I Yesus mewangu mbule
(Mk. 16:1-10; Luk. 24:1-12; Yah. 20:1-10)
28
1 Arino koie oleo mpekolia, konaa oleo Mincu kokomeanta, i Maria Magdalena ronga i Maria lako ontoo koburuno Yesus. 2 Koie tempo tibo-tibono dadi lelu da mokora to'u, nangkua me'asa mala'ekatino Apu da mebinta hai suruga tii hai koburu dole'o watu, kai totoro hai wawono. 3 Hulano kana kila, ronga pinodaino mopila to'u kana seru. 4 Da medaga'o koie koburu taperando bibi momee kando mente'empesako kana miano mate.5 Sawali koie mala'ekati namo'awaakondo ko'ira tina, « Mi'osie momee. Kuto'oriomo himi daa u'ungkee i Yesus da ari nibasiropa hai keu mpinotalambe. 6 Nai da'amo na'ai, kana'umpe pewanguomo, kana da ari kanahino. Mileumo ontoo ariano leleha. 7 Kami oru mohule mo'awaakondo ana guruno kanahi, ‹ Pewanguomo mebinta hai raro miano mate. Dahomo meri'ouhakomiu hai Galilea; kokeenamo dahamiu nta ontoo. › Santo'u-to'uahano, ariakumo mo'awaakomiu. »
8 Tade-tadendo bintanio koburu ronga momee. Sawali dahirasi penda mohende to'u, kando tekara-karai nta lako montuluraakondo ana guruno i Yesus. 9 Kai tibo awahira koie i Yesus ronga sosampataehira. Nilakodo leu merako hai karuno ronga mesombaiho. 10 Kai koharatia i Yesus, « Mi'osie momee. Lakomo kami mpo'awaakondo raro mpetilaku, kando melako hai Galilea, kokeenamo dahando nta ontoaku. »
Kuledo miano da mpodaga koburu
11 Dahiramo ko'ira tina hai laa sala, kando meleu hai kota opi-opia miano da daga'o koburu mo'awaakondo raro ngkapala pua'ima luwu da ari kadadia. 12 Sa'arindomo mpogau'ako raro ngkamotu'a Yahudi ronga mebobotomo, kando poweehira doi tehalu ko'ira surudadu kanahi, 13 « Mimpo'awaakondo miano, ‹ Tempono malo daamami mpoturi kando leu ana guruno mononakoo maeatino. › 14 Ronga ki tibo modeaho gubernur, dakamisi nta atoro'o, kai osie hapaicomiu. » 15 Nilakodo ko'ira miano alaa koie doi ronga nunu'o petenado ko'ira kapala pua'ima. Die tulura teleleako hai pera miano Yahudi dungku diekana-kana.
Parenta moleleako Lele Mohende
(Mk. 16:14-18; Luk. 24:36-49; Yah. 20:19-23; Tul. Ras. 1:6-8)
16 Ko'ira ana guruno da hopulu ka'asa lako'iramo hai Galilea hai tangkeno da ari tinisuno i Yesus. 17 Sando ontoomo i Yesus, nilakodo mpesombaiho, sawali dahopo da bata-bata larondo. 18 Kai okudahi'ira koie i Yesus kai koharatia, « Pera kuasa hai suruga ronga hai wita'ea ariomo weehakuo. 19 Nangkuamo koie, milakomo, kami mpokontewalihira luwu suku ana guruku, ronga baho'akondo'o neeno i Ama, i Ana, ronga Sangkoleono Alata'ala, 20 ronga mimpotisu'ira kando nunu'o pera luwu hicu ari tenakomiu. Ronga mimpeehawa'o, dahakusi nta meronga ngkaida'akomiu dungku kompura-puraano. »