Parereno miano mpohedo hai uma angguru
(Mat. 21:33-46; Luk. 20:9-19)
12
1 Kai petampu'u koie i Yesus momparereakondo kanahi, « Dahoo me'asa miano da mombulaiho umano angguru, yahopo kai walaa kai tomu, ronga mongkekei bolo pompio'ano wua angguru, yahopo penda kai powangu olompu mpodaga'a da montoe. Sa'arino koie kai pasewaa hai ira miano da biasa mpe'uma angguru, yahopo nde'e kai lako hai suere wonua. 2 Saleuho wula mpe'upuiha angguru, namontena'o me'asa sangkinaano kai lako hai ira miano da hedoo koie uma tarimaakono'o tila angguruno. 3 Sawali ndona lawa rako'o koie da tinena, kando langkuiho yahopo kando tena'o mohule mpena. 4 Yahopo penda koie ntei uma kai pontena suere sangkinaano, sawali ndona lawa wangkulio rapano ronga koko'anuiho. 5 Kai pontena penda suere sangkinaano, sawali ndona lawa pepatee. Kanamo koie poweweundo pera sangkinaano da leu mperumbui; dahoo da nilangku, dahoo da pinopate.6 Diekana te'iaamo tongko anano da pine'o'oloino, perumbuino tena'omo anano kanahino, ‹ Dahiramo nta pa'angga'o anaku. › 7 Sawali ndona pada mengkanahi, ‹ Koiemo nta tewali apuno, tompepateemo kato alaa wita nta tilarino. › 8 Kando merako'o koie anano, kando pepatee ronga hawiako hai bungku wala. »
9 Yahopo koie i Yesus kai petukana, « Diekana kana'umpemo nta niweweuno koie apuno uma? Dahoo nta leu pepatehira ko'ira da mpohedo, ronga koie uma dahoo nta pasewaa hai suere miano.a 10 Nami mpaisapo bara basaa da teburi hai Boku Haratiano Apu Alla:
‹ Watu da ari hinawiakondo tuka,
tewaliomo watu mpompu'ui.
11 Yahomo da ineheno Apu Alla,
nangkuamo kai tekangkaako matanto. › »b
12 Kando mpo'u'ungke akala ko'ira ponggawando miano Yahudi nta rako'o koie i Yesus, kana'umpe ndoto'oriomo hicua ira da kinonano koie parere. Sawali ndona momeetakohira miano me'alu, nangkuamo kando melako bintaa.
Dadaano mowada sima hai pamarenta mokole'eano Roma
(Mat. 22:15-22; Luk. 20:20-26)
13 Dahoo opia miano golonga Farisi ronga da meduluo i Herodes da tinena akala'akono'o petukana ki ehe i Yesus sala mpogau'a. 14 Yahopo kando meleu hai Iaa kando mpetukana kanahi, « O tuangguru, koto'oriosi himi mongkote ronga hi sami pompaduli atawa meruruki miano. Menonaamo pompotisumiu miano kando nunu'o po'eheno Apu Alla. Ndoka mimpo'awaakami ki tewalisi bara mowada sima hai mokole'eano Roma atawa nai tewali. Paraluu'o bara kato powada atawa osiemo? »
15 Sawali koie i Yesus hina nto'orio akala mosa'ondo, kai koharatia, « Hapa kami daa soba-soba'aku? Ndoka wawaakuo na'ai koie te'asa doi pera kaku ontoo. »
16 Kando wawaakono'o nde'e koie doi pera, kai petukanaihira koie i Yesus kanahi, « Gambarano inai ronga inai neeno da teburi die hai doi? »
Polawanihiramo, « Gambarano ronga neeno mokole'eano Roma. »
17 Koharatia'omo koie i Yesus, « Miweehakono'o anuno mokole'ea, ronga miweehakono'o na'ana tarono Apu Alla. » Nilakodo mentekangka'ea hindo podeaho.
Miano golonga Saduki metukanaako pewanguando miano mate
(Mat. 22:23-33; Luk. 20:27-40)
18 Kando meleu opi-opia miano golonga Saduki hai Yesus da sai akui'o hindo mpewangu miano mate. Kando petukanaiho kanahi, 19 « O tuangguru, pompotisuno i Musa teburi kana die: Ki tibo tama mate nahina anano, petilano paraluu'o kai kawinio waluno kai to'ori da'a leeno koie petilano da mate.c 20 Dahira opitu tama mpetitilado; da tetukaka meri'ou mesinca, dungku kai mate nahina anano. 21 Yahopo koie da ko'orua kawinio; sawali dungku kai mate na'ana nahinasi anano. Kanasi penda na'ana petilano ko'otolu. 22 Kanamo koie dungku ko'opituhira mpetila, nahina te'asa da mo'awa ana kando memate mponoha. Kompura-puraano kai mate na'ana koie tina. 23 Ki dungkumo oleo mpewanguando miano mate, inaihomo nde'e nta samporano koie tina, kana'umpe opituhira mpetila arihira mpesamporaakono? »
24 Kai lawanihira koie i Yesus kanahi, « Taperamiu tesala, nasami nto'orio haratiano Apu Alla ronga kuasano. 25 Kana'umpe ki pewangumo ko'ira miano mate, nahinamo danta kawi atawa pinakawi, sawali nta tora kana mala'ekati hai suruga. 26 Ronga dadaando miano mate kindo mpewangu, nami da'a bara paisa basaa ihi bokuno nabii Musa, tulurano langa api hai tonga ngkeu ngkoriu, kai koharatia Apu Alla, ‹ I'akumo die Apu Alla Apuno i Ibrahim, Apuno i Ishak, ronga Apuno i Yakub ›? 27 Apu Alla na'iaa Apuno miano mate, sawali yahoo Apuno miano ntora. Ntaperamiu mentesala. »d
Parenta da kontu'uma
(Mat. 22:34-40; Luk. 10:25-28)
28 Kai leu koie me'asa guru agama hi podeahira koie i Yesus ronga ko'ira miano golonga Saduki daa mpekakahi, nanto'orio koie polawanino i Yesus hi tekona, kai petukana kanahi, « Parenta hapa da kontu'uma? »
29 Koie i Yesus molawani, « Parenta da kontu'uma yahoo: Hoo miano Israil, mimpodedeaho, Apu Alla Apunto te'iaasi me'asa! 30 Lou'o Apu Alla Apuu, asa mpelaroau, ronga asa sangkoleou, ronga pera ponto'oriu, ronga pera kamokorau.e 31 Parenta ko'orua yahoo: Lolaroo simbau'u kana tongko wotoluu. Nahina parenta da kontu'uma saliwano die da orua parenta. »f
32 Kanahiomo nde'e koie guru agama hai Yesus, « Tekona to'uo, guru. Menonaa koie da kanahimiu, Apu te'iaasi me'asa, nahina meha te'iaasi Iaa. 33 Naamo lou'o asa mpelaroahau, ronga pera ponto'oriu, ronga pera kamokorau, ronga lolaroo simbau'u kana wotoluu, koiemo da kontu'uma ka'iaa pera pesomba ntinunu ronga pesomba meha-mehano. »
34 Sa'ontoo koie i Yesus hi polawani koie guru agama hina ntekona, namo'awaakono kanahi, « Nau da'amo mentala mebinta hai pomparentaano Apu Alla. »
Nahinamo nde'e te'asa miano da moseka metukanaiho penda.
Kana'umpe kando pekoe i Yesus ronga i Daud
(Mat. 22:41-46; Luk. 20:41-44)
35 Dahomo konainoo koie i Yesus motisu'ira hai uluano raha mpesombaa kai petukana kanahi, « Kana'umpe ko'ira guru agama kando mengkanahi Mokole Pompokosalama hicua leeno i Daud? 36 Koie nabii Daud pantano da kinuasanino Sangkoleono Alata'ala kanahi, ‹ Apu Alla koharatia hai Apungku: Totoromo hai muanangku, dungku pera bali'u Kudiohira hai tonto karu'u. ›g 37 Mau i Daud pantano neehakono'o Apuno, kana'umpemo kaicuasi penda leeno? »
Ko'ira miano da me'alu to'u sanaa'o larondo podedeaho i Yesus.
Oliwino i Yesus kando mpedagai hai guru agama
(Mat. 23:5-7; Luk. 20:45-47)
38 Dahomo konainoo motisu'ira kai kanahi, « Mimpedagai hai ira guru agama, da mehawado mpebabu mentii kando mengkolako-lako hai tadoha kai sosampotae nte'angga'irasi miano. 39 Mehawado totoro hai totoro'a da te'a-te'angga hai laica sambahea'a ronga totoro'a da moico hai ndo'ua. 40 Mehawado pokomporehira ntina walu kando alaakondo'o laicando, ronga me'amala mentaa podampondo niweweu mosa'ondo. Yahomo kai daa nta kolalo mobea hukumando. »
Pesombano me'asa ntina walu ngkadee-dee
(Luk. 21:1-4)
41 Dahomo koie i Yesus konainoo tepora'iakono poti mpedoromaa'a hai uluano raha mpesombaa, kai daa o'ontohira miano da mpedoromaa koie hai poti. Me'aluo miano ngkawasa da medoromaa me'alu. 42 Kai leu na'ana koie me'asa ntina walu ngkadee-dee mowiso pedoromaano rua doi tambaga da okidi to'u, nai koa asa doi anggano. 43 Kai boboihira ana guruno ronga koharatia, « Santo'u-to'uahano Kupo'awaakokomiu: Luwu miano da ari medoromaa, koiemo ntina walu ngkadee-dee da me'a-me'alu pedoromaano. 44 Kana'umpe di'ira miano mpedoromaa'ako tora pebalandado, sawali koie ntina walu, mau ki kadee-dee, medoromaa'ako luwuo da nidiono ronga danta tinoraakono. »