Parentano Apu Alla ronga sarano miano Yahudi
(Mat. 15:1-20)
7
1 Me'asa tempo ko'ira miano golonga Farisi ronga opi-opia guru agama mebinta hai Yerusalem meleu mentepo'awaakono i Yesus. 2 Kando ontoo hi daa meha ana guruno da mempongkaa da sai nunu'o adatido to Yahudi, yahoo sai mpe'uwohi meri'ou.3 Kana'umpe miano golonga Farisi ronga miano Yahudi luwu nando mempongkaa ki sando uwohio limando meri'ou, ndona ungkaario adatino mbuedo, 4 ronga kindo mpohule mebinta hai tadoha nando da'a nta mpongkaa ki sando ari mpebaho. Dahopo me'alu sara meha da inungkaarindo kanano molodiu tonde, kuro, ronga sere ngkale.
5 Nangkuamo koie, kando mpetukanaiho ko'ira miano golonga Farisi ronga guru agama kanahi, « Yo hapa ana gurumiu kasando nunu'o sarando mbueto, kando mpongkaa sai uwohio limando? »
6 Kai lawanihira kanahi, « Tekonaamo haratiano nabii Yesaya dadaamiu comiu miano da mompe'anu-anuto'u, nadaa teburi,
‹ Di'ira miano te'iaasi reree'aku hai wiwindo,
sawali hai bolo mpelaroando nando da'a.
7 Nahina gunano hindo daa mesombaihaku,
kana'umpe atorano manusia da pompotisudo kanahi'iramo petenaku. ›a
8 Dadi, koie parentano Apu Alla mibintanio, kami nunu'o sarano to manusia. »
9 I Yesus mo'awaakondo penda kanahi, « Mandarakomiu bubungkuiho parentano Apu Alla kami nunu'o saramiu. 10 Kana'umpe i Musa ariomo kanahi, ‹ Pa'angga'o tamau ronga tinau, ›b naamo penda, ‹ Inai da gauri ngkabaria'o tamano atawa tinano dahoo nta pinopate. ›c 11 Sawali mina ngkanahi, ki daa da kanahi hai tamano atawa tinano, ‹ Hapa kudaa nta moweekomiu nta tinoraakomiu ariakumo mesombaako hai Apu Alla, ›d 12 dadi po'awamiu, koie miano mimpoturusio dungku kasai poweehira miano motu'ano nta tinoraakondo. 13 Tendenomo saramiu da pompotisumiu kanahicomiumo koie haratiano Apu Alla nahinamo pekonaano. Ronga dahopo me'alu mehano da kanasi koie da niweweumiu. »
14 Yahopo koie i Yesus kai boboihira miano me'alu kai koharatia, « Mimpodedeahaku luwumiu kami mpaha'o. 15 Hapa da mewiso hai wotoluno miano mebinta hai luara nai tule'i mokomowusee, sawali hapa da meluarako mebinta hai wotoluno miano, yahomo koie da mokomowusee. [ 16 Inai da koronge, kahioomo kai pompodedea. »]
17 Sadungkuno hai laica mentalahi'ira miano me'alu, ana guruno mpetukanaiho batuano koie parere. 18 Kai lawanihira kanahi, « Nami da'a bara na'amiu paha'o? Nami nto'orio kanahi da mewiso wotoluno miano mebinta hai luara nai tule'i mokomowusee? 19 Kana'umpe nasai pewiso hai bolo mpelaroano, sawali bolo ntiano, yahopo kai nibasiako hai kantete. » Yahomo koie kai pokohalala'o luwuo kinaa.
20 Kai kanahi penda, « Hapa da meluarako mebinta hai miano yahomo da mokomowusee. 21 Kana'umpe da mebinta hai pelaroano miano sabaanomo pinehawa da mosa'o, endeo, mononako, mompepate, 22 mesosanto'ori, koroto, niweweu mosa'o, akala mosa'o, nai pokotaha'o larono, singgira, mososa'o miano, mentaba, kapatuli. 23 Luwuo ko'ira da mosa'o, sabaano mebinta hai pelaroa, ronga koiemo da mokomowusee miano. »
Parasaeano me'asa tina Siro-Fenisia
(Mat. 15:21-28)
24 Pebintaanomo kokeena koie i Yesus kai lako hai wonua Tirus, kai pewiso hai me'asa laica. Nai ehe ki daa miano da to'orio, sawali koie nileuhakono nai to'ori tewuniako. 25 Deenapo dahoo me'asa tina, da nilawuino setani ana ntinano, sapodeaho hi daa koie i Yesus, nilakono leu medangkawako hai pu'u ngkaruno. 26 Koie tina yahoo miano Yunani mebinta hai Fenisia hai wonua Siria, kai po'ita hai Yesus kai tilaa koie setani da lawuiho anano.
27 Yahopo koie i Yesus kai po'awaakono, « Kahioomo kando mpongkaa memowohi mperi'ou ko'ira anadalo, kana'umpe nai moico kito alaa koie kinaando anadalo, kato weehakono'o dahu. »e
28 Sawali koie tina namolawani kanahi, « Menonaa, Apua, sawali koie na'ana dahu da hai tonto meda kaahosi tora ngkinaano anadalo. »
29 Kai polawani nde'e koie i Yesus, « Tendenomo koie ino'awau, pohulemo. Kana'umpe koie setani peluarakoomo bintanio ana'u. »
30 Sapohulenomo koie tina hai laicano, na'awaamo anano hi daa leleha hai poturiano, ronga setani da lawuiho bintaniomo.
I Yesus mompokontido miano motaru
31 Koie i Yesus mebinta hai wonua Tirus sai-saino lako tealo hai Sidon me'o'ala hai tahi Galilea hai tongano wonua Hopulu Kota.f 32 Kokeenamo dahano kando leu miano mpowawaakono miano motaru da mokora elono, kando po'itaakono kai hedoo kai tido. 33 Kai sisincaa mebinta hai miano me'alu, yahopo kai tiu'akono'o birino orua'o ronga me'oniu kai tiu'o elono. 34 Kai pesoso'e hai langi ronga menaa'ea kai koharatia, « Efata! » Batuano: « Te'ungkahimo! »
35 Koiesi tempo kai koronge, ronga elono da mokora molu'oomo ronga to'oriomo mogau moico. 36 I Yesus mokompehawa'ira kando osie montulura mau hai nai, sawali peta-petabenomo samolu-moluenomo teleleakoano. 37 Pera da modeaho taperando tekangka ronga mengkanahi, « Luwuo da niweweuno moicoo, da motaru pokongkorongee, da mulu pokompogau'o. »