I Yesus tena'ira pitu pulu ana guruno
10
1 Sa'arino koie, Apu Yesus montisu pitu pulu ana guruno suere, kai tena'ira lako mpe'oru-orua meri'ouhakono koa-koa'o kampo nta dungku'ano. 2 Kai koharatia hai ira, « Molueho pae danta sinangke, sawali miano mpesangki te'ete'o. Nangkuamo koie, mimpo'itamo hai Apuno pae kai pompokoleu miano danta mesangki'akono. 3 Milakomo! Santo'u-to'uahano Kutenakomiu lako kana to'u ana domba hai olotano dahu lampu. 4 Mi'osie mowawa kadu-kadu doi, wonua ngkinaa, atawa sandala, ronga osie mososampotae miano hai laa sala, mau kinai.5 Kimi mpewiso hai laica, mingkanahi meri'ou, ‹ Ehepo kai e'elengua momapu larondo die ihino laica. › 6 Ki daa miano na'ico da ehe kai tarimaa mapuhi, dahoo nta nimapuhi kana da ari kanahimiu. Sawali ki sai hina, koie barakati momapu dahosi nta mohule mbule hai comiu. 7 Mimpoo'iamo koie hai laica, mimpongkaamo ronga mimpondo'umo hapando poweekomiu, kana'umpe miano mpohedo pantasiano kai nigadi. Mi'osie kolinca-linca hai laica suere.
8 Kimi mpewiso hai kampo kami ntinarima, mimpongkaamo ki hapa hindo mpoweekomiu, 9 ronga pokontidohira da memorungku da meda'a na'ico, ronga po'awaakondo kanahi, ‹ Pomparentaano Apu Alla okudahicomiumo. › 10 Sawali kimi sumoo hai kampo kasai hina da tarimakomiu, milakomo hai batatana kami mpekora kanahi, 11 ‹ Mau awuno kampomiu da dodai hai karumami, kotapisio hai ra'imiu.a Sawali kahioomo kami nto'orio, pomparentaano Apu Alla hi okudamo. › 12 Kupo'awaakokomiu: ki leuho oleo kiama, kota Sodom dahoo nta kolalo mobata danta inawano ka'iaa koie kampo. »
I Yesus pasala'o opi-opia kampo
(Mat. 11:20-24)
13 « Taperamiu masilaka miano Khorazim ronga miano Betsaida! Kicanano koie da kadadia ronga tinekangkaakomiu hai kampomiu ari kadadia hai kota Tirus ronga hai Sidon, matantuomo miano kokeena dahiramo mengkau mentoba ronga mpepoe-poe laro. 14 Sawali ki leuho oleo kiama, danta inawando miano Tirus ronga Sidon dahoo nta kolalo mobata ka'iaa danta inawamiu. 15 Ronga comiu miano Kapernaum, dakomiu bara nta tinaarako dungku hai suruga? Nami da'a! Deenapo nta hinawiako hai bolo naraka! »
16 Kai po'awaakondo ana guruno, « Nai-naiho da podedeakomiu, dahomo modedeahaku, ronga nai-naiho da sai ehekomiu, iaa nai eheaku. Ronga da sai eheaku, iaa nai ehee da ari tena'aku. »
Pohule'ando da pitu pulu ana guru
17 Kando pohule ronga memohende ko'ira ana guru da pitu pulu kando kanahi, « O Apua, kako paturu'ira ko'ira setani tendenomo neemiu. »
18 Kai polawanihira i Yesus, « Ariakumo ontoo ponggawano bilisi tuuna mebinta hai langi kana kila. 19 Santo'u-to'uno ariakumo moweekomiu kuasa, kami lesa-lesa'o ule ronga ngisi molea, ronga ta'oo luwu korano pedalu, dungku kasai hina danta mokomasilakakomiu. 20 Mau kicana koie, osie mohende hi nunu'o parentamiu setani, sawali mimohende hina nteburimo neemiu hai suruga. »
I Yesus mohende
(Mat. 11:25-27; 13:16-17)
21 Koiesi tempo na'ana koie i Yesus mohende nangkuasaihomo Sangkoleono Alata'ala, kai koharatia, « O Ama, Apuno langi ronga wita'ea, Kupontarimakasi hai Comiu, kana'umpe luwu die pompotisu aricomiumo wuniakoakondo'o miano mandara ronga miano mponto'ori, sawali Mina mpokomentoda'akondo'o ko'ira miano da sai hina ponto'orindo. O Ama, koiemo da po'ehemiu.
22 Luwuo ariomo Tamangku soroakuo, ronga nai te'asa miano da to'orio inaiho koie Ana ki sa'iaa i Ama, ronga nahina da to'orio inaiho i Ama ki sa'iaa i Ana, ronga miano da po'eheno koie i Ana, da pokomentoda'akondo'omo. »
23 Sa'arino koie, kai pegili i Yesus hai ira ana guruno da mentesinca kai koharatia, « Konantuaraa mata da ontoo hapa da inontomiu. 24 Kupo'awaakokomiu: me'aluo nabii ronga mokole da mokea ontoo hapa da inontomiu, sawali nasando ontoo, ronga mokea modeaho hapa da pinodeamiu, sawali nasando modeaho. »
Miano Samaria da mobuna larono
25 Me'asa tempo kai pentade me'asa guru agama nta soba-soba'o i Yesus kanahi, « O tuangguru, hapa danta niweweungku kaku po'awa tora ngkaidaaha? »
26 Kai polawani i Yesus kanahi, « Hapa da teburi hai Boku Parentano nabii Musa? Kana'umpe pompaha'u? »
27 Kai polawani koie miano kanahi, « ‹ Lou'o Apu Alla Apuu, asa mpelaroau, ronga asa sangkoleou, ronga luwu kamokoraau, ronga luwu ponto'oriu. › Ronga ‹ Lolaroo simbau'u kana tongko wotoluu. › »b
28 Kai polawani koie i Yesus kanahi, « Polawaniu koie tekonaa. Weweuhomo kana koie, dakomo nta tora. »
29 Sawali koie miano namokea mokontekonaa wotoluno, nangkuamo kai petukanaiho i Yesus, « Ronga nai koie simbauku? »
30 Kai polawani i Yesus, « Dahoo me'asa tama da tii mebinta hai Yerusalem me'o'ala hai Yerikho. Dahomo hai tonga sala, kando lawatio parampo, kando alaa pera hapa-hapano ronga pinodaino, kando o'anuo te'ete kai mate, yahopo kando bintaa. 31 Koiesi tempo kai tibo tesaba me'asa pua'ima da tii menunu koie hai bolo sala. Sa'ontoomo koie miano, nilakono tealo melilini hai asa pampa sala. 32 Kanamo na'ana koie miano Lewi saleuno ontoo koie miano, nilakono na'ana tealo melilini hai asa pampa sala.c 33 Yahopo kai leu koie me'asa miano Samaria da konainoo lolako. Sa'ontoo koie miano, kai lolaroo. 34 Nilakono leu waluakono'o belano, hi arimo soloriakono'o mina ronga angguru. Yahopo kai uleaho hai kolodai pe'uleahano, kai wawaa hai laica mpekolia dahano dodonganio.d 35 Sameantano kai poweeho koie apuno laica orua doi kai kanahi, ‹ Dodonganio die miano, ronga ki kolalo pebalanda'u, dahakusi nta popo'euho kicu pohule. ›
36 Nunu'o po'awau, otolu'ira ko'ira miano, naihomo da tewali simbauno koie miano da nirampo? »
37 Polawaniomo koie miano, « Koie miano da mobuna larono kai tulumio. »
Kai tena'o koie i Yesus kanahi, « Lakomo ronga weweuho kana koie. »
I Marta ronga i Maria
38 Laro lolako'ando koie i Yesus ronga ana guruno, kando dungku hai me'asa kampo, dahano me'asa tina da meneehako i Marta, da tarimaa i Yesus hai laicano. 39 Koie i Marta dahoo petilano tina da meneehako i Maria, da totoro okudahio karuno Apu Yesus kai daa modedeaho pompotisuno. 40 Sawali i Marta namarepo'ako kokareho, kai leu hai Yesus kanahi, « O Apua, nami da'a bara padulio, koie petilaku moturusiaku kaku kokareho pantaku? Tena'o kai bantu'aku. »