Opi-opia oliwi
(Mat. 18:6-7,21-22; Mk. 9:42)
17
1 Kai koharatia koie i Yesus hai ira ana guruno, « Matantuomo dahoo miano danta mompokontuuna miano suere hai dosa, sawali masilaka'o koie miano da moweweuhako. 2 Dadisi ki pontakirakoakono watu mpogili'a hai we'uno kai tinondurako hai tahi, ka'iaa ki pompokontuuna hai dosa te'asa di'ira miano okidi. 3 Nangkuamo koie, mi'o'olokaa!Ki daa petila'u da salakico, lakomo pokompehawa'o. Ronga ki lako mesosoorisi, ampuniomo. 4 Deenapo ki salakico pempitu asa oleo, ronga kai pempitumo leu kanahi, ‹ Pesosooriaku, › kahioomo kau ampunio. »
5 Yahopo kando kanahi ko'ira rasulu hai Apu Yesus, « Mintianiakami'o imanimami! »
6 Kai polawani Apu Yesus kanahi, « Ki daamo imanimiu kana wuku sawi owoseno, dakomiumo nta tule'i kanahi die hai pu'u ngkeu nduwo, ‹ Tebitumo ronga pelinca membula hai tahi, › dahoo nta nunu'o parentau.
Ponggawa ronga sangkinaa
7 Ki daa sangkinaamiu da merakala atawa mompakani, kai pohule mebinta hai uma, dakomiu bara nta tena'o kanahi, ‹ Merare totoro kau pongkaa! › 8 Na'iaa bara nta kanahimiu koie hai sangkinaa, ‹ Pompasadia'akuo nta kinaangku. Pekokorimo kau layaniaku dungku kaku ari mongkaa ronga mondo'u. Ki aripo koie, tewalicomo nde'e mongkaa ronga mondo'u. › 9 Dakomiu bara nta mo'ita tarimakasi koie hai sangkinaa, hina arimo weweuho dahano tinena? Matantuo nai da'a. 10 Kanamo na'amiu. Kimi arimo hedoo luwu dahamiu tinena, kahioomo kami ngkanahi, ‹ Icami die yahoo sangkinaa da sai koguna: cami te'iaasi hedoo hapa da paraluu hinedomami. › »
Hopulu miano da kokulidaa
11 Laro lolako'ano i Yesus me'o'ala hai Yerusalem, tealohio tidano wonua Samaria ronga Galilea. 12 Tempono sumoo hai me'asa kampo, leuhiramo hopulu miano ngkokulidaa tepo'awaakono. Todohiramo mpentade o'ala mentala, 13 kando mpehou, « O Yesus, ponggawa, lolarokami! »
14 Kai ontohira koie i Yesus kai koharatia, « Milakomo, popo'ontoniakondo'o wotolumiu ko'ira pua'ima pontompa pesomba. » Dahiramo konainoo melaa sala kando mentido.
15 Dahoo me'asa miano hai ira, sa'ontoo wotoluno hi tidomo, pohule'omo, kai daa mekora reree'o Apu Alla. 16 Kai pesolawako hai pu'u ngkaruno i Yesus ronga montarimakasi hai Iaa. Koie miano yahoo miano Samaria.
17 Petukanaamo koie i Yesus, « Na'iaa bara hopulu miano da pinokontido? Maina dahando da osio miano? 18 Nahina bara hai ira da mohule poko'owose'o Apu Alla saliwano die miano leu? » 19 Yahopo kai po'awaakono koie miano, « Pentademo kau lako, imaniu da pokosalamako. »
Leuhano pomparentaano Apu Alla
(Mat. 24:23-28, 36-41)
20 Sapetukanando miano golonga Farisi, impia nta leuhano pomparentaano Apu Alla, kai polawani koie i Yesus kanahi, « Pomparentaano Apu Alla ki daa nta leu, nahina peto'o da tule'i inontono miano, 21 ronga miano nai da'a tule'i kanahi, ‹ Ontoopo, dahoo diceena! › atawa, ‹ Dahoo pekeena! › Kana'umpe santo'u-to'uahano, pomparentaano Apu Alla dahosi hai comiu. »
22 Yahopo koie i Yesus kai po'awaakondo ana guruno, « Dahoo nta leu tempono dahamiu mokea ontoo mau ki te'asa oleoi larono oleo-oleo leuhano Ana Nto Manusia, sawali nasami da'a nta ontoo. 23 Ronga miano dahoo nta kanahiakomiu, ‹ Ontoopo, iaa dahoo pekeena! › atawa ‹ Ontoopo, iaa dahoo diceena! › Osie lako kokeena u'ungkee. 24 Kana'umpe kana kila tewinca mebinta asa tapuno langi dungku asa tapuno suere, kanamo koie nta daano Ana Nto Manusia ki leuho oleo nta leuhano. 25 Sawali dahoo nta dalangio meri'ou karasai da me'alu ronga nai inehe hai miano diekana.
26 Kana tempono nabii Nuh daanopo sai mewiso hai bangkano, kanasi dadaano ki daa nta leu Ana Nto Manusia. 27 Miano mpongkaa, mpondo'u, mengkawi ronga pinakawi, dungku oleo mpewiso'ano i Nuh hai bangkano. Perumbuino kai dadi e'e waa owose ronga mokomolomoo luwu miano.
28 Kanamo koie na'ana da dadi tempono i Lut: mpongkaa ronga mpondo'u, mpe'oli ronga mpobalu, kombula-mbula ronga mpompotade laica. 29 Sawali tempono i Lut meluarako mebinta hai Sodom, nilakono tii api ronga walira mebinta hai langi da mokolono'o luwu.
30 Kanamo koie nta daano ki leuhomo oleono nta leuhano Ana Nto Manusia mepopo'ontoniako wotoluno. 31 Koie oleo, inai da konainoo da'a hai landa-landano laicaa ronga hapa-hapano da da'a hai bolo laica, osiemo lako mo'ala, ronga kanapo na'ana miano da da'a hai uma, osiemo mohule. 32 Peehawa'o hapa da ari dadi hai samotu'ano i Lut.b 33 Inai da totonga'o penaano, dahoo nta isa penaano, ronga inai da isa penaano, dahoo nta awaa penaano. 34 Kupo'awaakokomiu: koie malo dahoo orua miano da me'asa mpoturi, me'asa danta niwawa ronga me'asano nta nibintani. 35 Dahoo orua tina da meronga mogili, me'asa nta niwawa ronga me'asano nta nibintani. [ 36 Ki daa orua miano da hai uma, me'asa nta niwawa ronga me'asano nta nibintani. »]
37 Kando petukanaiho i Yesus, « Apua, maina koie nta dadiano? »
Kai lawanihira kanahi, « Maina dahano bangke, kokeenamo tengkowuano sico. »c