Lele Mohende da ari pinokodungkuno
Markus
I Yahya pompobaho
(Mat. 3:1-12; Luk. 3:1-18; Yah. 1:19-28)
1
1 Petampu'uno Lele Mohende dadaano i Yesus Kristus Anano Apu Alla 2 kanamo da teburi hai bokuno nabii Yesaya:« Diemo tinenaku da meri'ouhakoko,
nta mompasadia'akoko nta salau. »a
3 « Dahoo miano da mehohou hai tonga lueno papawu kanahi,
‹ Mimpasadia'o nta salano Apu;
mimpokoteakono'o nta tealoano. › »b
4 Kanamo koie kai saba Yahya pompobaho hai tonga lueno papawu moleleako haratia kando memanda miano ronga nibaho kai inampuni sinalakindo. 5 Meleuhiramo miano mebinta upu-upuo wonua Yudea ronga ihino kota Yerusalem tepo'awaakono i Yahya kando me'akui'o dosa sinalakindo yahopo nde'e kando nibaho hai laa e'e Yordan.
6 Pakeano i Yahya yahoo wulu unta ronga sulepeno yo baula,c naamo yo kinaano yahoo kotumba ronga siu inalahi. 7 Diemo da nileleakono, « Danta leu merumbui kolaloo kuasano ka'iaa i'aku; kokou nta huda'o sandalano naku da'a pantasi. 8 I'aku baho'akomiu'o e'e, sawali Iaamo danta baho'akokomiu'o Sangkoleono Alata'ala. »
I Yahya baho'o i Yesus
(Mat. 3:13-17; Luk. 3:21-22; Yah. 1:32-34)
9 Koie tempo leuhomo i Yesus mebinta hai kampo Nazaret wonua Galilea, yahopo Yahya kai baho'o hai laa e'e Yordan. 10 Sapesabahakono mebinta hai bolo e'e, na'ontoo teboa yo langi, yahopo kai tii mewiso'io Sangkoleono Apu kana to'u ticokou. 11 Yahopo kai pinodea haratia mebinta hai suruga kanahi, « Co'omo Anaku da nilouku ronga da inehengku. »
I Yesus sinoba-soba hai lueno papawu
(Mat. 4:1-11; Luk. 4:1-13)
12 Sa'arino koie, nilakono Sangkoleono Apu wowawaa i Yesus hai tongano lueno papawu. 13 Pato pulu oleo mengkauno moo'ia na'ico ronga sinoba-sobaino ponggawano bilisi. Poo'iahomo dahando meda'a kadadi mo'ila, ronga mala'ekati layanio.
I Yesus leu hai Galilea
(Mat. 4:12-17; Luk. 4:14-15)
14 Sa'arino nirako koie Yahya pompobaho, leuhomo nde'e i Yesus hai wonua Galilea moleleako Lele Mohendeno Apu Alla, 15 kanahi, « Dungku'omo tempono, pomparentaano Apu Alla okudaamo. Mimandamo ronga mimparasaeahomo Lele Mohendeno Apu Alla! »
Isono i Yesus moboboi ana guruno
(Mat. 4:18-22; Luk. 5:1-11)
16 Dahomo konainoo lolako koie i Yesus hai wiwi ntahi Galilea, kai ontoo i Simon ronga i Andreas metitilado, da mepuka hai tahi, hinangkua ira papuka ica. 17 Koharatia'omo koie i Yesus, « Mileumo nunu'aku; na'iaamo ica danta inu'ungkemiu, sawali mianomo. » 18 Tade-tadendo bintaa pukado kando nunu'o.
19 Salolakono penda koie i Yesus, kai ontohira Yakobus ronga Yahya metitilado anano Zebedeus da mompokomoico pukado hai bolo bangka. 20 Nilakono boboihira, kando bintaa tamando ronga miano nigadindo hai bolo bangka, kando nunu'o.
I Yesus hai laica sambahea'a hai Kapernaum
(Luk. 4:31-37)
21 Koie i Yesus ronga ana guruno dungku'iramo hai kampo Kapernaum. Kai dungku oleo mpekolia, nilakono mewiso hai laica sambahea'a ronga mompotisu.d 22 Taperando mentekangka hindo podeaho pompotisuno, kana'umpe hi pompotisu kana miano da merongaa kuasa, nai da'a kana guru agamando miano Yahudi hindo pompotisu.
23 Koie tempo dahoo me'asa miano da nilawuino setani hai laica sambahea'a, kai daa mehohou, 24 « O Yesus miano Nazaret, nta hapaicamimo? Daako bara leu nta mokohancurukami? Kuto'oricomo: Co'omo miano ntinindahako da tinenano Apu Alla! »
25 Sawali koie i Yesus nagorasio kanahi, « Pengio! Peluarakomo bintanio koie miano! »
26 Koie setani mokobibi'o koie miano, yahopo kai peluarako mekiali. 27 Luwuo miano da meda'a kokeena taperando mentekangka, kando mpekatuka-tukanai, « Hapa die? Me'asa pompotisu tonia da merongaa kuasa! Mau setani parentahira kando nunu'o kanahino. »
28 Nilakono koie da niweweuno Yesus teleleako dungku hai upu-upuo wonua Galilea.
I Yesus mokontidoo ponino i Petrus ronga suere miano
(Mat. 8:14-17; Luk. 4:38-41)
29 Sapeluarakondo mebinta hai laica sambahea'a, kando lako koie i Yesus, i Yakobus, ronga i Yahya hai laicando i Simon ronga i Andreas. 30 Ponino tina i Simon dahoo leleha moreo, nilakodo mo'awaakono koie i Yesus. 31 Kai leu ungkaario limano ronga mokompe'engka'o. Nilakono ari-ari moreo kai kokarehoakondo.
32 Dahomo kiniwia, sumoo'omo oleo, kando wawaakono'o koie i Yesus pera miano morungku ronga da nilawuino setani. 33 Luwuo miano ihino kampo mentekongkohiramo hai ra'ino laica. 34 Yahopo koie i Yesus kai pokontidohira miano me'alu da rupa-rupa rungkudo, ronga tilahira setani da me'alu. Nai wukahi'ira ko'ira setani mpogau, kana'umpe ndona to'oriomo hicuamo Iaa.
I Yesus moleleako haratiano Apu Alla hai Galilea
(Luk. 4:42-44)
35 Kokomeanta pewanguomo koie i Yesus, kai peluarako mebinta hai laica, kai lako dahano mongio kai amala. 36 Sawali koie i Simon ronga ko'ira simbauno ndona u'ungkeemo. 37 Sando me'awaa nilakodo kanahi, « Luwuo miano dahira me'u'ungkekomiu. »
38 Sawali hina lawanihira, « Tomelakomo hai suere kampo da okuda na'ai, kaku poleleako haratia kokeena, kana'umpe kaku leu nangkuamo koie. »
39 Kai lako hai upu-upuo wonua Galilea, leleako haratiano Apu Alla hai laica sambahea'ando ronga tilahira setani.
I Yesus mompokontido miano da kokulidaa
(Mat. 8:1-4; Luk. 5:12-16)
40 Dahoo me'asa miano da korungku'ako kulidaa da leu hai Yesus. Kai kokolontuu koie miano ronga me'e'eta kanahi, « Kimi ehe, dakomiumo nta mokontidoaku. »
41 Kai lolaroo koie miano, ronga mengkae hedoo kai kanahi, « Po'ehengku. Tidomo! » 42 Koiesi kana kai isa kulidaano, tidoomo. 43 Nilakono koie i Yesus tena'o lako ronga tabe'o, 44 « Osie to'u montulura mau hai nai, te'iaasi lakomo, kai ontoo pua'ima wotoluu hi tidomo ronga powawa pesombau kana petenano nabii Musa hai miano da ari morungku, kai menteendoo miano me'alu hiu tidomo. » e 45 Sawali koie miano nasisimbusi montulura da ari kadadia, nangkuamo kasai lalesa koie i Yesus mewiso mepopo'ontoako hai laro ngkampo. Yahomo kai poo'ia dahano mongio, sawali dahirasi meleu ngkaida'a miano mpebinta hai upu-upuo wonua.