiomami kako nunukomiu. »
29 Kai polawani koie i Yesus, « Santo'u-to'uahano Kupo'awaakokomiu: Inai da bintaa laicano, samporano, petilano, miano motu'ano, atawa anano, tendenomo pomparentaano Apu Alla, 30 dahoo nta tarimaa mbule tepoluku-luku diekana, ronga oleo mperumbui dahoo nta mo'awa tora ngkaidaaha. »
Kompentoluno i Yesus tuluraa nta karasaino
(Mat. 20:17-19; Mk. 10:32-34)
31 Koie i Yesus boboihira da hopulu orua ana guruno kai koharatia, « Diekana dakita sabe hai Yerusalem, ronga pera luwu da niburindo nabii mekona hai Ana Nto Manusia nta kadadiahanomo. 32 Kana'umpe hina nta sinoro hai ira suku da sai to'orio Apu Alla, kai pinokola'u-la'u, kinoko'anui, ronga ino'oniu. 33 Dahira nta merasaiho ronga pepatee, sawali oleo ko'otolu dahosi nta mewangu mbule. »
34 Sawali luwuo koie nahina mpiha da pinahado ko'ira ana guruno i Yesus. Nando da'a to'orio hapa da patuduno, kana'umpe batuano koie da kinahiino tewuniakoo hai ira.
I Yesus mompokontido me'asa miano mopusu
(Mat. 29:29-34; Mk. 10:46-52)
35 Dahomo te'ete nta dungku'ano koie i Yesus hai Yerikho, kokeena dahoo me'asa miano mopusu da totoro hai wiwi sala ronga mo'ita-ita. 36 Tempono modeahira mentealo miano me'alu, kai petukana, « Hapa arumai? » 37 Kanahi'iramo, « I Yesus miano Nazaret da tealo. »
38 Kai pe'e'eta, « O Yesus, leeno i Daud, lolaroaku! »c
39 Yahopo ira da melolako mperi'ou tabe'o kai pengio. Sawali sapeko-pekoranomo mehohou, « O leeno i Daud, lolaroaku! »
40 Yahopo koie i Yesus kai todo ronga tena'ira kando wawaakono'o koie miano mopusu. Sa'okudanomo, kai petukanaiho, 41 « Hapa da po'eheu kaku weweuhako'o? »
Kanahiomo, « Apua, mokeahaku ko'onto! »