Nta nirowakiano raha mpesombaa
(Mat. 24:1-2; Luk. 21:5-6)
13
1 Tempono i Yesus meluarako bintaa uluano raha mpesombaa, kai kanahi koie me'asa ana guruno, « O tuangguru, Mi'ontoopo taperano moico ko'ira laica ronga watuno! »2 Kai polawani, « Ko'ira laica da owose da inontomiu, nahina te'asa watu danta tesusu hai wawo sawatuno; luwuo dahoo nta nirowaki. »
Petampu'uano karasai
(Mat. 24:3-14; Luk. 21:7-19)
3 Dahomo koie i Yesus totoro hai wawo ngkabumbu Zaitun rora'io raha mpesombaa, yahopo i Petrus, i Yakobus, i Yahya, ronga i Andreas kando mpetukanai ntesincaa kanahi, 4 « Mimpo'awaakami ki impia nta kadadiahano, ronga hapa peto'ono ki daamo nta dungku'o tempono. »
5 Yahopo koie i Yesus kai petampu'u mo'awaakondo, « Mimpedagai kai osie da'a miano da pokomporekomiu. 6 Dahira miano me'alu danta leu mperumbui, danta meneehako neengku kanahi, ‹ I'akumo die Mokole Pompokosalama, › ronga mokomporehira miano da me'alu. 7 Ronga kimi mpodeaho gorano mamusua ronga leleno, mi'osie momee. Luwuo koie dahoo nta kadadia, sawali na'iaapo oleo kiama'a. 8 Me'asa wonua nta mamusu bali'o da me'asa wonua, ronga pada-pada mokole nta mpedaluhiramo. Me'aluo wonua danta konaa lelu wita rongapo murota. Luwuo koie te'iaapo tampu'uno karasai, kana me'asa tina da metampu'u dedea ntia nta mompokohina.
9 Sawali comiu diie mimpedagai! Dakomiu nta niwawa hai ra'ino pongadila ronga dakomiu nta nilangkui hai bolo laica sambahea'a, ronga dakomiu nta sinisinta hai ra'indo pamarenta ronga raro mokole, tendenomo himi nunu'aku. Koiemo tempono dahamiu nta saksii'aku. 10 Ronga koie Lele Mohende paraluu'o kai nileleako meri'ou hai upu-upuo suku. 11 Ronga kindo wawakomiu kando sorokomiu hai pongadila, mi'osie tewereako hapa danta nigaumiu, sawali hapa da po'awamiu koie tempo mi'o'awaamo, kana'umpe danta kanahimiu na'iaa mebinta hai comiu sawali mebinta hai Sangkoleono Alata'ala.
12 Dahoo nta da'a miano da ehe soroo petilano kai pinepate. Kanapo na'ana me'asa tama nta soroo anano kai pinopate. Ronga dahira anadalo nta ta'oo miano motu'ando ronga sorohira kando pinopate. 13 Dahira nta kokoleakomiu luwu miano tendenomo neengku. Sawali inai da sabara montinei karasai dungku kompura-puraano, koiemo danta pinokosalama. »
Karasai mobea ronga kanabi-nabii
(Mat. 24:15-28; Luk. 21:20-24)
14 Kai koharatia penda i Yesus, « Me'asa oleo dakomiu nta ontoo pososa'o da mowuwusei da mentade dahano da sai tewali (kahioomo pera da mobasa die boku kai paha'o batuano).a Koie wotu kahioomo miano da meda'a hai wonua Yudea kando mpolai hai tangkeno. 15 Miano da hai landa-landano laicab osiemo mewiso hai bolo laica nta mo'ala hapa-hapano, 16 ronga miano da da'a hai uma, osiemo mohule mo'ala pinodaino. 17 Taperando nta marasai koie tempo tina da mentia ronga da mpetesusu. 18 Mi'amala kai osie kadadia konaa wula mokoseoha, 19 kana'umpe koie tempo dahoo nta dadi karasai da sai paisapo dadi sa'isono Apu Alla padadio die wita'ea dungku diekana-kana, ronga nai da'amo nta paisa kadadia pendua. 20 Ki sai da'a Apu moko'ongkundaa tempono, te'asapo miano nahina danta salama. Sawali tendenomo umati nirurukino, yahomo kai poko'ongkundaa koie tempo.
21 Koie tempo ki daa miano da kanahi, ‹ Ontoopo, Mokole Pompokosalama dahoo diceena, › atawa da kanahi, ‹ Ontoopo, dahoo pekeena! › osie parasaea. 22 Kana'umpe dahira nta mesaba kaguru-gurusalama ronga kanabi-nabii. Dahira nta mompokoda'a peto'o ronga tinekangkaako, patudundo kindo daa nta tule'i, kando pokomporee umati nirurukino Apu Alla. 23 Sawali icomiu, midagai'o, kana'umpe die luwu ariakumo mo'awaakomiu meri'ou. »
Nta leuhano Ana Nto Manusia
(Mat. 24:29-36; Luk. 21:25-33)
24 « Koie tempo ki arimo tealo karasai, oleo dahoo nta rondoma ronga wotiti nai da'amo nta koniwinca. 25 Ronga olimpopo dahira nta mentutuuna mebinta hai langi, ronga ko'ira apuno laamoa dahira nta molelu. 26 Koie tempo dahiramo nta ontoo Ana Nto Manusia leu metongoako seru ronga kuasano naamo tereree'ano da owose.c
27 Koiesi tempo kai tena'ira mala'ekatino lako kongkosakohira miano nirurukino mebinta hai ko'opaa matano ngalu, mebinta asa tapuno wita dungku tapuno langi.
28 Po'alamo pompotisu mebinta hai keu ara: Samo'usono sampano ronga montampu'u koriri, minto'oriomo hi okudamo wula modaraano oleo.d 29 Kanamo koie na'ana, kimi ontoo ko'ira da kadadia, minto'oriomo hi okudamo tempono, hi daamo hai mata wamba. 30 Santo'u-to'uahano Kupo'awaakokomiu: Di'ira miano da tora diekana nando da'apo nta mate luwu, ki sai ari luwu koie kadadia. 31 Langi ronga wita'ea dahoo nta isa, sawali haratiaku nai da'a nta paisa isa.
32 Nahina te'asa miano da to'orio oleono ronga wotuno, pera mala'ekati hai suruga ronga Ana Nto Manusia nahina da to'orio, tabeano pantano Tamangku. »
Oliwi mpedagai
(Mat. 24:36-44)
33 « Mi'olokaa ronga mimpedagai, nasami da'a to'orio wotu nta kadadiahano. 34 Dadaano nta leuhangku kanamo miano danta lako hai wonua suere, bintanio laicano kai tena'ira sangkinaano kando pasipoleakono'o laicano, ronga titila'ira pohedoa tee'asa miano, ronga tena'o koie da modaga pinewamba kai pedagai. 35 Nangkuamo koie, mimpedagai to'u, kana'umpe nasami da'a to'orio impia nta pohule'ano koie apuno laica, mompu'u malo atawa mentonga alo, kokomeanta atawa dumondo'ea. 36 Kana'umpe ki tibo-tibono leu kau osie niroda hiu daa moturi. 37 Da kanahincu hai comiu pengkenaa da kanahincu hai luwu miano: mimpedagai! »