Dosa ronga karasai
13
1 Koie tempo leuhiramo miano montuluraakono i Yesus dadaando miano Galilea hi ari Pilatus montena miano kando pinopate, daando konainoo mesombaako sinumbele hai Apu Alla, kai pedulu reado ronga reano kadadi da sinumbele. 2 Kai lawanihira kanahi, « Ponto'orimiu bara, kando pinopate kana koie ko'ira miano Galilea tendenomo hi owo-owose dosando ka'iaa dosando miano Galilea suere? 3 Kupo'awaakokomiu: Nai da'a. Sawali ki sami mentoba, luwumiu nta binasakomiusi kana ko'ira. 4 Atawa po'awamiu, ko'ira miano da hopulu hoalu da nidapono monara hai Siloam, kando memate, kolaloo bara owose dosando ka'iaa miano meha da meda'a hai Yerusalem? 5 Kupo'awaakokomiu: Nai da'a. Sawali ki sami mpoboli'i, luwumiu nta masilakakomiusi kana ko'ira. »Parereno keu ara da sai kowua
6 Kai pomparereakondo i Yesus, « Dahoo me'asa miano da mombula keu ara hai uma angguruno. Me'asa oleo kai leu mo'u'ungke wuano koie keu ara, sawali nasai po'awa. 7 Yahopo kai po'awaakono koie miano da hedoakono'o koie uma, ‹ Otolu ta'uakumo kokahule mo'u'ungke wuano koie keu ara, naku paisa mo'awa. Podoomo koie keu! Nahinasi gunano hi daa pupuraa lombi-lombino wita. ›
8 Kai polawani koie miano, ‹ O ponggawa, poturusiomo isala kai tora larono die ta'u, kaku tangkaulio lilicu'o, yahopo kaku poweeho pupu. 9 Aipo ta'ui ra'i dahomo nta kowua. Ki sai da'a, podoomo! › »
Mompokontido miano konaa oleo mpekolia
10 Konaa me'asa oleo mpekolia, koie i Yesus konainoo mompotisu hai larono laica sambahea'a. 11 Kokeena dahoo me'asa tina da hopulumo hoalu ta'u nirurungkupino setani, kai mobohu torukuno dungku kasai to'ori mentade mongkote. 12 Tempono i Yesus ontoo koie tina, kai boboiho kanahi, « O ina, tidoomo rungku'u. » 13 Kai dampasako peleno koie hai tina, koiesi wotu kai pentade mongkote, kai reree'o Apu Alla.
14 Sawali powawaino laica sambahea'a namosa'o larono tendenomo koie i Yesus hi ari mompokontido miano konaa oleo mpekolia, yahomo kai kanahi hai miano me'alu, « Dahoo onoo oleo nta pohedomiu. Hai larono onoo oleo koie, leumo kami mpinokontido, osie konaa oleo mpekolia. »
15 Sawali Apu Yesus namolawani kanahi, « Hoo comiu miano mompe'anu-anuto'u! Dahoo bara miano hai comiu hi konaa oleo mpekolia da sai bintaa sapino atawa kolodaino mebinta hai boso, kai wawaa lako mondo'u? 16 Nai da'a bara paraluu, die tina leeno i Ibrahim, da hopulumo hoalu ta'u kinokorino ponggawano bilisi, kai niwuwuhi pekokono konaa oleo mpekolia? » 17 Tempono i Yesus kanahi arumai, luwuo balino mokoko'anuhiramo, sawali ko'ira miano me'alu suereno sanaa'ira tendenomo luwu niweweuno da tereree.
Parereno wuku sawi ronga tulu
(Mat. 13:31-33; Mk. 4:30-32)
18 Koharatia'omo penda koie i Yesus, « Hapa nta pengkenano pomparentaano Apu Alla, atawa parere hapa Kudaa nta gambaraakono'o? 19 Pomparentaano Apu Alla kanamo asa wuku sawi da inalano miano kai hawuo hai umano; kai tora tewali keu, ronga kamanu-manu mpomua hai sampano. »
20 Kai kanahi penda, « Hapa nta pengkenano kicu gambaraa koie pomparentaano Apu Alla? 21 Kana tulu da inalano me'asa tina, kai hela'iakono'o asa karu tariju dungku kai tewua luwuo. »
Inai danta salama
(Mat. 7:13-14,21-23)
22 Daano koie i Yesus me'o'alahio Yerusalem, kai tadehio kota ronga kampo kai daa mompotisu. 23 Ronga dahoo me'asa miano da kanahi, « Apua, te'ete'o bara miano danta salama? »
24 Kai lawanihira koie i Yesus, « Mimpekoramo dadarako wotolumiu mewiso hai wamba da mo'odo, kana'umpe me'aluo miano danta mokea mewiso, sawali nando to'ori. 25 Ki pewangu koie apuno laica kai tampo'akomiu'o wamba, dakomiumo nta mpentade hai luara, kami daa kunte'o wamba ronga kanahi, ‹ Apua, mi'ungkahiakami'o wamba! › Dahomo nta lawanicomiu kanahi, ‹ Naku da'a to'orio maina pebintaamiu. › 26 Yahopo kami daa nta kanahi, ‹ Aricamisi mpongkaa ronga mpondo'u merongakomiu, ronga comiumo da ari mompotisu kuu-kuu'o sala hai kotamami. › 27 Sawali dahomo nta mo'awaakokomiu, ‹ Naku da'a to'orio pebintaamiu. Mimpolai, osie da'a hai ra'incu, comiu miano da mpoweweu da mosa'o! › 28 Kokeenamo dahano perurumatea ronga pompokiki'a baka. Kana'umpe dakomiu nta ontoo i Ibrahim, i Ishak, i Yakub, ronga pera nabii da meda'a hai pomparentaano Apu Alla, sawali dakomiumo nta nibasiako hai luara. 29 Dahira nta meleu miano mpebinta hai sabaano oleo, hai sumoo'ano oleo, hai utara, ronga salata, nta mentotoro mendo'ua hai laro pomparentaano Apu Alla. 30 Ronga santo'u-to'uahano, dahira miano da te'a-te'angga diekana nta tebalia kai tewali da owa-owawa, ronga da owa-owawa diekana dahoo nta tebalia kai tewali da te'a-te'angga. »
I Yesus lolaroo kota Yerusalem
(Mat. 23:37-39)
31 Koie tempo meleuhiramo opi-opia miano golonga Farisi ronga kanahi hai Yesus, « Lakomo mebinta na'ai, kana'umpe mokole Herodes dahoo nta pepatekomiu. »a
32 Kai lawanihira koie i Yesus kanahi, « Lakomo kami mpo'awaakono koie dahu lampu kanahi, ‹ Die oleo ronga i'ile pohedoangku montila setani ronga mompokontido miano morungku, sawali ipua dahakumo nta moko'ario pohedoangku. › 33 Sawali die oleo ronga ile dungku ipua nta sai-saincu lako, kana'umpe me'asa nabii nai tewali mate ki sa'iaa hai Yerusalem.
34 O miano Yerusalem, miano Yerusalem, comiu da pepatehira raro nabii, ronga watuihira miano da tinena leu hai comiu! Pempi-pempiahakumo mokea kompuluhira anamiu, kana to'u tina manu da romusakohira anano hai tonto panino, sawali nasami ehe. 35 Santo'u-to'uahano, die raha mpesombaa dahoo nta nibintani. Sawali Kupo'awaakokomiu: Metampu'u diekana-kana, nami da'amo nta paisa ontoaku penda dungku kai leuho dahamiu nta kanahi, ‹ Nibarakati'o miano da leuhako neeno Apu! › »b