Pompotisu dadaano amala
(Mat. 6:9-13; 7:7-11)
11
1 Me'asa tempo koie i Yesus dahoo konainoo amala. Sa'arinomo amala, kai kanahi me'asa ana guruno, « Apua, potisukami amala, kana hi ari Yahya potisu'ira ana guruno. »2 Kai lawanihira koie i Yesus, « Kimi daa nta amala, polomo kanahi:
O Tamamami, tereree'omo neemiu,
kahioomo kai leu pomparentaamiu.
3 Poweekami nta mengkinaamami tapio oleo da paraluumami.
4 Ampuniakami'o dosamami,
kana'umpe po'ampunicami pera miano da salakicami,
ronga osie moturusicami kako sinoba-soba. »
5 Yahopo i Yesus kai po'awaakondo, « Kicanano mentonga alo dahoo te'asa miano hai comiu da lako hai laicano simbauno kai kanahi, ‹ Kia, podosaaku isala tetolu boto roti'u. 6 Kana'umpe dahoo simbauku da hai laro lolako'ano tealo hai laicangku, ronga nahina hapa-hapa nta pompetokangku. ›
7 Ronga kicanano koie simbau'u da hai laicano lawanico kanahi, ‹ Osie sodoliaku, ariakumo metampo, ronga mpoturicamimo mpe'o'ana. Naku tule'i me'engka nta moweeko hapa-hapa. › 8 Kupo'awaakokomiu, mau ki sai ehe nta me'engka moweeko ki te'iaasi himi mpetokia, sawali ki tendenomo hiu sadia mo'ita ngkaida'a, yahomo kai lako-lako me'engka moweeko da pino'itau.
9 Nangkuamo koie Kupo'awaakokomiu: mimpo'itamo, dakomiumo nta pinoweehi; po'u'ungkemo, dakomiumo nta mo'awa; pekuntemo, dakomiumo nta inungkahiako wamba. 10 Kana'umpe pera miano da mo'ita nta montarima, ronga pera miano da mo'u'ungke nta mo'awa, naamo pera miano da mekunte nta inungkahiako wamba.
11 Comiu tama ana, ki po'itaicomiu ica anamiu, dakomiu bara nta moweeho ule? 12 Atawa, ki po'ita bio, nta moweeho ngisi molea? 13 Siangkopo comiu da mesipa mosa'o, dakomiumo to'ori nta moweeho anamiu da moico. Menteehakonopo Tamamiu hai suruga! Miano da mo'ita Sangkoleono matantuo dahoo nta weeho. »
I Yesus ronga i Be'elzebul
(Mat. 12:22-30; Mk. 3:22-27)
14 Dahoo me'asa wotu koie i Yesus kai pontila setani da pokomuluo miano. Sapeluarakonomo koie setani, nilakono to'ori mogau koie miano, kando mentekangka miano me'alu. 15 Sawali dahira da kanahi, « Kai pontila setani tendenomo kuasano Be'elzebul ponggawano setani. » 16 Dahira penda da mo'ita peto'o tekangka mebinta hai suruga, nta soba'o.
17 Sawali koie i Yesus nanto'orio da pinekirindo, yahomo kai koharatia, « Pera pomparentaa da tepopobungku dahoo nta hancuru, ronga rapi da sai boboto dahoo nta tekamburako. 18 Hai pomparentaano ponggawano bilisi, kindo dungku mentepopobungku, kana'umpemo kai daasi nta dada'iaa koie pomparentaa? Sawali kanahimiu, da pontilangku setani kuasano i Be'elzebul ponggawano setani. 19 Dadi, kicu pontilaako setani kuasano i Be'elzebul, kuasa hapa pontilando setani ana gurumiu? Nangkuamo koie, iramo danta mokomenteeho tesalamiu himi daa momperahi-rahiakuo. 20 Sawali kicu pontilaako setani kuasano Apu Alla, santo'u-to'uahano, pomparentaano Apu Alla dungkukomiumo.
21 Kicua miano da mokora ronga koa sandatano kai daga'o laicano pantano, dahomo nta ama luwu hapa-hapano. 22 Sawali ki daa miano da moko-mokorapo, kai rumpatio ronga nangio, koie miano dahomo nta rampasio luwu sandata da pinerahi-rahino koie ntei laica, yahopo kai titila'akondo'o anu nirampasino.a
23 Inai da sai meduluaku yahomo balicu, ronga inai da sai mongkompulu merongaaku, iaa da mompokotepoposinca. »
Setani da meluarako mebinta hai miano kai pohule mbule
(Mat. 12:43-45)
24 « Sapeluarakono setani mebinta poo'iahano hai miano, kai sisimbu tadehio lueno papawu mo'u'ungke pekoliano. Sawali nasai po'awa, yahomo kai kanahi, ‹ Nta mohule'aku mbule hai laica pebintaangku. › 25 Lako'omo nde'e, kai dungku awaa koie laica hi mowua ngkinerusi, ronga te'atoro moico. 26 Yahopo kai peluarako montitia opitu setani da sala-salabangupo, kando mpewiso mpoo'ia kokeena. Yahomo kai dompa mosa'o dadaano koie miano ka'iaa isono. »
Inai da konantuara
27 Dahopo koie i Yesus mogau, pogora'omo koie me'asa tina hai tongano miano me'alu kanahi, « Konantuaraa tina da ari bantakomiu ronga da ari susukomiu! »
28 Sawali i Yesus nangkoharatia, « Da kolalo konantuara, yahoo miano da mompodedea haratiano Apu Alla ronga da weweuho. »
Peto'o tekangka nabii Yunus
(Mat. 12:38-42)
29 Dahira ko'ira miano me'alu tondompuruo i Yesus, kai koharatia, « Diekana-kana ko'ira miano da mosa'o dahira mo'ita peto'o tekangka, sawali nando da'a nta pinoweehi, tabeano peto'o tekangka kana da ari dadi hai nabii Yunus. 30 Kana'umpe kanasi nabii Yunus da ari tewali peto'o tekangka hai ira miano Niniwe, kanamo na'ana Ana Nto Manusia nta tewali peto'o tekangka hai ira miano diekana. 31 Ki leu oleo kiama, koie mokole ntinano wonua Arab Salata dahoo nta pinokompewangu merongahira ko'ira miano diekana, kai tuntuhira hindo tesala. Kana'umpe leuhano mebinta hai asa tapuno wita nta mompodedea pompotisuno i Sulaiman da mandara,b ronga santo'u-to'uahano, na'ai dahoo da mokulaloiho i Sulaiman, sawali nasami ehe mompodedea. 32 Oleo kiama, miano kota Niniwe dahira nta mpewangu hai ra'imiu miano diekana kando tuntukomiu himi tesala. Kana'umpe miano Niniwe memanda'iramo hindo pompodedea haratia da nileleakono nabii Yunus,c ronga santo'u-to'uahano, na'ai dahoo da mokulaloiho nabii Yunus, sawali nasami ehe manda. »
Huluno wotolu
33 « Nahina miano da ari montunu hulu, yahopo kai wuniako, atawa sapeo'akono'o be'u, sawali na'ahurako, kando ontoo pera miano da mewiso koie niwincano. 34 Matau yahoo huluno wotoluu. Ki molino matau, upuo wotoluu molinyaaho. Sawali ki mosa'o matau, upu-upuo wotoluu dahoo nta rondoma. 35 Nangkuamo koie, dagai'o koie da molinyaa da nidiou kai osie rondoma. 36 Ki molinyaa upuo wotoluu, ronga ki sai hinamo dahano rondoma, dahomo nta molinyaa upuo, kana ki panarico niwincano hulu da molinyaa. »
I Yesus pasala'ira guru agama ronga miano golonga Farisi
(Mat. 23:1-36; Mk. 12:38-40; Lukas 20:45-47)
37 Sa'arino i Yesus mompotisu, dahoo me'asa miano golonga Farisi da titiaho lako nta tewawe hai laicano. Kai pewiso nde'e koie hai laica, kai totoro tewawe. 38 Koie miano golonga Farisi tekangkaamo hi ontoo i Yesus hi sai uwohio limano hi daa nta tewawe.d
39 Sawali Apu Yesus nangkoharatia, « Comiu miano Farisi molodiu tonde ronga piri te'iaasi hai bungkuno, sawali hai laromiu pono'akoo karukusi ronga sa'o. 40 Hoo, comiu miano mpore! Na'iaa bara Apu Alla da ari weweuho koie da hai bungkuno ronga da ari weweuho da hai larono? 41 Sawali koie ihino piri atawa mangkoona miweehakondo'omo miano ngkadee-dee, kana'umpe kicanamo koie, luwu da da'a hai comiu dahoo nta mowuanoo Apu Alla.
42 Sawali masilakakomiu miano Farisi! Powadakomiumo tila hopuluno mebinta hai pera ponahulie ronga inahu, sawali nasami mpompaduli da mongkote ronga polouno Apu Alla. Santo'u-to'uahano, ko'ira parenta da kontu'uma paraluu'o kami weweuho, ronga meha-mehano na'ana mi'osie limpakio.
43 Masilakakomiu miano Farisi, po'ehemiu totoro'a da te'angga hai laica sambahea'a, ronga hindo sosampotae nte'anggakomiu miano hai tadoha.
44 Masilakakomiu, kana'umpe mina ngkanamo koburu da sai kopeto'o, miano da tealo lolako hai wawono, nahina da to'orio hicua koburu. »
45 Kai saba me'asa koie simbaudo guru agama lawanio kanahi, « O tuangguru, arumai da kanahimiu, dakomiumo itai poko'anu-anukami. »
46 Sawali koie i Yesus namolawani, « Comiu na'amiu yahosi masilaka, comiu guru agama, kana'umpe mina bebeatiakondo'o miano nilemba da sai tinidoondo, mainakaa comiu, nai te'asa wua limamiu da batanihira.
47 Masilakakomiu, kana'umpe dakomiumo mpoweweu koburundo raro nabii, mainakaa raro mbuemiu da ari pepatehira. 48 Kicana koie, menteehanomo hi po'ehemiusi hapa da ari niweweuno pembue'amiu, kana'umpe iramo da ari papatehira ko'ira nabii, ronga comiumo da pule'o koburundo. 49 Nangkuamo koie, tende mandarano Apu Alla kai koharatia, ‹ Dahaku nta montena'akondo nabii ronga rasulu; asa ntilarano ko'ira nabii ronga rasulu dahira nta pinopate ronga pinakasea. › 50 Kai weweuho kana koie Apu Alla, kando nihukuma ko'ira miano diekana tendenomo pera nabii da pinopate, sa'isono da'a die wita'ea, 51 metampu'u i Habel dungku i Zakharia, da mate hai olotano pontompa'a pesomba ronga raha mpesombaa. Deenapo Kupo'awaakokomiu: luwuo koie dahira nta dundunduo ko'ira miano diekana.
52 Masilakakomiu guru agama, kana'umpe comiumo da alaa koie tagilino ponto'ori. Sawali comiu pantamiu nasami da'a mewiso hai larono. Ronga ki daa miano da mokea mewiso, dakomiu totampo'o. »