Parereno domba da isa
(Mat. 18:12-14)
15
1 Me'aluo miano mpontagi sima ronga miano madosa da meleu hai Yesus nta mompodedea pompotisuno. 2 Mpengunguhiramo ko'ira miano golonga Farisi ronga guru agama kanahi, « Die miano montarima miano madosa ronga mongkaa mperongaakondo. »3 Yahopo koie i Yesus kai tuluraakondo'o dadaano die parere kanahi, 4 « Ki daa hai comiu miano da modio domba te'asa etu boto, kai tibo isa me'asa, matantuomo dahoo nta bintaa da sio pulu osio hai lueno, kai lako u'ungkee da molengu dungku kai awaa. 5 Ronga ki awaamo, nilakono lemba'o ronga mohende. 6 Sadungkunomo hai laica, nilakono boboihira petilano ronga da petade laicano kai kanahi, ‹ Mimohendemo merongaaku, kana'umpe koie dombangku da isa ku'awaamo. › 7 Kupo'awaakokomiu: Kanamo koie, dahoo nta da'a kahendepa owose hai suruga tendenomo me'asa miano madosa da toba, kolaloo ka'iaa kahendepa tendenomo da sio pulu osio miano ntekona da sai da'amo paraluu toba. »
Parereno doi da isa
8 « Atawa kanano me'asa tina da modio hopulu doi pera, kai tibo isa asa doi, nai da'a bara nta montunu hulu, kai kerusio laica melo-melou u'ungkee dungku kai awaa? 9 Ronga hi awaamo, nilakono kebaihira raro ntokiano ronga da petade laicano kanahi, ‹ Mimohendemo merongaaku, kana'umpe doicu da isa ku'awaamo. › 10 Kupo'awaakokomiu: Kanamo koie nta memohendedo mala'ekatino Apu Alla tendenomo me'asa miano madosa da manda. »
Parereno ana ntama da isa
11 Kai koharatia penda koie i Yesus, « Dahoo me'asa tama, orua ana ntamano. 12 Da tetuai mogau'akono tamano kanahi, ‹ O Ama, weehakuomo na'angku nta tilaku mebinta hai inawa nta hakuku. › Yahopo tamando kai tila'akondo'o koie inawa.
13 Opiapo oleo da ari tealo, koie ana ntetuai kompuluo luwu inawano kai balu'o, yahopo kai lako hai wonua mentala. Kokeenamo dahano mekawu-kawuako pupuraa tilano. 14 Sapuranomo luwu, kai timpaiho murota koie wonua, kai pontampu'u nde'e marasai. 15 Kai lako moo'ia metangki hai me'asa miano koie hai wonua. Koie miano tena'o kai lako hai galuno moweeho mongkaa ko'ira wawino. 16 Samokohuloonomo, kai mokea mongkaa petila ngkinaando ko'ira wawi, sawali sai te'asa miano da moweeho.
17 Sapenasaamo dadaano, kai kanahi, ‹ Me'alu to'uno da pinagadino tamangku me'aluo kinaando, sawali i'aku nta mateakumo mokohuloo na'ai. 18 Dadisi kulako awaa tamangku, kaku po'awaakono kanahi, « O ama, madosaaku hai suruga ronga hai ama. 19 Naku pantasimo kicu nineehako ana'u. Weweuhakumo tewali pinagadiu. » › 20 Yahomo kai lako me'o'alahio tamano.
Dahopo mentala, koie tamano ontoomo anano, nilakono lolaroo. Pekalulu'omo tamano dungku awaa, kai rako'o ronga uma'o.
21 Kanahiomo koie anano, ‹ O ama, madosaakumo hai suruga ronga hai ama, naku pantasimo kiu neehakuo ana'u. ›
22 Sawali koie tamano nangkanahi hai ira sangkinaano, ‹ Mokokarai mpowawaakono babu da moi-moico kami mpokompebabuo, ronga pokompesisio hai wua limano, naamo pokompesapatu'o. 23 Ronga mimpo'ala te'asa ana sapi da molombi kami mposumbele, kato mpongkaa ronga mohende. 24 Kana'umpe die anaku ariomo mate, kai tora mbule; ariomo isa, sawali ku'awaamo mbule. › Kando mpetampu'u nde'e memohende.
25 Sawali anano da tetukaka dahoo hai uma. Tempono mohule, sa'okudahiomo laica, kai podeaho randu ronga da mempolulo. 26 Kai poboboi me'asa sangkinaa kai petukanaiho ki hapa da kadadia. 27 Kai polawani koie sangkinaa, ‹ Tuaimiu pohule'omo, ronga ariomo tamamiu mosumbele'akono ana sapi da molombi, tendenomo mohende hina awaamo anano moi-moico. ›
28 Kai masusa koie ana ntetukakano, nai ehemo nta mewiso hai laicano. Kai peluarako tamano ta'u-ta'uo. 29 Sawali nalawanio tamano kanahi, ‹ Menta'uakumo tesangkinaa hai co'o, ronga naku paisapo sai nunu'o parentau, sawali mau te'asapo ana wembe nau paisapo moweehaku kako memohende ronga raro simbauku. 30 Sawali yahopo kai leu ana'u da ari lako kamburako inawau meronga-ronga miano endeo, aricomo mosumbele'akono sapi da molombi! ›