9
1 Kai koharatia i Yesus, « Santo'u-to'uahano Kupo'awaakokomiu: Dahira miano da meda'a na'ai da sai da'apo nta mate, ki sando ari me'ontoo pomparentaano Apu Alla hi leumo ronga kuasano. »I Yesus pinoko'owose hai wawo ntangkeno
(Mat. 17:1-13; Luk. 9:28-36)
2 Sa'arino onoo oleo, koie i Yesus wawahiramo Petrus, Yakobus, ronga Yahya kando melako mpesisinca hai me'asa tangkeno da montoe. Kando ontoo koie ra'ino i Yesus hi teboli'imo, 3 ronga pakeano mopila nggela kai menggiri. Nai te'asa miano tumpu mpontatapi die hai wita'ea danta tule'i montatapi kai kana mopilano. 4 Kando ontoo koie i Yesus hindo daamo mpogau nabii Elia ronga nabii Musa.
5 Kanahiomo koie i Petrus hai Yesus, « O tuangguru, moico to'uo kito meda'a na'ai. Dahoo nta moico kico mpoweweu te'otolu mboru-mboru: me'asa taromiu, me'asa tarono nabii Musa, ronga me'asa penda tarono nabii Elia. » 6 Kai kanahi kana koie i Petrus, nasai to'orio hapa nta kanahino, kana'umpe otolu'ira ko'ira ana guruno taperando momee.
7 Kai tudu tongohira seru, ronga koie hai bolo seru dahandomo modeaho suara da kanahi, « Diemo Anaku da nilouku, mimpodedeaho! » 8 Kando kolihe-lihe hai pampando hi tibono sai hina miano da inontondo, te'iaamo pantano i Yesus. 9 Dahiramo mponguli mebinta hai tangkeno, koie i Yesus mokompehawa'ira kando osie montuluraakondo, mau hai te'asapo miano, hapa da ari inontondo, dungku kai pewangu Ana Nto Manusia mebinta hai matea.
10 Koie petabe ndonunu'omo, sawali dahirasi mpekapetukanai hapa batuano « mewangu mebinta hai matea ». 11 Yahopo kando mpetukanaiho i Yesus kanahi, « Yo hapa kando kanahi raro guru agama hicua nabii Elia danta leu meri'ou? »a
12 Polawaniomo nde'e, « Menonaa, dahoo nta leu i Elia meri'ou kai pokomoicoo pera luwu. Sawali kana'umpe patuduno da teburi mekona Ana Nto Manusia, hi daa nta mo'awa karasai mobea ronga pinoko'anu-anu? 13 Sawali Kupo'awaakokomiu, koie i Elia ariomo leu. Malengu da ari poweweundo iaa, nunu'o kana da ari teburi danta inawanomo. »b
I Yesus mompokontido anadalo da nilawuino setani
(Mat. 17:14-21; Luk. 9:37-43a)
14 Tempondo i Yesus ronga ana guruno da otolu dungku dahando ko'ira ana guruno meha, kando ontohiramo miano me'alu da lilicu'ira ko'ira ana guru ronga opi-opia guru agama dahira mpegagahi. 15 Sando me'ontoo koie i Yesus taperando bangao luwu miano me'alu kando mentekara-karai lako lawa'o. 16 Kai petukanaihira, « Hapa da mpinegagahiakomiu ronga ko'ira guru agama? »
17 Koie me'asa miano molawaniakondo, « O tuangguru, dahaku wawaakomiu'o anaku da mulu tendenomo nilawuino setani. 18 Santerongko'o lawuno, petotampelakoomo hai wita kai bubura ngangano, kai pokoki'o bakano ronga sincoraka wotoluno. Ariakumo me'e'etahira ana gurumiu kando tilaa koie setani, sawali nasando tule'i. »
19 Kai polawani koie i Yesus, « Hoo comiu miano diekana da sai memparasaea, dahopo bara mengkau nta mperonganto? Dahopo bara mengkau Kusabaraakokomiu? Wawaamo koie ana'u na'ai! »
20 Kando mewawaakono'o nde'e koie anadalo. Tempono koie setani ontoo i Yesus, tade-tadeno pokobibi'o wotoluno koie anadalo, kai tetampelako hai wawo wita kai bobale ronga bubura ngangano. 21 Yahopo i Yesus kai petukanaiho koie tamano anadalo, « Impiahomo nde'e koie anadalo nilawuino setani? »
Kai polawani kanahi, « Mebinta sakidihano. 22 Ronga manturu'omo koie setani nte lawuiho kai nte tebasiako hai bolo api ronga bolo e'e mokea popatee. Sawali Icomiu kimi daa nta to'ori, milolarokami ronga tulumicami ka'asi. »
23 Polawaniomo i Yesus, « Kanahiu kicu daa nta to'ori? Nahina da sai nta dadi ki parasaea koie miano! »
24 Tade-tadeno tamano koie anadalo mekora mogau kanahi, « Parasaeahaku. Tulumiaku i'aku miano da modengke parasaeangku! »
25 Sa'ontohira koie i Yesus miano me'alu meleu ngkowuiho, kai gorasio nde'e koie setani kanahi, « Co'o setani da mompokomotaru ronga mompokomulu, Kutenako meluarako, ronga osiemo mohu-mohule mbule! »
26 Yahopo kai peluarako koie setani ronga mekiali kai pekora pokobibi'o dungku kai kana daa mate, kai me'alu miano da kanahiako, « Mateemo. » 27 Sawali i Yesus na'ungkaario limano koie anadalo kai pokompewanguo, yahopo kai pentade.
28 Sapewisono koie i Yesus hai bolo laica, hi sai hina meha miano da meda'a, petukanahiramo ana guruno kanahi, « Yo hapa cami kasako tule'i tilaa koie setani? »
29 Kai lawanihira, « Setani da kana koie nai tule'i pinokotila ki sa'iaa amala. »
Kompenduano i Yesus tuluraa nta karasaino
(Mat. 17:22-23; Luk. 9:43-45)
30 Kokeenamo pebintaando i Yesus ronga ana guruno kando melako tealo hai wonua Galilea nasai ehe i Yesus kai to'orio miano. 31 Kana'umpe nadaa potisu'ira ana guruno kanahi, « Ana Nto Manusia dahoo nta sinoro hai kuasano miano kando pepatee, ronga oleo ko'otolu dahosi nta mewangu mbule. »
32 Sawali nasando paha'o koie da kanahino, ronga penda nando da'asi moseka metukanaiho hapa koie batuano.
Inai da owo-owose
(Mat. 18:1-5; Luk. 9:46-48)
33 Dungku'iramo koie i Yesus ronga ana guruno hai Kapernaum. Medaahiramo hai bolo laica kai petukana, « Hapamo da pinegagahiakomiu itonia hai bolo sala? »
34 Kando mpengio, kana'umpe hai bolo sala dahira mpegagahiako ki inaiho da owo-owose. 35 Totoro'omo i Yesus, yahopo kai boboihira ana guruno da hopulu orua kai kanahi, « Inai da mokea te'a-te'angga, paraluu'o tewali da owa-owawa ronga atano pera miano. » 36 Yahopo kai po'ala me'asa ana'ate kai pokompetadee hai tonga-tongado, kai raesako ampuo ronga mo'awaakondo kanahi, 37 « Inai da lawatio ana'ate da kana die tendenomo hi nunu'aku, iaamo da lawatiaku. Ronga inai da lawatiaku, na'iaamo I'aku da nilawatino, sawali Iaa da ari tena'aku. »
Miano da sa'iaa ana guruno i Yesus montila setani
(Luk. 9:49-50)
38 Yahopo koie Yahya kai kanahi hai Yesus, « O tuangguru, aricami mo'onto miano da montilaako setani neemiu, nangkuamo kako tabe'o nasa'iaa cita. »
39 Sawali nangkoharatia koie i Yesus, « Mi'osie tabe'o! Kana'umpe nahina te'asa miano da to'ori moweweuhako neengku da tinekangkaako, kai nilakono gauri ngkabaria'aku. 40 Kana'umpe miano da sa'iaa pedalunto koiemo simbauto. 41 Santo'u-to'uahano Kupo'awaakokomiu: Inai da moweekomiu e'e asa tonde tendenomo hicua ana guruno Kristus, nai da'a nta isa gadino. »
Da mompokontuuna miano hai dosa
(Mat. 18:6-9; Luk. 17:1-2)
42 « Ronga ki daa te'asa miano da mompokontuuna hai dosa te'asa di'ira ana'ate da parasaeahaku, dadisi koie miano ki pontakirakoakono watu mpogili'a hai we'uno kai nibasiako hai bolo ntahi. 43 Salakono limau moweweuhakoko dosa, kolo'omo, kana'umpe kolaloo moico mewiso dahano tora ngkaidaaha ronga lima ntekolo ka'iaa mewiso hai naraka, dahano api da sai nta mate, ronga orua'o limau. [ 44 Kokeena uleno nai mate ronga apino nai pinokopepate.] 45 Ronga kicua karu'u mokontuunako hai dosa, kolo'omo, kana'umpe kolaloo moico mewiso dahano tora ngkaidaaha ronga karu ntekolo, ka'iaa nibasiako hai naraka dahosi orua'o karu'u. [ 46 Kokeena uleno nai mate ronga apino nai pinokopepate.] 47 Ronga kicua matau pokontuunako hai bolo dosa, sungki'omo kau hawiako, kana'umpe kolaloo moico ki pewiso hai pomparentaano Apu Alla ronga me'asa matau, ka'iaa nibasiako hai bolo naraka dahosi mondo matau. 48 Kokeena uleno nai mate ronga apino nai pinokopepate.
49 Kana'umpe pera miano dahoo nta tinahi'ako api.
50 Koie tahi moicoo, sawali ki motewemo, hapapo nta pompokomo'ahino mbule? Dadi, kahioomo kami ngkana to'u tahi, tora me'asa mpelaroa. »