I Yesus mompokontido miano lungkuho
(Mat. 9:1-8; Luk. 5:17-26)
2
1 Sa'arino tealo opia oleo, leuhomo penda Yesus hai kampo Kapernaum kando podeaho leleno hi daamo hai laica. 2 Me'aluomo miano da leu kokeena, dungku kasando mentehido, mau mata wamba pono'o. Yahopo nde'e kai potisu'ira haratiano Apu Alla. 3 Kando leu opi-opia miano mowawaakono me'asa miano lungkuho, da nilembano opaa miano. 4 Sawali nalalo'ea me'alu miano yahomo kasando to'ori okudahio Yesus, kando sabe hai wawo ato kando bolokio taro daahano, yahopo kando ruruhaa koie miano lungkuho meronga empeno.a 5 Sa'ontohiramo ko'ira miano hi owose parasaeando, koharatia'omo koie i Yesus hai miano lungkuho, « O anaku, te'ampuniomo dosau. »6 Sawali opi-opia guru agama da mentotoro kokeena petukanahiramo hai pelaroando, 7 « Yo hapa die miano kai pogau kana arumai? Dahoo paruruo Apu Alla. Inai da tule'i mo'ampuni dosa, saliwano pantano Apu Alla? »
8 Sawali koie i Yesus nanto'orio ihi mpelaroando, yahomo kai koharatia, « Yo hapa kami daa mepekiriako kana koie? 9 Maina da kolalo mobuna: mo'awaakono die miano lungkuho kanahi, ‹ Dosau te'ampuniomo, › atawa kanahi, ‹ Pewangumo kau alaa empeu kau lako ›? 10 Sawali diekana kami nto'orio Ana Nto Manusia hi kuasa mo'ampuni dosa hai wita'ea, dahakumo nta pokomentoda'akomiu'o. » Yahomo kai tena'o koie miano lungkuho, 11 « Kutenako, pewangumo, alaamo empeu kau pohule hai laicau! »
12 Nilakono mewangu koie miano kai alaa empeno, kai peluarako kando daa me'o'ontoo miano me'alu. Nangkuamo kando mebangao luwu miano kando poko'owose'o Apu Alla kanahindo, « Nako paisapo mo'onto da kadadia kana diie! »
I Lewi pontagi sima nunu'o i Yesus
(Mat. 9:9-13; Luk. 5:27-32)
13 Pohule'omo penda koie i Yesus hai wiwi ntahi Galilea, kando leu miano me'alu awaa kai potisu'ira. 14 Dahomo konainoo lolako, kai ontoo i Lewi anano Alfeus, da totoro hai kantori powada'a sima, kai koharatia, « Leumo nunu'aku. » Pewanguomo nde'e i Lewi kai nunu'o.
15 Tempono i Yesus tewawe hai laicano i Lewi, me'aluo miano mpontagi sima ronga miano mosa'o ronga ana guruno mperongaa tewawe. Kana'umpe me'aluhira da nunu'o. 16 Ko'ira guru agamano miano golonga Farisi ontoo i Yesus hi daa tewawe merongahira miano mpontagi sima ronga miano mosa'o bangudo, kando petukanaihira ana guruno, « Yo hapa gurumiu kai daa merongahira tewawe miano mpontagi sima ronga miano maradosa? »b
17 Sapodeaho i Yesus koie ino'awa, kai lawanihira, « Nahina pekonaano dotoro hai miano moroso, te'iaasi hai miano morungku. Kaku naku da'a nta moboboi miano da tekona niweweundo, sawali yahoo miano ngkodosa. »
Dadaano poasa
(Mat. 9:14-17; Luk. 5:33-39)
18 Dahoo me'asa tempo ko'ira ana guruno Yahya pompobaho ronga miano golonga Farisi mempoasa, yahopo kando leu miano mpetukanaiho i Yesus, « Kana'umpe ana guruno Yahya pompobaho ronga ko'ira miano Farisi kando daa mempoasa, sawali ana gurumiu nando da'a poasa? »
19 Kai polawani koie i Yesus kanahi, « Poasaa bara mianoi ndo'ua hi daapo itai tama niwawa? Matantuomo nando da'a nta ehe poasa. 20 Sawali dahoo me'asa tempo dahano nta inala koie tama niwawa, yahopo kando daa nta mempoasa.
21 Nahina miano da montompiliako sibi sawu tonia hai babu morane, kana'umpe dahoo nta tebirungku pontompilino kai hia'o koie babu morane dungku tetiani molue tehia'ano. 22 Kanasi penda, nahina miano da mosali angguru tonia da sai da'apo wuke hai po'uleaha baula mengkau, kana'umpe angguru tonia dahoo nta wotuiho koie po'uleaha, kompura-puraano angguru ronga po'uleahano nta nibasiako. Sawali angguru da tonia nta sinaliano yahoo hai po'uleaha da tonia. »c
Ana guru mpompuruhi wua gandum konaa oleo mpekolia
(Mat. 12:1-8; Luk. 6:1-5)
23 Konaa me'asa oleo, yahoo oleo mpekolia, kai lako koie i Yesus montealohi uma mpae gandum, yahopo ana guruno kando mpompuruhi wua gandum. 24 Kando kanahi ko'ira miano golonga Farisi hai Yesus, « Ontoopo! Yo hapa ana gurumiu kando mpoweweu da upali konaa oleo mpekolia? »d
25 Sawali namolawani kanahi, « Matantuomo aricomiumo basaa hapa da ari niweweuno koie i Daud, tempono mokohuloo ronga ko'ira salakono tendenomo kampurasa ngkinaa, 26 tempono Abyatar tewali pua'ima'ea, kai pewiso i Daud hai laica mpesombaa kai pongkaa koie roti pesomba da upali kai poweehira salakono. Mainapo koie roti nai tewali kinaa tabeano pera pua'ima. »e