Dadaano tineposincaako
(Mat. 19:1-12; Luk. 16:18)
10
1 Na'icomo pebintaano koie i Yesus kai lako hai wonua Yudea ronga asa poleno laa e'e Yordan. Kando mentekongko miano me'alu kai potisu'ira kana biasano.2 Kando meleu miano golonga Farisi mpetukana, patudundo nta soba-soba'o, kanahi, « Po'eheno sarano agamanto, tewaliosi bara koie tama kai bintaa samotu'ano? »
3 Sawali koie i Yesus nalawanihira, « Hapa parentano i Musa hai comiu? »
4 Kanahi'iramo, « I Musa palalesaa tama kai poburi sura ntineposinca yahopo kai bintaa samotu'ano. »a
5 Yahopo kai koharatia koie i Yesus, « Tendenomo namokora laromiu, yahomo kai poburiakomiu koie parenta. 6 Kana'umpe isono niweweu wita'ea, Apu Alla weweuhira tama ronga tina,b 7 nangkuamo yo tama kai daa nta bintaa tamano ronga tinano kando boboto samotu'ano, 8 yahopo orua'ira kando tewali asa wotolu.c Dadi, na'iaamo orua miano, sawali me'asamo. 9 Nangkuamo koie, hapa da ari pinokobobotono Apu Alla nai tewali posincaa manusia. »
10 Sadungkunomo hai laica, ko'ira ana guruno mpetukanaihomo mekona da nigauno koie tonia. 11 Yahopo kai koharatia, « Inaiho da bintaa samotu'ano kai pongkawini tina suere, koiemo tama da moweweu ngkabaria hai samotu'ano. 12 Ronga ki daa tina da bintaa samporano kai po'ala tama suere, yahosi na'ana moweweu ngkabaria. »
I Yesus mobarakati ana'ate
(Mat. 19:13-15; Luk. 18:15-17)
13 Yahopo ko'ira miano kando leu hai Yesus mpowawaakono ana'ate kando mpo'ita kai dampasako peleno hai rapando, sawali ko'ira ana guruno ndona awaihira ko'ira miano. 14 Yahopo i Yesus kai koharatia hai ira ana guruno, « Poturusihiramo ko'ira ana'ate kando meleu hai Aku! Mi'osie tabe'ira, kana'umpe miano da kana di'ira ana'ate yahomo danta merapio pomparentaano Apu Alla. 15 Santo'u-to'uahano Kupo'awaakokomiu: Inai da sai lawa'o pomparentaano Apu Alla kana me'asa ana'ate, nai da'a nta mewiso hai larono. » 16 Yahopo kai ampuhira ko'ira ana'ate ronga dampasako peleno hai rapando kai barakati'ira.
Mohalio salama'ano miano ngkawasa
(Mat. 19:16-26; Luk. 18:18-27)
17 Nta lako'omo penda koie i Yesus, kai saba me'asa miano mekalulu hai ra'ino kai kokolontuu kanahi, « O tuangguru da kolaro, hapa ico nta niweweungku kaku po'awa tora ngkaida'a? »
18 Kai polawani i Yesus kanahi, « Yo hapa ona kau neehaku kolaro? Nahina da kolaro te'iaasi Apu Alla. 19 Dakomo to'orio petenano Apu Alla: Osie mompepate, osie meduluakono da sa'iaa samporau, osie mononako, osie mesaksii ngkule, osie me'akala mosa'o, pa'angga'o tamau ronga tinau. »d
20 Kai polawani nde'e koie miano, « Guru, luwuo koide dahakumo nunu'o mebinta sakidihangku. »
21 I Yesus mekakaanio ronga lolaroo kai kanahi, « Te'iaamo me'asa pompokongkoano. Pohulemo, balu'omo pera inawau, doino titila'akondo'o miano ngkadee-dee, dakomo nta mo'awa kawasaa hai suruga. Yahopo kau leu nunu'aku. » 22 Sapodeaho kanahino koie i Yesus, kai morutu ra'ino, kai pohule mopoe larono hina me'alu kawasano.
23 Yahopo i Yesus kai gigili o'ontohira ana guruno kai koharatia, « Mohali to'uo miano ngkawasa nta pewiso'ando hai pomparentaano Apu Alla. »
24 Kando mentekangka nde'e ko'ira ana guruno hindo podeaho ino'awano. Sawali i Yesus nangkanahiako penda, « Raro anaku, taperano mohali nta pewiso'ano miano hai pomparentaano Apu Alla. 25 Mobu-mobunaa yo unta molaahi birino seu, ka'iaa miano ngkawasa nta mewiso hai pomparentaano Apu Alla. »
26 Sateti-tetianindomo nde'e mentekangka kando mpekapetukanai pada-pada i'ira, « Kicana koie, inaihomo nde'e danta pinokosalama? »
27 Kai o'ontohira i Yesus ronga koharatia, « Kicua hai to manusia nai tule'i, sawali nai pengkenaa Apu Alla. Kicua hai Apu Alla nahina da sai tule'i. »
Tilano miano da nunu'o i Yesus
(Mat. 19:27-30; Luk. 18:28-30)
28 Kai kanahi i Petrus hai Yesus, « Mi'ontoopo, kobintaniomo luwu kako nunukomiu. »
29 Kai polawani i Yesus kanahi, « Santo'u-to'uahano Kupo'awaakokomiu: Pera miano da bintaa laicano, petilano tama atawa tina, tinano atawa tamano, raro anano, atawa umano, tendenomo hi nunu'aku ronga parasaeaho Lele Mohende, 30 koie miano diesi kana kai daa nta awaa mbule luku asa etuno: laica, petilano tama, petilano tina, tinano, anano ronga umano, mau melelemboo karasai, dungku oleo merumbui dahoo nta mo'awa tora ngkaidaaha. 31 Sawali me'aluo miano da te'a-te'angga diekana nta tebalia kai tewali da owa-owawa, ronga da owa-owawa diekana dahoo nta tebalia kai tewali da te'a-te'angga. »
Kompentoluno i Yesus tuluraa nta karasaino
(Mat. 20:17-19; Luk. 18:31-34)
32 Dahiramo nde'e mpetongano sala nta sabe hai Yerusalem, i Yesus da meri'ouhakondo, kando mentemia-mia ana guruno, ronga pera da mperumbui momee'iramo na'anda. Kai boboihira penda ana guruno da hopulu orua kai po'awaakondo ki hapa danta dadi hai wotoluno kanahi, 33 « Diekana dakita sabe hai Yerusalem. Kokeenamo Ana Nto Manusia dahano nta sinoro hai ira kapala pua'ima ronga guru agama, ronga dahanomo inotuhi nta nimateakono. Dahanomo nta sinoro hai miano suku suere. 34 Dahandomo nta poko'anu-anuo, me'o'oniuho, rorasaiho, kando popatee. Sawali nta itolusi kai pewangu mbule. »
Pino'itano Yakobus ronga Yahya
(Mat. 20:20-28)
35 Yahopo i Yakobus ronga Yahya anano Zebedeus kando leu hai Yesus kanahi, « O tuangguru, mokeakami kami nunu'o da pino'itamami. »
36 Kai petukanaihira, « Hapa ona da po'ehemiu kaku weweuhakomiu'o? »
37 Kando polawani, « Mimpalalesakami kako totoro me'asa hai muanamiu ronga me'asa hai suwamiu, kato itai pinoko'owose. »
38 Sawali polawanino koie i Yesus kanahi, « Nami da'a to'orio da pino'itamiu. Tule'icomiu bara mondo'u hai pondo'ua ngkarasai danta nindo'ungku atawa tule'icomiusi bara nibaho kana nta pebahoku? »
39 Kando mpolawani, « Tule'icami. »
Kai koharatia i Yesus, « Menonaa, dakomiu ico nta mondo'u hai pondo'uangku ronga nta nibaho kana-kana nta pebahoku. 40 Sawali nta totoro hai muanangku atawa hai suwangku, naku tule'i nta mompoweehiako. Koide nta tarondo miano da ari pinasadia'ako. »
41 Sando podeaho ko'ira ana guruno da hopulu, nilakodo mosa'o larondo hai Yakobus ronga hai Yahya. 42 Sawali koie i Yesus naboboihira luwundo kai koharatia, « Dakomiumo to'orio, miano da ni'angga kana mokoleno suku suere kuasai to'uhira mianono ronga ko'ira ponggawa mokoraa pomparentando. 43 Sawali comiu nai tewali kana koie. Deenapo inai da mokea owose hai comiu, kahioomo kai tewali sangkinaamiu, 44 ronga inai da mokea te'a-te'angga, kahioomo kai tewali atano pera miano. 45 Kana'umpe Ana Nto Manusia nai da'a leu kai kosangkinaa, sawali kai tesangkinaa, ronga kai soroo penaano nta pohudano miano me'alu mebinta hai sinalakindo. »
I Yesus mokongko'ontoo i Bartimeus
(Mat. 20:29-34; Luk. 18:35-43)
46 Medungku'iramo koie i Yesus ronga ana guruno hai kota Yerikho. Sapeluarakondo mebinta hai Yerikho, dahiramo mperonga miano me'alu. Koie hai wiwi sala dahomo totoro miano mpo'ita-ita da mopusu da meneehako Bartimeus anano Timeus. 47 Sapodeaho hinangkua i Yesus miano Nazaret da tealo namehohouho, « O Yesus, leeno i Daud, Milolaroaku! »e
48 Me'aluo miano da i'ireiho ronga tena'o kai pengio, sawali sapeko-pekoranomo mehohou, « O leeno i Daud, Milolaroaku! »
49 Kai todo koie i Yesus kai koharatia, « Boboihomo koie miano! »
Kando boboiho koie miano mopusu ronga kanahi, « Pokorodoo larou, pentademo, dahomo boboico. »
50 Kai luuhio babu mentiino kai lumoso mentade leu hai Yesus.
51 Koie i Yesus metukanaiho, « Hapa da po'eheu kaku weweuhakoko'o? »
Kanahiomo koie da mopusu, « O tuangguru, mokeahaku ko'onto! »
52 Kai lawanio kanahi, « Lakomo, parasaeau da mokontidoko! » Koiesi kana-kana kai ko'onto, kai perumbui nunu'o i Yesus.