I Yesus nilawati hai Yerusalem
(Mat. 21:1-11; Luk. 19:28-40; Yah. 12:12-19)
11
1 Sadungkudo koie i Yesus ronga ana guruno hai kampo Betfage ronga Betania pu'u ntangkeno Zaitun okudahio Yerusalem, kokeenamo pontena'ano orua ana guruno lako teperi'ou kanahi, 2 « Milakomo hai kampo da nirora'into, satelaroakomiu na'ico, dakomiumo nta awaa me'asa ana ngkolodai da tekoo, da sai paisapo pine'uleahino miano. Miwuwuomo ulano kami wawaa na'ai. 3 Ki daa miano da metukana hapa kami daa wuwuhio, mimpolomo lawanio, ‹ Apu da paraluukio, dahosi nta oru mokompohule'o na'ai. › »4 Kando lako nde'e kando ontoo koie ana ngkolodai da tekoo hai ra'i laica hai pampa sala, kando wuwuhio nde'e. 5 Ko'ira miano da mpentade na'ico mpetukanahiramo, « Hapa patudumiu kami daa wuwuhio koie ana ngkolodai? »
6 Kando mempolawani kana-kana da ari petenano i Yesus; kando poturusihira nde'e kando melako. 7 Kando wawaakono'o i Yesus koie ana ngkolodai, kando lapa'akono'o pakeado, kai pe'ulea nde'e i Yesus. 8 Me'aluo miano da woleako pakeado hai wawo batatana, ronga penda me'aluo da mpolotuki rumpa mebinta hai tonga uma, kando rambahako hai bolo sala.a 9 Ko'ira miano da mperi'ouhakono i Yesus ronga da mperumbuihakono mempogora'iramo kando daa kanahi,
« Sombakomiu Apua!
Nibarakati'o miano da leuhako neeno Apu!b
10 Ntaperano kobarakati pomparentaa danta leu, pomparentaano mbueto i Daud!
Sombaa Apu da hai montoehano! »
11 Sadungkunomo hai Yerusalem, kai sumoo hai uluano raha mpesombaa ronga o'ontoo pera hapa da da'a na'ico. Sawali nangkiniwiamo, peluarakoomo kai lako hai Betania meronga ana guruno da hopulu orua.
I Yesus montundari keu ara
(Mat. 21:18-19)
12 Sameantano kando melolako bintanio Betania, kai mokohuloo koie i Yesus. 13 Dahopo mentala kai ontoo asa keu ara da koririmo,c dadi lako'omo ontoo ki daa kowua, sawali kai dungku ontoo nahina wuano, te'iaasi ririno, kana'umpe na'iaapo wotu ngkowua'ano. 14 Kai anuo koie keu kanahi, « Kahioomo kai osie te'asa miano da mongkaa wua'u dungku samengka-mengkauno! » Ronga ko'ira ana guruno dahirasi modeaho da kanahino.
I Yesus mokowuaho raha mpesombaa
(Mat. 21:12-17; Luk. 19:45-48; Yah. 2:13-22)
15 Sadungkudomo nde'e koie i Yesus ronga ana guruno hai Yerusalem, kai telaroako hai uluano raha mpesombaa, kai petampu'u saarihira miano da mpobalu ronga da mpo'oli kokeena. Kai bantule'o ko'ira meda mpontuka'ando doi ronga totoro'ando mpobalu ticokou. 16 Ronga nai wukahio miano tealo mowawa hapa-hapa hai uluano raha mpesombaa. 17 Kai potisu'ira kanahi, « Nai da'a bara teburi hai Boku Haratiano Apu Alla kanahi, ‹ Rahangku nta neeno yahoo laica amalaando luwu suku ›? Sawali icomiu mina weweuho poo'iahando parampo. »d
18 Sando podeaho ko'ira kapala pua'ima ronga guru agama da niweweuno i Yesus, nilakodo mpo'u'ungke sala kando to'ori pepatee; luwuo miano me'alu podo tekangkaako pompotisuno, nangkuamo kando momeetako.
19 Sakiniwianomo, i Yesus ronga ana guruno kando mpeluarako bintanio koie kota.
Pompotisu mebinta hai keu ara
(Mat. 21:20-22)
20 Koie dumondo tealoomo i Yesus ronga ana guruno kando ontoo koie keu ara hi matemo dungku hai hakano. 21 Nilakono koie i Petrus mokopehawa'o kai kanahi, « O tuangguru, Mi'ontoopo, koie keu ara da ari tinundarimiu moleuhomo. »
22 Kai lawanihira ana guruno, « Mimparasaeaho Apu Alla! 23 Santo'u-to'uahano Kupo'awaakokomiu: Ki daa miano da tena'o koie tangkeno kai polinca tehawiako hai bolo ntahi, dahoo nta menona dadi, asala ki sai da'asi bata-bata larono, te'iaasi parasaea to'u hapa da kanahino dahoo nta dadi. 24 Nangkuamo Kupo'awaakokomiu: pera amalamiu ronga pino'itamiu, parasaeamo himi arimo pinoweehi, matantuomo dakomiu nta awaa.
25 Ronga kimi daa mpentade nta amala kami mpokopehawa'o ki daa miano da salakicomiu, mi'ampunio meri'ou, kai to'ori saru Tamamiu hai suruga ampunicomiu na'amiu. [ 26 Sawali ki sami ampunio suere miano, Tamamiu hai suruga nai da'a nta ampunio sinalakimiu.] »
Petukana pebintaano kuasano i Yesus
(Mat. 21:23-27; Luk. 20:1-8)
27 Kando meleu mbule i Yesus ronga ana guruno hai Yerusalem. Dahomo kontade-tade hai uluano raha mpesombaa, kando meleu awaa ko'ira kapala pua'ima, guru agama, ronga kamotu'ano miano Yahudi, 28 kando mpetukanaiho, « Kuasano inai kami ntule'i moweweu ko'ira luwu? Inai da moweekomiu koie kuasa? »
29 Kai polawani nde'e koie i Yesus kanahi, « Dahaku na'angku nta mosabahako te'asa petukanangku hai comiu. Kimi lawaniakusi yahopo kaku daa nta pokomenteehakomiu'o na'angku inaiho da ari moweehaku koie kuasa. 30 Inaiho da tena'o i Yahya kai pobaho? Apuno suruga atawa manusia? Ndoka milawaniaku. »
31 Yahopo nde'e kando mpekapetukanai kanahi, « Kito kanahi, ‹ Apuno suruga, › dahoo nta kanahi, ‹ Yo hapa kasami ehe parasaeaho? › 32 Sawali mohalintoo nta kanahi, ‹ Manusia. › » Hindona momeetako miano me'alu, kana'umpe luwu miano po'anggado koie i Yahya yahoo me'asa nabii. 33 Dadi, ndolawaniomo koie i Yesus, « Nako da'a to'orio. »
Kai lawanihira kanahi, « Kicana koie, naku da'a na'angku nta mo'awaakomiu inaiho da ari moweehaku kuasa kaku to'ori hedoo koie da niweweungku. »