I Yesus mompokontido penda konaa oleo mpekolia
14
1 Konaa oleo mpekolia, koie i Yesus leu tewawe hai laicano me'asa ponggawano golonga Farisi. Ko'ira miano da meleu mekaa-kaani to'uo. 2 Tibo-tibono leu me'asa miano da kamba karuno ronga limano mentade hai ra'ino. 3 Koie i Yesus metukanaihira raro guru agama ronga miano golonga Farisi kanahi, « Menunu hai atorano agama, tewalio bara mompokontido miano konaa oleo mpekolia atawa nai tewali? » 4 Sawali ndona mpengio. Yahopo koie i Yesus kai ungkaario limano koie miano morungku, kai pokontidoo, kai tena'o lako.5 Koharatia'omo koie i Yesus, « Ki daa te'asa anamiu atawa sapimiu da tuuna hai pinewuwu konaa oleo mpekolia, nami da'a bara nta karongamiu rentaa kai peluarako? » 6 Nando mentule'i lawanio.
Totoro'a da te'angga ronga da sai te'angga
7 Koie i Yesus ontohira ko'ira tamu da mporuruki totoro'ando da te'angga, yahomo kai pomparereakondo kanahi, 8 « Ki titiako miano lako hai ndo'ua ngkawi'a, osie totoro hai totoro'a da te'angga, te'iaamo kai daamo koie miano ari montitia suere miano da te'a-te'angga ka'iaa co'o. 9 Te'iaamo kai leu koie miano da ari titiakomiu kanahi, ‹ Weehakono'o die totoro'a koie miano. › Yahopo kau lako totoro mokoko'anu hai totoro'a da kola-kolalopo sai te'angga. 10 Sawali kiu tinitia hai ndo'ua, lakomo totoro hai totoro'a da kola-kolalopo sai te'angga. Aipo apuno laica kai leu hai co'o kanahi, ‹ O kia, mimpolincamo totoro hai ra'i. › Kicanamo koie, dakomo nta tepa'angga hai ra'indo luwuo tamu suere. 11 Kana'umpe pera miano da pa'angga'o wotoluno dahoo nta pinaruru, ronga miano da meparuru dahoo nta pina'angga. »
12 Yahopo koie i Yesus kai po'awaakono koie miano da titiaho, « Kiu pendo'ua, meanta atawa malo, osie montitia simbau'u atawa petila'u atawa da petade laicau da kawasa. Kana'umpe ndona nta titiako, kicana koie dahiramo na'anda wolohico. 13 Sawali kiu pendo'ua, titiahira miano da kadee-dee, da sai koa'ako miano, miano lungkuho, ronga da mopusu. 14 Ronga daako nta konantuara, hina sai hina nta powolohindo co'o. Kana'umpe dahau nta tarimaa wolohino kindo tora mbule pera miano ntekona. »
Parereno ndo'ua ngkawi'a
(Mat. 22:1-10)
15 Tempono koie me'asa miano da mongkaa hai ndo'ua modeaho, kai kanahi hai Yesus, « Konantuarahira miano danta pinetoka hai laro pomparentaano Apu Alla. »
16 Sawali koie i Yesus nangkoharatia, « Dahoo me'asa miano da mendo'ua owose ronga montitia miano me'alu. 17 Okudahio wotuno ndo'ua, kai tena'o sangkinaano mo'awaakondo pera da tinitia kanahi, ‹ Mileumo, kana'umpe sadia'omo luwu. ›
18 Sawali ndona mpekoka'eu mo'ita ma'apu. Me'asa miano kanahi, ‹ Ariaku mo'oli wita ronga nta lako'aku ontoo, po'itaaku ma'apu. › 19 Mehano kanahi, ‹ Ariaku mo'oli lima ntaroa sapi ronga nta lako'aku potisu'ira merakala, po'itaaku ma'apu. › 20 Mehano penda kanahi, ‹ Yahopo kaku ari kawi, nangkuamo koie kasaku da'a nta to'ori leu. ›
21 Yahopo kai pohule koie sangkinaa mo'awaakono apuno luwuo da kanahindo miano. Namasusa'o nde'e koie apuno laica ronga tena'o sangkinaano, ‹ Merare lako hai koa-koa sala ronga sampa-sampano sala hai kota wawahira na'ai miano ngkadee-dee, da sai koa'ako miano, miano mopusu, ronga miano lungkuho. ›
22 Kai pohule koie sangkinaa mo'awaakono apuno kanahi, ‹ O ponggawa, ariakumo kaa lako padala'o dahangku tinena, sawali dahopo asa ntilara totoro'a da sai ko'ihi. ›
23 Yahopo koie apuno ndo'ua kai tena'o sangkinaano, ‹ Lakomo hai batatana ronga hai sala hai olota kampo, pakisaa'ira miano kando meleu, kai ponosi laicangku. 24 Kana'umpe kupo'awaakokomiu: nai te'asa miano da ari tinitia danta montompolako pompetokangku. › »
Danta nunu'o i Yesus bintanio luwu
(Mat. 10:37-38)
25 Koie tempo me'aluo miano da konainoo lolako merongaa i Yesus. Kai pegilisako ontohira ronga koharatia, 26 « Inai da leu hai Aku ronga sai da'a kokoleaho tamano, tinano, samporano, anano, petilano tama, ronga petilano tina, deenapo penaano pantano, nai tule'i tewali ana guruku. 27 Naiho da sai lemba'o keu mpinotalambeno kai nunu'aku, nai tule'i tewali ana guruku.
28 Kanano me'asa miano hai comiu danta mompo'engka monara, hapa danta iso niweweuno? Nta totoro kai doa'o nta ongkosono, kai to'orio ki daasi nta koa doino nta pompoko'arino. 29 Ki sai da'a, koie miano nta montampu'umo moweweu pondasi, sawali nasai tule'i nta moko'ario. Yahopo pera miano da ontoo nta mempototaahio, 30 ndomengkanahi, ‹ Koie miano da montampu'u mompo'engka, sawali nasai tule'i moko'ario. ›
31 Atawa inai koie mokole danta lako mamusuakono suere mokole, ki sai totoro isala pekirio, ki daasi nta tule'i meta'oako da hopulu rewu miano mebali'akono da rua pulu rewu? 32 Ki perasa'o hi sai da'a nta tule'i, matantuomo ndoda'apo nta okuda balido, kai pontena miano lako mogau'ako sara-sarano danta tinepokonaakondo. 33 Kanamo na'amiu luwumiu: ki sami da'a bintanio luwu hapa-hapamiu, nami tule'i nta tewali ana guruku. »
Tahi da motewemo
(Mat. 5:13; Mk. 9:50)