Oliwi kato osie mompe'anu-anuto'u
(Mat. 10:26-27)
12
1 Koie tempo teporewu-rewu miano me'alu da mentekongko, nangkuamo kando mempekadisi-disi ronga mpekalesa-lesa. Yahopo i Yesus kai petampu'u potisu'ira ana guruno meri'ou kanahi, « Midagai'o tulu mpompewukeno miano Farisi, yahoo mompe'anu-anuto'u. 2 Nahina te'asa da tetutuwi da sai nta inungkahi, ronga nahina te'asa da tewuniako da sai nta tino'ori. 3 Nangkuamo koie, hapa da nigau dahano rondoma, dahoo nta pinodea dahano molinyaa, ronga hapa da nimburumiu hai bolo suo, dahoo nta nileleako mebinta hai patandeno laica. »aMarou hai Apu Alla
(Mat. 10:28-31)
4 Kupo'awaakokomiu, raro ntokiangku, osie momeetakohira miano danta pepatee wotolumiu, sawali ki arimo, nahinamo da to'ori niweweundo. 5 Sawali dahaku nta mo'awaakomiu inai da pantasi kami momeetako, yo Apu Alla! Kana'umpe ki arimo mompepate, makuasasi penda nta mobasiako hai bolo naraka! Santo'u-to'uahano Kupo'awaakokomiu, Apu Allamo kami momeetako. 6 Nai da'a bara oto lere nibalu lima boto te'iaasi orua doi? Mau kicana koie, nai te'asa boto da kinolumpeno Apu Alla. 7 Lalo'eahopo comiu, mau luwu wuuno rapamiu ariomo nidoa. Nangkuamo koie, mi'osie momee, kana'umpe kolalo owose anggamiu ka'iaa ko'ira oto lere da me'alu.
8 Kupo'awaakokomiu: Pera miano da akui'aku hai ra'indo miano, I'aku Ana Nto Manusia na'angku nta akui'o hai ra'indo mala'ekatino Apu Alla. 9 Sawali inai da mehapuihaku hai ra'indo miano, dahaku na'angku nta mehapuiho hai ra'indo mala'ekatino Apu Alla. 10 Pera miano da gau ngkabaria'o Ana Nto Manusia dahoo nta inampuni, sawali inai da gau ngkabaria'o Sangkoleono Alata'ala nai da'a nta inampuni.
11 Sawali salakodo mokompekara-karakomiu hai laica sambahea'a ronga hai ra'indo pamarenta naamo da mengkuasa, mi'osie tewereako hapa nta polawanimiu kara-karamiu, 12 kana'umpe koiesi wotu dahosi Sangkoleono Alata'ala nta motisukomiu hapa danta kanahimiu.
Parereno miano ngkawasa da pore
13 Kai kanahi koie me'asa miano hai tongano miano me'alu, « O tuangguru, tena'o koie petilaku kai petila'akami'o koie kikitoo! »
14 Sawali koie i Yesus nangkoharatia, « Petilaku, inaiho da ari tisu'aku tewali hakim atawa tolea nta pasipolekomiu? » 15 Kai koharatia penda, « Peehawa'o, dagai'o wotolumiu kami osie tewali miano lodoko, kana'umpe torano miano na'iaa me'ungkaa hai inawano da me'alu. »
16 Yahopo i Yesus kai tuluraakondo'o me'asa parere kanahi, « Dahoo me'asa miano ngkawasa, da me'alu hasili witano. 17 Kai petukanaiho larono, ‹ Hapa danta niweweungku, kana'umpe nahinamo nta podiohangku koie hasili witaku. › 18 Yahopo kai kanahi hai larono, ‹ Diemo danta niweweungku: Dahaku nta bongkaraa ko'ira kampiricu, kaku pompotade da kolalo owose. Kokeenamo dahangku nta dioho hasilino witaku ronga hapa-hapangku meha. 19 Yahopo nde'e kaku daa nta kanahi hai larongku, « Kawasaakumo, ronga inawangku dahomo nta koa opi-opia ta'u lembahino. Diekana te'iaamo nta mekoli-koli, mongkaa, mondo'u, ronga mohende ngkaida'a. » ›
20 Sawali nangkoharatia Apu Alla hai iaa, ‹ Hoo ico'o miano mpore, die malo penaau dahomo nta inala, ronga hapa da tinawuhakou diekana, naihomo danta ko'apuako? ›
21 Kanamo koie dadino miano da montawuhako kawasa nta taro mpantano, ki sai hina kawasano hai ra'ino Apu Alla. »
Osie tewere
(Mat. 6:25-34)
22 Koie i Yesus koharatia hai ira ana guruno, « Nangkuamo koie Kupo'awaakokomiu: Osie tewereako nta tinoraakomiu, hapa nta kinaamiu, ronga hapa nta pinodaino wotolumiu. 23 Kana'umpe tora kolaloo ko'angga ka'iaa kinaa, ronga wotolu kolaloo ko'angga ka'iaa pakea. 24 Mimpekaa-kaanio ko'ira kao-kao, nahina da mohawu ronga da mongkotu, nahina da kokampiri atawa da kotambaru, sawali dahosi pakanihira Apu Alla! Ntaperamiu kolalo te'angga ka'iaa ko'ira manu-manu! 25 Dahoo bara te'asa miano hai comiu da ari tewere kai to'ori tianio mentaa umuruno mau te'ete? 26 Dadi, ki sami nto'ori moweweu hapa-hapa da okidi, hapa kami ntewereako sue-suereno?
27 Mimpekaa-kaanio torando ko'ira bunga, nando da'a mekora mohedo ronga moninco, sawali Kupo'awaakokomiu: koie mokole Sulaiman da kawasa ngkanaico, nai da'a mepakea kana to'u moicono ko'ira bunga. 28 Dadi, eheemo koie kapu ngkobunga hai lueno, da da'a die oleo ile nta nihawiako bolo api, dahosi Apu Alla pakea'o kai moico. Lalo'eahopo comiu, miano da kura mparasaea! 29 Dadi, mi'osie tewere ronga mo'u'ungke ngkaida'a hapa danta kinaamiu ronga hapa danta nindo'umiu. 30 Kana'umpe koie luwu yahomo da inu'ungke ngkaida'ano miano da sai to'orio Apu Alla. Mainakaa Tamamiu hai suruga to'orio luwu koie da paraluumiu. 31 Nangkuamo koie, mi'u'ungkee pomparentaano Apu Alla, yahopo nde'e kai daa nta tianiakokomiu'o koie luwu da paraluumiu. »
Inawa hai suruga
(Mat. 6:19-21)
32 Mau kimi ngkana lunu nte'ete, mi'osie momee! Kana'umpe Apu Alla Tamamiu sanaa'omo larono kai weekomiu barakati da mebinta hai pomparentaano. 33 Balu'omo hapa-hapamiu kami sadakaa'akondo'o miano ngkadee-dee! Poweweu kadu-kadu doi da sai nta paisa mosa'o, yahoo kawasa hai suruga da sai nta pura, da sai tule'i inokudahino miano mpononako, ronga da sai nta sinosa'ono konde. 34 Kana'umpe maina dahano kawasamiu, kokeenamo dahano pelaroamiu.
Oliwi mpedagai
(Mat. 24:43-51)
35 Kahioomo kami mpekokori ngkaida'a, ronga hulumiu kai sadia lolanga. 36 Ronga kahioomo kami ngkana miano da totarimaa apundo, ki pohule mebinta hai ndo'ua kai pekunte hai wamba, kai nilakodosi ungkahiakono'o wamba. 37 Konantuarahira pera sangkinaa ki leu apundo kai awahira kando daasi mempodaga. Santo'u-to'uahano Kupo'awaakokomiu: Koie apundo dahoo nta lulumio langole babuno, kai tena'ira mentotoro ronga poweehira mpongkaa. 38 Ronga konantuarahira ki leu mentonga alo atawa komeanta, kai awahira kando daasi mempodaga. 39 Paraluu'o kami nto'orio die! Kicanano ntei laica dahoo to'orio damu opia kai daa nta leu koie miano mpononako, nai da'a nta poturusio kai pewiso hai laicano. 40 Nangkuamo koie, kahioomo kami sadia mpedagai, kana'umpe Ana Nto Manusia nahina danta teto'o-to'ori kai leu.
41 Kanahiomo i Petrus, « Apua, hai camimo bara tuduano koie pareremiu, atawa hai luwu miano? »
42 Polawaniomo Apu Yesus, « Ki daa ata da konianto'u ronga motu'a mpinehawa, iaamo danta tinaarakono apuno, nta atoro'ira simbauno, ronga moweehira mpongkaa ki dungku tempono. 43 Konantuaraa sangkinaa da konainoo weweuho dahano tinena, kai leu apuno. 44 Santo'u-to'uahano Kupo'awaakokomiu: Koie apuno dahoo nta taarako kai dagai'akono'o luwuo hapa-hapano. 45 Sawali ki kanahi koie sangkinaa hai pelaroano, ‹ Nai da'apo nta oru leu apungku, › yahopo kai pontampu'u langkuihira ko'ira sangkinaa meha, tama ronga tina, kai pongkaa ronga mondo'u dungku molangu. 46 Dadi, koie apuno sangkinaa dahoo nta leu konaa oleo da sai tepatantu, ronga damu da sai tino'ori, ronga dahoo nta pepatee, kai pengkena inawando miano da sai parasaea.
47 Koie sangkinaa da to'orio po'eheno apuno, sawali nasai da'a sadia ronga kasai da'a hedoo da po'eheno apuno, dahoo nta montarima kalangku da me'alu. 48 Sawali sangkinaa da sai to'orio po'eheno apuno kai poweweu ntesala, dahoo nta montarima kalangku da te'ete. Miano da montarima me'alu, dahoo nta tinuntu me'alu, ronga miano da pinerahi-rahi me'alu, dahoo nta tinuntu kai me'a-me'alupo. »
I Yesus mowawa tepobungkua
(Mat. 10:34-36)
49 « Kaku leu, yahoo nta mompokomelanga api hai wita'ea. Taperangku mohende ki daamo melanga apino. 50 Sawali dahopo mobea karasai da nirora'incu. Ronga taperano masusa larongku ki sai da'apo tekabu. 51 Da ponto'orimiu kaku leu hai wita'ea nta mompokontepokona? Na'iaa, sawali mompokontepobungku! 52 Kana'umpe metampu'u diekana, hai larono me'asa laica da olima mianono, dahira nta tepobungku, otolu bali'o da orua, atawa orua bali'o da otolu. 53 Dahira nta tepopobungku: tama ana nta bali'o anano tama, ronga ana ntama nta bali'o tamano. Tina ana nta bali'o anano tina, ronga ana ntina nta bali'o tinano. Ponino tina nta mebali'akono ana mponino tina, ronga ana mponino tina nta mebali'akono ponino tina. »
Dadaano pesuri da nte kadadia
(Mat. 16:2-3; 5:25-26)
54 Koie i Yesus mo'awaakondo miano me'alu, « Kimi ontoo domu hai sumoo'ano oleo, nilakomiumo kanahi, ‹ Dahoo nta usa, › ronga koie biasaamo kadadia. 55 Ronga kimi ontoo mbumburu ngalu salata, nilakomiu kanahi, ‹ Dahoo nta modara oleo, › ronga koie biasaamo kadadia. 56 Comiu miano mompe'anu-anuto'u! Minto'oriomo dadaano pesuri hai langi ronga hai wita'ea, sawali nasami nto'orio peto'ono hapa danta kadadia diekana.
57 Hapa kasami otuhio pantamiu hapa da tekona? 58 Ki daa miano da wawako mekara-kara hai pongadila, pasipolee kami ntepokona koie hai laa sala, kai osie saru wawako hai ra'ino hakim, yahopo koie hakim kai soroakoko hai polisi, kai wisoko koie polisi hai bolo ntorungku. 59 Kupo'awaakoko: Nau tewali meluarako mebinta kokeena, ki sau wada mputa'o doi da tinuntu. »