I Yesus niwawa hai ra'ino i Pilatus ronga mateano i Yudas
(Mk. 15:1; Luk. 23:1-2; Yah. 18:28-32; Tul. Ras. 1:18-19)
27
1 Dumondo'ea luwu kapala pua'ima ronga kamotu'ano miano Yahudi mo'otuhiramo nta pepatee koie i Yesus. 2 Kando pungorio yahopo kando wawaa soroakono'o i Pilatus gubernur kokeena.a3 Tempono i Yudas, da ari soroo i Yesus, to'orio hi inotuhimo kanahi nta pinepatemo i Yesus, pesosooriomo kai pokompohule'o koie doi da tolu pulu pera hai ira kapala pua'ima ronga kamotu'ano miano Yahudi. 4 Kanahiomo, « Kodosaakumo hicu ari moweweuhakono miano da sai hina sinalakino dungku kai daa nta pinopate. »
Sawali polawanindo, « Hapa da kanahiu nako da'a nta mompaduli. Koie pasipoleu! » 5 Yahopo i Yudas kai kamburako koie doi hai bolo raha mpesombaa kai peluarako lako me'ee.
6 Nilakodo ko'ira kapala pua'ima ruru'o koie doi kando kanahi, « Die doi pompokonturu rea. Upalio mowiso hai kadu-kadu doromaa raha mpesombaa. » 7 Samebobotodomo, kando alaa koie doi mpo'oliako wita da meneehako witano tumpu suu. Koie wita ndoweweuhomo pekoburuano miano sumoo. 8 Nangkuamo dungku die oleo, neeno koie wita yahoo « Wita Rea. » 9 Kanamo koie kadadiano hapa da ari kanahino nabii Yeremia yahoo, « Kando mpo'awa tolu pulu doi pera, koiemo po'angga da ari pinatantundo miano Israil kuamo nta powadado iaa. 10 Koie doi ndopo'oliakomo witano tumpu suu kana da petenano Apu hai aku. »b
I Yesus hai ra'ino i Pilatus
(Mk. 15:2-15; Luk. 23:3-5, 13-25; Yah. 18:33 – 19:16)
11 Tempono i Yesus nira'iako hai gubernur, petukanaamo koie gubernur, « Co'omo bara mokoleno miano Yahudi? »
Polawanino koie i Yesus, « Kanamo koie da kanahiu. »
12 Sawali tempondo ko'ira kapala pua'ima ronga kamotu'ano miano Yahudi tuntuo i Yesus, nai polawani. 13 Nangkuamo kai kanahi i Pilatus, « Nau da'a bara modeaho luwu hindo daa tuntuko? » 14 Sawali nasai pompe'o'oo koie i Yesus molawani, yahomo nde'e kai banga-banga koie gubernur.
15 Tapio ta'u konaa oleo owose biasano gubernur moluarako me'asa miano ntetorungku da po'eheno miano me'alu. 16 Koie wotu dahoo me'asa da telele neeno da tetorungku, yahoo i Barabas. 17 Dadi, samentekongkondo ko'ira miano me'alu, kai petukana i Pilatus kinaimo da inehendo kai niluarako, i Barabas atawa i Yesus da meneehako Kristus. 18 Kai kanahi kana koie i Pilatus, tendenomo hina nto'orio ko'ira ponggawano miano Yahudi ndona singgira hai Yesus kuamo kando soroakono'o.
19 Dahomo konainoo i Pilatus totoro hai kadera po'otuhia kara-kara, kai pokatuo samotu'ano oliwi kanahi, « Osie to'u co'o mosampuru kara-karano koie miano da sai hina salano, tendenomo iaa, kaku po'ipi mosa'o die oleo. » 20 Sawali ko'ira kapala pua'ima ronga kamotu'ano miano Yahudi uluahako ko'ira miano me'alu kando mpo'itaa hai Pilatus kai niluarako i Barabas, sawali i Yesus pinopate.
21 Kai petukanaihira penda koie i Pilatus ki maina da po'ehendo kai niluarako. Kanahindo, « Barabas! »
22 Petukanaihira koie i Pilatus, « Kicana koie, hapa nta poweweungku koie i Yesus da nineehakomiu Kristus? »
Mperorongahira kanahi, « Basiropaamo! »
23 Kai petukana i Pilatus, « Sawali hapa da ari niweweuno da mosa'o? »
Sawali sapeko-pekorando nde'e mpogora kanahi, « Basiropaamo! »
24 Lako-lako'omo paha'o koie i Pilatus hi sai da'amo nta to'ori kohapa-hapai, ronga ko'ira miano dahiramo nta lako-lako madalo. Dadi, i Pilatus po'alaamo e'e kai uwohio limano hai ra'indo miano me'alu ronga kanahi, « Lapasiaku ki mate die miano; comiu nta rongo'o. »
25 Luwundo miano me'alu kokeena mpolawani, « Umbee, camimo ronga anamami danta rongo'o nimateakono! »
26 Yahopo i Pilatus kai luarakoakondo'o koie i Barabas naamo montena miano kai rorasaiho koie i Yesus ronga soroakondo'o kai nibasiropa.
Sorodadu da moko'anu-anuo i Yesus
(Mk. 15:16-20; Yah. 19:2-3)
27 Ko'ira sorodadu ndowawaamo i Yesus mewiso hai rahano i Pilatus ronga luwuo sorodadu kokeena meleuhiramo lilicu'o. 28 Kando meluuhio koie pakeano, yahopo kando pokompebabuakono'o babu olondoro mentii. 29 Kando po'enaakono songko mpomokole da koriu kando pokompesongkoakono'o hai rapano. Kando pokompo'ungkaario tuko wulu hai lima muanano ronga kokolontuu hai ra'ino kando pesomba moko'anu-anuo kanahi, « Sombakomiu mokoleno miano Yahudi. » 30 Kando o'oniuho ronga alaa tukono kando langkuakono'o hai rapano.
31 Sa'arindo moko'anu-anuo, kando meluuhio babu mentiino kando pokonaakono'o daa-daa mpakeano, yahopo kando luarako wawaa dahano nta nibasiropa.
I Yesus nibasiropa
(Mk. 15:21-32; Luk. 23:26-43; Yah. 19:17-27)
32 Tonga salamo kando mentepo'awa me'asa miano da mebinta hai Kirene meneehako Simon, kando pakisaa'o lemba'akono'o keu mpinotalambeno i Yesus. 33 Kando medungku kokeena da meneehako Golgota, batuano: « Dahano Tolobe Rapa. » 34 Yahopo kando pokompondo'uo i Yesus angguru da mehela'iako upeu. Sawali te'iaasi hi ari tandaiho koie angguru, nai ehe mondo'u.
35 Sa'arindo basiropaa, kando titila'o babuno ndona arimo loterei'o. 36 Sa'arindo, totoro'iramo kando dagai'o kokeena. 37 Hai taro rapano arihira mompasa buri hapa da nidudunduno yahoo, « Diemo Yesus mokoleno miano Yahudi. » 38 Perongano i Yesus nibasiropa dahoo orua miano parampo, me'asa hai muanano, me'asa penda hai suwano.
39 Ko'ira miano da tealo kokeena poko'anu-anuo ronga lidu-lidu'o rapando.c 40 Kanahindo, « Ico'omo da kanahi nta rengga'o raha mpesombaa kau potadee larono otolu oleo! Kicua co'o Anano Apu Alla, pokosalama'o wotoluu mebinta hai keu mpinotalambe, kau petiihako! »
41 Kanasi na'anda raro ngkapala pua'ima, guru agama, ronga raro ngkamotu'ano miano Yahudi itaihira moko'anu-anuo i Yesus kanahi, 42 « Suere miano yahomo da pinokosalamano, sawali wotolu mpantano nai tule'i pokosalama'o! Kicua iaa mokoleno miano Israil, kahioomo diekana kai tiihako wotolu mpantano mebinta hai keu mpinotalambe, yahopo kato parasaeaho. 43 Parasaeahomo Apu Alla ronga kanahino, ‹ I'akumo Anano Apu Alla. › Ndoka kato ontoo ki daasi po'eheno Apu Alla kai pokosalama'o diekana-kana. » 44 Ko'ira orua miano parampo da perongano nibasiropa yahosi itai nunutihira moko'anu-anuo.
Taweano i Yesus
(Mk. 13:33-41; Luk. 23:44-49; Yah. 19:28-30)
45 Dahomo totoro oleo kai rondoma otolu damu upu-upuo wonua. 46 Tete otolu'omo kai pekora koie i Yesus mehou kanahi, « Eli, Eli, lama sabakhtani? » batuano, « Apu Alla Apungku, Apu Alla Apungku, yo hapa kau bintaniaku? »d
47 Opi-opia miano da mentade kokeena podeaho arumai pehouno kando mengkanahi, « Dahoo boboiho nabii Elia! »
48 Dahoo me'asa simbaudo da nilakono mekalulu mo'ala bungano watu mpasi mongura da montoopi e'e, kai tomo'o hai angguru mo'olo, kai tu'oraa hai asa kolo wulu, kai poweeho mondo'u koie i Yesus. 49 Sawali meha miano kanahi, « Osiepo, kato ontoo ki daa nabii Elia nta leu pokosalama'o. »
50 Yahopo kai pehou'ea koie i Yesus kai mo'otu penaano.
51 Pedao da hai bolo raha mpesombaae nilakono tehia ngkena mebinta hai wawo dungku hai tonto. Wita molelu kai tebobongka watu. 52 Me'aluo koburu da te'ungkahi ronga me'aluo umatino Apu Alla da memate mentorahiramo mbule. 53 Ndomebintaamo koburundo, ronga sapewanguno mbule i Yesus, kando mpewiso hai kota Yerusalem. Me'aluo miano da ontohira airaa.
54 Koie komondaa ngkompi ronga anabuano da medagai'o koie i Yesus taperando memomee tempondo ontoo lelu wita ronga pera da kadadia. Kanahi'iramo, « Menona to'uo, diemo Anano Apu Alla! »
55 Kokeena me'aluhira tina da o'onto mentalaa da kadadia. Iramo da ari nunu'o ronga tulumio i Yesus mebinta hai Galilea. 56 Kokeena dahira i Maria Magdalena, i Maria tinano Yakobus naamo Yusuf, ronga petinaando anano i Zebedeus.
Pekoburuano i Yesus
(Mk. 15:42-47; Luk. 23:50-56; Yah. 19:38-42)
57 Kiniwiahomo kai leu me'asa miano ngkawasa, miano Arimatea, da meneehako Yusuf. Iaa na'ana ana gurunosi Yesus. 58 Kai lako hai Pilatus mo'itaa maeatino i Yesus. Yahopo i Pilatus kai petena weehakono'o, 59 kai alaa i Yusuf waluakono'o kae ngkati da tonia. 60 Yahopo kai lako lehaa hai koburu mpantano, da ari pina'oti ntonia hai bolo watu. Sa'arino podole'omo watu'ea kai tampo'o wambano koburu, yahopo kai pohule. 61 I Maria Magdalena ronga i Maria poo'iahiramo totoro rora'io koie koburu.
Da medaga'o koburuno i Yesus
62 Sameantano, konaa oleo mpekolia,f lako'iramo ko'ira kapala pua'ima ronga miano golonga Farisi mperonga mera'iako hai Pilatus, 63 kanahindo, « Apua, dakami mokopehawa'o tempono tora koie miano mengkule ario kanahi, ‹ Oleo ko'otolu dahaku nta tora mbule. › 64 Nangkuamo koie, mimpontena miano kando dagai'o moi-moico koie koburu dungku oleo ko'otolu, kando osiesi leu ana guruno mononakoo maeatino kando po'awaakondo miano hi pewangumo mebinta hai bolo ngkoburu. Ronga taperano mosa'o pekulepindo ana guru da merumbui ka'iaa pekulepino gurudo da meri'ou. »
65 Kanahiomo i Pilatus, « Dahosi sorodadu kupoweekomiu danta modaga. Milakomo mpedagai to'u. »
66 Lako'iramo hai koburu kando mpodio peto'o mpetabedo pamarenta hai pontampono koburu ronga modio da modaga kai osie to'ori inungkahi.