Parereno miano sai mongkote da mo'atoro doi
16
1 Kai koharatia koie i Yesus hai ira ana guruno, « Dahoo miano ngkawasa da da'a me'asa anabuano da mo'atoro'akono doino. Kai tibo da'a da leu koie hai miano kawasa momperahi-rahiakono koie anabuano hi daa mekawu-kawuako inawano. 2 Yahopo kai boboiho koie anabuano kai po'awaakono kanahi, ‹ Kana'umpe die da pinodeangku dadaano sipa'u? Diekana soroakuo buktiino da po'atoro'u inawangku. Nai tewalimo co'o atoro'akuo doicu. ›3 Kanahiomo koie da mo'atoro doi hai bolo mpelaroano, ‹ Hapamo die danta niweweungku, ki poko'ari-ariakumo mohedo ponggawangku? Metangkau naku pongkurami, meka'ita mokoko'anuaku. 4 Po'awaakumo akala, kicu pinokonte'o'ari-ari hai pohedoangku, me'aluo simbauku danta ehe kicu poo'ia hai laicando. ›
5 Yahopo kai boboihira tee-tee'asa miano da kodosa hai ponggawano. Kai petukanaiho da lamoro me'asa, ‹ Opia dosau hai ponggawangku? ›
6 Kai polawani koie miano, ‹ Asa etu katoa epu. ›
Kanahiomo koie da mo'atoro doi, ‹ Diemo surano dosau, totoromo kau tekara-karai burio telima pulu katoa. ›
7 Yahopo kai petukanaiho da ko'orua kanahi, ‹ Opia na'au dosau? ›
Kai polawani koie miano, ‹ Asa rewu karu gandum. › a
Kanahiomo koie da mo'atoro doi, ‹ Diemo surano dosau, kau burio tehalu etu karu. ›
8 Yahopo koie ponggawano kai reree'o koie da mo'atoro'akono doino tendenomo namengkaka me'urusi, mau ki sai mongkote larono. Kana'umpe miano die hai dunia mengka-mengkaka me'urusi hai simbauno ka'iaa miano da tora larono molinyaaha. 9 Kupo'awaakokomiu, mimpetokiahakomo kawasano wita'ea; ki dungku tempono koie kawasa sai hina gunano, dakomiumo nta tinarima hai poo'iaha da sai hina puraano. »
Konianto'u larono pinasipole da puro-puro
10 « Miano da pinarasaeai larono puro-puro, pinarasaeaho hai larono da melaba. Ronga inai da sai mongkotei larono puro-puro, nai da'a nta mongkotei larono da melaba. 11 Dadi, ki sami mongkote mo'atoro inawano dunia, inai danta parasaeakomiu mo'atoro inawa da santo'u-to'uahano? 12 Ronga ki sami ngkonianto'u mo'atoro inawano suere miano, naihomo danta ehe moweekomiu nta tilamiu?
13 Nahina te'asa miano da tewali sangkinaa hai orua ponggawa. Kana'umpe kicana koie, dahoo nta kokoleaho da me'asa kai lou'o da me'asa. Atawa dahoo nta anintotu hai da me'asa kai paruruo da me'asa. Kanamo comiu na'amiu, nami da'a to'ori tesangkinaa hai Apu Alla ronga hai kawasaa. »
14 Sando podeaho ko'ira miano golonga Farisi, nilakodo mpototaahio, nangkuamo ira da dompa ehee doi. 15 Kai po'awaakondo koie i Yesus, « Comiu koie da mompokongkona-ngkona hai ra'ino miano, sawali Apu Alla dahoo to'orio laromiu. Kana'umpe da inanggano miano montoe, yahomo da kinokoleano Apu Alla.
16 Kana'umpe Boku Parentano nabii Musa ronga bokuno raro nabii nileleako dungku kai leu koie i Yahya pompobaho. Sa'isono da'a i Yahya, pomparentaano Apu Alla nileleakoo hai mai-maina, ronga pera miano mepakisaa nta mewiso hai laro pomparentaano. 17 Mobu-mobunaa lono'ano langi ronga wita'ea ka'iaa te'asa dore ihino Boku Parentano nabii Musa sai ko'angga.
18 Inai-inai da bintaa samotu'ano, kai lako kawi hai tina suere, koiemo tama da moweweu ngkabaria. Ronga inai-inai da mongkawini tina da nibinta, koiemo tama da moweweu ngkabaria. »
Miano ngkawasa ronga i Lazarus da kadee-dee
19 « Dahoo me'asa miano ngkawasa da sadia mebabuako babu mentii olondoro ronga kae halusu, ronga tapio oleo mendondo'ua mepopo'ontoako kawasano. 20 Dahoo me'asa miano mpo'ita-ita da meneehako i Lazarus, wotoluno pono'ako kumbi, da leleha okudahio pinewamba laicano koie miano ngkawasa, 21 mokeaho moruru wuku ngkanuno koie miano ngkawasa nta lilimboiho mokohuloono. Deenapo ko'ira dahu leu sile'io kumbino.
22 Dungku mate nde'e koie miano ngkadee-dee, kando mewawaa mala'ekati hai inampuhano nabii Ibrahim. Kai mate na'ana koie miano ngkawasa kai kinoburu. 23 Dahomo tepakasea hai wonuando miano mate, kai pesoso'e ontoo nabii Ibrahim ronga i Lazarus da totoro hai inampuhano. 24 Kai pe'e'eta kanahi, ‹ Tamangku Ibrahim, lolaroaku ka'asi, mintena'akuo koie Lazarus kai tuduwako tonisuno hai e'e ronga kai turupakoakuo hai elongku, nantaperano mopoekuo die hai bolo langa api. ›
25 Sawali nabii Ibrahim nangkanahi, ‹ Anaku, peehawa'o, hai laro ntoraahau aricomo tarimaa da moico, sawali i Lazarus nantarimaa da sai moico. Diekana iaamo da nililimboi, sawali co'o da dalangio karasai. 26 Saliwano koie, hai olotamami ronga hai comiu dahoo olotanicita lebo da owose, nangkuamo kindo meda'a miano da mebinta na'ai nta mompole hai comiu, atawa da mebinta kokeena nta mompole hai cami, nando da'a nta tepole. ›
27 Kanahiomo koie miano ngkawasa, ‹ Kicana koie, po'itaaku hai comiu tamangku, kami ntena'akuo koie i Lazarus kai lako hai laicano tamangku, 28 kana'umpe dahopo olima petilaku, kai oliwihira, kando osie mewiso die hai karasai. ›
29 Sawali nangkanahi nabii Ibrahim, ‹ Dahomo hai ira Boku Haratiano Apu Alla da ari pinokodungkuno nabii Musa ronga meha-mehano nabii. Moicoo kando podedeaho ihino ko'ira boku. ›
30 Sawali namolawani koie miano ngkawasa kanahi, ‹ Nai da'a, tamangku Ibrahim, sawali ki daa miano mate da tora mbule, kai leu mo'awaakondo, yahopo kando daa nta memanda mpoweweu dosa. ›
31 Sawali namolawani nabii Ibrahim, ‹ Ki sando padulio parentano i Musa ronga raro nabii, matantuo nando da'a nta memparasaea, mau ki daa miano da mate kai tora mbule. › »