I Yesus mompokontido miano konaa oleo mpekolia
(Mat. 12:9-14; Luk. 6:6-11)
3
1 Kai pohule mbule koie i Yesus hai laica sambahea'a, na'ico dahoo me'asa miano da mate asa lima. 2 Kokeena dahira miano da o'ontoo ki daa nta mokontidoo konaa oleo mpekolia, kando to'ori pasala'o.3 Koie i Yesus boboiho koie miano da mate asa lima kanahi, « Na'ai hai ra'i kau leu mentade. » 4 Yahopo kai petukanaihira, « Maina da tewali niweweu konaa oleo mpekolia, da moico atawa da mosa'o, montulumi kai tora atawa mompepate? » Sawali ko'ira miano te'iaasi mpengio. 5 Kai o'ontohira koie i Yesus ko'ira miano da lilicu'o, mosa'onoomo ronga mopoe larono hina motea rapando, kai tena'o koie miano kanahi, « Pengkaemo! » Kai pengkae nde'e, nilakono tido limano. 6 Kando mpeluarako ko'ira miano golonga Farisi, nilakodo mpekosi ronga mianono mokole Herodes nta mempopatee.
I Yesus mompokontido miano me'alu
7 Koie i Yesus ronga ana guruno mpesuahako hai wiwi ntahi, ronga me'alu to'uo miano da nunutako mebinta hai wonua Galilea. Meleuhiramo na'anda miano me'alu mebinta hai wonua Yudea, 8 kota Yerusalem, wonua Idumea, ronga wonua asa poleno laa e'e Yordan, naamo da mpebinta hai wonua Tirus ronga Sidon. Kando meleu hai Yesus hindona mpodeaho pera da niweweuno. 9 Tendenomo name'alu miano, kai tena'ira ana guruno mompasadia'akono bangka kai osie modisi. 10 Tendenomo miano me'alu da ari pinokontidono, yahomo nde'e ko'ira miano morungku kando mpedadarako mokea hedoo. 11 Ko'ira miano da nilawuino setani, sando nte ontoo koie i Yesus, nilakodo medangkawako sudu hai ra'ino kando pehohou kanahi, « Icomiumo Anano Apu Alla. »
12 Sawali koie i Yesus hina ntabe to'uhira kando osie montulura inaiho Iaa.
I Yesus moruruki hopulu orua rasulu
(Mat. 10:1-4; Luk. 6:12-16)
13 Yahopo koie i Yesus kai sabe wawo ngkabumbu, kai kebaihira miano da ineheno, yahopo kando meleu hai Iaa. 14 Kai poruruki da hopulu orua miano da nineehakono rasulu, danta meronga ngkaidaaho, kando tinena moleleako haratia, 15 ronga pinoweehi kuasa montila setani.
16 Diemo neendo da hopulu orua miano da nirurukino: i Simon, da nineehakono Petrus, 17 naamo Yakobus anano Zebedeus ronga Yahya petilano Yakobus (orua'ira nineehakono Boanerges, batuano « anano berese »). 18 Kai tii i Andreas, i Filipus, i Bartolomeus, i Matius, i Tomas, i Yakobus anano Alfeus, i Tadeus, i Simon, miano paratai Zelot,a 19 ronga i Yudas Iskariot da ari soroakondo'o pedaluno i Yesus.
I Yesus pinomperahi-rahiako mompake kuasano i Be'elzebul
(Mat. 12:22-32; Luk. 11:14-23,12:10)
20 Sadungkudomo koie i Yesus hai me'asa laica, kando mentekongko penda miano me'alu dungku i Yesus ronga ana guruno kasando mentepoweweu tewawe. 21 Sando mempodeaho ko'ira petilano, nilakodo meleu nta alaa, hindona mengkanahi, « Molawuomo! »
22 Ko'ira guru agama da mpebinta hai Yerusalem kanahi, « Dahoo mewiso'io i Be'elzebul, ponggawano setani, yahomo da mokongkuasaa montila setani. »
23 Koie i Yesus boboihira miano me'alu kai pomparereakondo kanahi, « Kana'umpemo na'ana setani kai daa nta to'ori tilaa simbauno setani? 24 Ki daa me'asa wonua da tepopobungku pamarentano, koie wonua nai da'a nta ia-iaa, 25 ronga ki daa me'asa rapi da tepopobungku, koie rapi nai da'a nta ia-iaa. 26 Kanamo na'ana koie pomparentaano ponggawano bilisi ki tepopobungku ronga mpedalu, koie pomparentaano nai da'amo nta mengkau kai hancuru. 27 Atawa kana'umpemo miano kai to'ori mewiso hai laicano miano da mokora nta roramba'o inawano, ki sai peri'ou pungoo koie apuno laica? Ki aripo pungoo, yahopo kai purusako pera ihino laica.b
28 Nangkuamo santo'u-to'uahano Kupo'awaakokomiu: Pera sinalakindo miano ronga pompoko'anu-anundo dahoo nta inampuni, 29 sawali miano da mompoko'anu-anu Sangkoleono Alata'ala, nai da'a nta inampuni mokoisoro-soro, kana'umpe dahoo nta rongo'o sinalakino tepoposoro-soro. » 30 Kai kanahi kana koie i Yesus, hindona ngkanahi ko'ira miano dahoo mewiso'io setani.c
Tinano i Yesus ronga raro mpetilano
(Mat. 12:46-50; Luk. 8:19-21)
31 Leuhomo tinano i Yesus ronga raro mpetilano dahiramo mentade hai luara kando pontena miano kebaiho i Yesus. 32 Koie tempo me'aluo miano da mentotoro lilicu'o kando po'awaakono, « Ontoopo, tinamiu ronga raro mpetilamiu dahira hai luara mokea tepo'awaakomiu. »