I Yesus mompetoka pato rewu miano
(Mat. 15:32-39)
8
1 Koie tempo me'alu to'uo miano da mentekongko, sawali nasahina nta mengkinaando, yahomo koie i Yesus kai boboihira ana guruno kanahi, 2 « Kulolarohira di'ira miano me'alu, otolumo oleo mperongaaku nahina kinaando. 3 Kicu tena'ira kando mpohule ronga tia woa, dahira nta kempatea hai laa sala, kana'umpe dahira da mpebinta mentalaano. »4 Ana guruno mpolawani, « Kana'umpe nta po'alanto roti nta pompetokanto di'ira miano, dahanto die mongioho ronga mentalaa? »
5 Kai petukanaihira koie i Yesus kanahi, « Opia boto roti da nidiomiu? »
Polawanihiramo, « Pitu botosi. »
6 Kai tena'ira miano me'alu kando mentotoro hai wawo wita, yahopo nde'e kai alaa koie roti da pitu boto kai pontarimakasi hai Apu Alla, kai sisibio ronga weehakondo'o ana guruno, kando titila'ira miano me'alu. 7 Dahira penda da mpodio ana ica pia boto, kai barakati'o kai tena'ira ana guruno kando titila'akondo'o. 8 Kando mpongkaa dungku memowohi, yahopo ana guruno kando pumpuo ko'ira torano, dahopo opitu kompe. 9 Ko'ira da ari mpongkaa dahoo kira-kira pato rewu miano. Yahopo i Yesus kai tena'ira mpohule. 10 Nilakono me'ulea hai bangka ronga ana guruno, kando lako hai wonua Dalmanuta.
Miano golonga Farisi mo'ita peto'o tekangka
(Mat. 16:1-4)
11 Yahopo kando meleu miano golonga Farisi metampu'u metukanaiho i Yesus nta mesoba-soba'o, kando po'itaiho peto'o tekangka da mebinta hai suruga.
12 Yahopo kai penaa'ea ronga koharatia, « Yo hapa ko'ira miano diekana kando daa mpo'ita peto'o tekangka? Santo'u-to'uahano Kupo'awaakokomiu, ko'ira miano da kana naku da'a nta moweehira peto'o. »
13 Kai bintanihira ronga mewuatako hai bangka, kai pompole hai asa poleno tahi.
Tuluno miano golonga Farisi ronga Herodes
(Mat. 16:5-12)
14 Ndona mentekolumpe mpowawa mantu ko'ira ana guruno i Yesus, te'i-te'iaahanosi asa boto roti da hai bolo bangka. 15 Kai pokompehawa'ira i Yesus kanahi, « Mi'o'olokaa ronga midaga'o tulu mpompewukeno miano Farisi ronga tuluno i Herodes. »a
16 Dahiramo kanahi me'asa miano hai simbauno, « Arumai da kanahino nasato da'a mpowawa roti. »
17 Sato'oriomo koie i Yesus da nigaudo, koharatia'omo, « Hapa kami daa mpogau'ako hi sahina roti, nami da'apo bara to'orio atawa paha'o? Nai da'apo bara te'ungkahi pelaroamiu? 18 Komatakomiusi sawali nami ngko'onto ronga kobiricomiusi nami da'a bara modeaho, nami da'amo bara mehawa'o? 19 Tempongku sisibio roti da lima boto tarono lima rewu miano, opia be'u da pono himi ari ruru'o torano? »
Kando mpolawani, « Hopulu orua be'u. »
20 « Ronga arincu sisibio roti da opitu boto tarono pato rewu miano, opia kompe da pono himi ari ruru'o torano? »
Kando mpolawani, « Opitu kompe. »
21 Kai koharatia hai ira, « Nami da'apo bara paha'o? »
I Yesus mompokontido me'asa miano mopusu hai Betsaida
22 Yahopo koie i Yesus ronga ana guruno kando medungku hai Betsaida, kokeena leuhandomo mpowawaakono me'asa miano mopusu, ronga mpo'ita kai hedoo. 23 Kai ungkaario nde'e limano koie da mopusu kando mpeluarako hai bungku ngkampo, yahopo i Yesus kai pudusio matano ronga dampasakoakono'o peleno, kai petukana, « Dahomo bara da inontou? »
24 Kai pento'a koie miano ronga kanahi, « Dahoo miano da inontongku hi daa kontade-tade sawali kana-kana pu'u ngkeu. »
25 Kai dampasako peleno penda hai matano, nilakono ko'onto to'u ronga tido namenteenomo luwu. 26 Sa'arinomo koie, kai tena'o mohule hai laicano ronga kanahi, « Osie sumoo hai kampo. »
Parasaeano i Petrus
(Mat. 16:13-20; Luk. 9:18-21)
27 Yahopo koie i Yesus ronga ana guruno kando melako hai opi-opia kampo da inokudahino kota Kaisarea Filipi. Hai laa sala kai petukanaihira kanahi, « Kanahindo miano, I'aku die inai? »
28 Kando mpolawani, « Dahoo da kanahi Yahya pompobaho, dahoo penda da kanahi nabii Elia, dahoo penda da kanahi me'asa simbaudo raro nabii. »
29 Kai petukanaihira ana guruno, « Sawali nunu'o po'awamiu, inai I'aku die? »
Namolawanio i Petrus, « Comiumo Mokole Pompokosalama da nidandino Apu Alla. »
30 Yahopo i Yesus kai tabe'ira kando osie to'u montulura, mau hai nai, mekona hai Iaa.
Karasaino i Yesus ronga sarano miano danta nunu'o
(Mat. 16:21-28; Luk. 9:22-27)
31 Yahopo koie i Yesus kai petampu'u motisu'ira ana guruno hi daa nta montinei karasai mobea koie Ana Nto Manusia ronga nai inehe hai raro ngkamotu'a, kapala pua'ima, ronga guru agama. Dahoo nta pinepate, sawali oleo ko'otolu dahosi nta mewangu mbule. 32 Kanamo koie hi pokomentoda'akondo'o nta daa-daano. Nangkuamo koie i Petrus kai raesako hai pampano kai anuo.
33 Sawali i Yesus namegilisako o'ontohira ana guruno kai i'ireiho koie i Petrus, « Polai, ico'o koie ibilisi! Kana'umpe da pinekiriu na'iaa da po'eheno Apu Alla, sawali da pinekirino to manusia. »
34 Kai boboihira koie i Yesus miano me'alu da nunu'o ronga ana guruno kai po'awaakondo, « Pera miano da mokea nunu'aku, osie meehawa'o wotoluno, sawali lemba'o keu mpinotalambeno kai nunu'aku. 35 Kana'umpe inai da totonga'o penaano dahoo nta isa penaano, sawali inai da sai me'o'oloiho penaano tendenomo nunu'aku ronga nunu'o Lele Mohende dahoo nta pokosalama'o penaano. 36 Hapasi gunano merapio ihino wita'ea sawali isaa penaano? 37 Hapa nta polilino penaa?
38 Kana'umpe inai da mokoko'anu akui'aku ronga akui'o haratiaku hai ra'indo miano diekana da maradosa da bubungkuihaku, Ana Nto Manusia nai da'a nta akui'o koie miano ki leu mpendua metongoako kuasano Tamano da owose meronga ko'ira mala'ekatino Apu Alla. »