Ponggawano miano Yahudi mepatudu nta pepatee i Yesus
(Mk. 14:1-2; Luk. 22:1-2; Yah. 11:45-53)
26
1 Sa'arino i Yesus mompotisu, kai kanahi hai ana guruno, 2 « Dakomiumo to'orio hi te'iaamo da orua oleo nta saano dadi oleo owose Ntepulosi'a.a Koie wotu dahanomo nta sinoro Ana Nto Manusia kai nibasiropa hai keu mpinotalambe. »3 Koie wotu mentepo'awaandomo raro ngkapala pua'ima ronga kamotu'ano miano Yahudi hai rahano pua'ima'ea yahoo i Kayafas. 4 Kando mpepatudu rako mpewuwunio i Yesus, ronga nta pepatee. 5 Sawali ndona mengkanahi, « Osie kokonaa oleo owose, te'iaamo kando madalo miano me'alu. »
I Yesus sinoloriako mina-mina hai rapano
(Mk. 14:3-9; Yah. 12:1-8)
6 Konainoo i Yesus hai Betania, hai laicano i Simon da ari kokulidaa, 7 leuhomo me'asa tina mowawa bitolo watu da ko'ihiako mina-mina da mohali to'u olino, kai soloriakono'o hai rapano i Yesus da konainoo tewawe. 8 Sando me'ontoomo ko'ira ana guruno namosa'oo larondo kando kanahi, « Hapa koie da mohali olino kai pinake dahano sai pantasi? 9 Koie mina-mina tewalio nibalu mohali, yahopo olino titila'akondo'o miano ngkadee-dee. »
10 Sawali i Yesus nanto'orio gaudo kai kanahi, « Hapa kami daa mokomasusa'o die tina? Da niweweuno hai Aku moicoo. 11 Kana'umpe miano ngkadee-dee sadiakomiusi mperonga, sawali I'aku nato da'amo nta mperonga ngkaida'a. 12 Kana'umpe da posolorino mina-mina hai wotolungku da pompasadianomo nta pekoburungku. 13 Santo'u-to'uahano Kupo'awaakokomiu: Pera dahano nileleako Lele Mohende hai wita'ea, die tina ronga hapa da niweweuno dahoo nta sinangke ngkaida'a kai osie kinolumpe. »
I Yudas mepatudu nta soroo i Yesus
(Mk. 14:10-11; Luk. 22:3-6)
14 Yahopo kai lako koie i Yudas Iskariot, me'asa simbaudo ana guruno i Yesus da hopulu orua, tepo'awaakondo kapala pua'ima kai kanahi, 15 « Hapa himi daa nta moweehaku, kaku soroakomiu'o koie i Yesus? » Nilakodo weehakono'o tolu pulu doi pera. 16 Metampu'u koie tempo, kai po'u'ungke wotu da moico dahano nta soroakondo'o koie i Yesus.
I Yesus tewawe me'asa meda'akondo ana guruno
(Mk. 14:12-21; Luk. 22:7-14, 21-23; Yah. 13:21-30)
17 Konaa mata ndo'ua Tewawea Roti Sai Kotulu,b kando leu ko'ira ana guruno mpetukana hai Yesus kanahi, « Hai hapa dahano nta po'ehemiu kako pompasadia'akita nta tewaweanto mokomaroaho oleo Ntepulosi'a? »
18 Kai polawani, « Milakomo hai laicano i Anu da hai kota, kami mpo'awaakono kanahi, ‹ Pe'oliwino guru: Okudaamo tempongku; hai laicaumo dahangku nta mokomaroaho oleo Ntepulosi'a merongahira ana guruku. › » 19 Yahopo ko'ira ana guruno kando nunu'o hapa hi daa tena'ira ronga mompasadia'akondo nta tewawea oleo Ntepulosi'a.
20 Samalono nde'e, koie i Yesus ronga ana guruno da hopulu orua mentotoro'iramo nta mentewawe. 21 Dahiramo konainoo mentewawe, kai koharatia koie i Yesus, « Santo'u-to'uahano Kupo'awaakokomiu, dahoo me'asa miano hai comiu danta soroaku. »
22 Yahopo kai mopoe'ea larondo kando mpetukanaiho tee-tee'asa miano kanahi, « Na'iaasi bara i'aku, Apua? »
23 Kai polawani koie i Yesus, « Miano da merongaaku montudu roti pe'asa mangkoonangku yahomo danta soroaku. 24 Ana Nto Manusia dahoo nta mate kana da teburi hai Boku Haratiano Apu Alla, sawali masilaka'o miano da soroaku. Dadisi koie miano ki sai da'a pinokohina. »
25 Koie i Yudas danta soroo i Yesus molawani, « Na'iaasi bara i'aku, guru? »
Polawaniomo koie i Yesus, « Kanamo da kanahiu. »
Pinatantuano tewawea me'asa meda'akono Apu Yesus
(Mk. 14:22-25; Luk. 22:14-20; 1 Kor. 11:23-25)
26 Dahiramo konainoo mpongkaa, kai po'ala roti koie i Yesus ronga kai pepebarakati'o hai Apu Alla kai sisibio, yahopo kai titila'akondo'o ana guruno ronga koharatia, « Alaamo kami ngkaaho, diemo wotolungku. »
27 Yahopo kai alaa penda pondo'ua, kai pontarimakasi hai Apu Alla kai weehakondo'o kanahi, « Mimpondo'umo luwumiu die hai pondo'ua. 28 Diemo reaku, rea mpedandi, da tesolorako tendenomo miano me'alu kai te'ampuni dosando. 29 Sawali Kupo'awaakokomiu: Mebinta diekana naku da'amo nta mondo'u die angguru dungku oleo dahangku nta ndo'uo angguru tonia merongakomiu hai pomparentaano Tamangku. »
30 Sa'arindomo mpelagu mporeree, koie i Yesus ronga ana guruno melako'iramo hai tangkeno Zaitun.
I Petrus nta mehapuiho i Yesus
(Mk. 14:27-31; Luk. 22:31-34; Yah. 13:36-38)
31 Yahopo koie i Yesus kai po'awaakondo ana guruno, « Die malo luwumiu dahoo nta molelu parasaeamiu tendenomo nadaa danta konaaku, kana'umpe dahoo teburi hai Boku Haratiano Apu Alla kanahi, ‹ Dahaku nta pepatee koie tumpu mpakani, ronga lunu mpinakanino dahira nta mentekamburako. ›c 32 Sawali sapewangungku mbule, dahaku nta meri'ouhakomiu hai Galilea. »
33 Koie i Petrus lawanio i Yesus kanahi, « Mau ki luwundo molelu parasaeando tendenomo nadaa danta konakomiu, sawali i'aku naku da'a! »
34 Koharatia'omo koie i Yesus, « Santo'u-to'uahano Kupo'awaakoko: Diesi malo, nai da'apo nta totorea manu, dakomo nta mehapuihaku tepentolu. »
35 Kanahiomo i Petrus, « Labiraamo kumate merongakomiu, naku da'a nta mehapuicomiu. » Luwuo ana guruno pengkenaa kanahindo.
I Yesus amala hai uma Getsemani
(Mk. 14:32-42; Luk. 22:39-46)
36 Sadungkudo koie i Yesus ronga ana guruno hai uma da meneehako Getsemani, kai koharatia, « Mintotoromo na'ai, kaku lako amala pekeena. » 37 Kai wawahira itai i Petrus ronga orua anano Zebedeus. Kai petampu'u koie i Yesus mopoe larono ronga halia, 38 kai po'awaakondo kanahi, « Taperano mopoe larongku, pomperasaku kana to'u nta mate. Mimpoo'iamo na'ai kami mparonda'akita. » 39 Kai pesuahako, kai peranggahako sudu amala kanahi, « O Ama, ki daa nta tewali, kahioomo kai liahaku die pondo'ua ngkarasai; sawali na'iaa po'ehengku danta tenunu, yahoo po'ehemiu. »
40 Kai pohule awahira ana guruno dahira mempoturi. Kai anuo koie i Petrus kanahi, « Nami tule'i bara paronda'akita te'asa damu? 41 Mimpedagai ronga amala, kai osie saru konakomiu posoba-soba; pelaroa da mokea dahoo, sawali wotolu namodengke. »
42 Yahopo penda kai lako duduhio amala kanahi, « O Ama, ki sai tewali koie pondo'ua liahaku, tabeano kicu ndo'uosi, kahioomo po'ehemiu kai dadi. » 43 Kai pohule penda awahira dahirasi mpoturi, hindona mokokotundu'eamo.
44 Poturusihiramo nde'e kando mpoturi, kai lako amala kompentoluno, kanasi arino amala iso-isono. 45 Sa'arinomo, kai pohule awahira ana guruno kanahi, « Dakomiupo mpoturi ronga mpekoli-koli? Mi'ontoomo, diekana dungku'omo wotuno dahano Ana Nto Manusia nta sinoro hai limando miano maradosa. 46 Mimpewangumo kato lako; koie miano danta soroaku okudaamo. »
I Yesus nirako
(Mk. 14:43-50; Luk. 22:47-53; Yah. 18:3-12)
47 Dahopo koie i Yesus konainoo mogau, nantesabaa koie i Yudas, me'asa simbaudo da hopulu orua ana guruno, ronga asa lunu miano da mpowawa taa ronga kalangku, tinenado raro ngkapala pua'ima ronga kamotu'ano to Yahudi. 48 Koie i Yudas, danta soroo i Yesus, ariomo moweehira peto'o kanahi, « Maina da inumaku, koiemo kami rako'o. » 49 Nangkuamo kai tade-tadeno motutuiho koie i Yesus kai sosampataeho, « O tuangguru. » Kai uma'o nde'e.
50 Sawali Yesus nangkoharatia, « O tokia, kicuamo koie patuduu, weweuhomo. »d Yahopo nde'e kando memaluru kando alaa rako'o Yesus.
51 Sawali dahoo me'asa da merongaa i Yesus bitusako taano kai tongka'o birino sangkinaano pua'ima'ea kai tuuna. 52 Yahopo kai koharatia koie i Yesus, « Tampila'o mbule koie taa'u, kana'umpe pera miano da ewaako taa, yo taasi danta awasala'o. 53 Atawa nami da'a bara to'orio hicu tule'i me'e'etaa Tamangku, kai pontena'akuo tehopulu orua kolalo batalio mala'ekati? 54 Sawali kicana koie, nai da'a nta kadadia kana da teburi hai Boku Haratiano Apu Alla, da kanahi paraluu'o kadadia kana koie. »
55 Koie tempo i Yesus mo'awaakondo miano me'alu kanahi, « Ponto'orimiu I'aku die miano mosa'o, yahomo kami leu mowawaakuo taa ronga kalangku nta rako'aku? Mainakaa, tapio oleo dahakusi totoro mompotisu hai uluano raha mpesombaa, yo hapa kasami rako'akupo? 56 Sawali die luwuo kadadia mentoda'anomo da ari pinokodungkudo nabii. » Yahopo luwu ana guruno kando mpolai bintanio.
I Yesus mera'iako hai pongadila'eano agama
(Mk. 14:53-65; Luk. 22:54-55, 63-71; Yah. 18:13-14, 19-24)
57 Saterakonomo nde'e koie i Yesus, kando mewawaa mera'iako hai Kayafas, pua'ima'ea. Kokeena mondo'iramo guru agama ronga kamotu'ano to Yahudi. 58 Koie i Petrus merumbui mentalahi'ira dungku hai ulua rahano pua'ima'ea, ronga satelaroakono, totoro'omo mehela'iakondo miano mparonda totarimaa kana'umpe daano koie kara-kara kai dungku ari.
59 Raro ngkapala pua'ima ronga luwu anggota pongadila'eano agama mpo'u'ungkehiramo saksii ngkule, kai to'ori koie i Yesus nihuku mate. 60 Sawali nasando mpo'awa te'asa buktii, mau ki daa me'alu miano da metulura ngkule. Sawali perumbuino nasaba orua miano kanahi, 61 « Die miano ario kanahi, ‹ Dahaku nta tule'i mokorengga'o raha mpesombaa, kaku potadee mbule larono otolu oleo. › »
62 Kai pentade koie pua'ima'ea kanahi, « Nau da'a bara koie nta molawani hindo daa tuntuko ko'ira saksii? » 63 Sawali koie i Yesus nampolo da mengio. Yahopo pua'ima'ea kai kanahi, « Kupokompesumpa'akoko'o, neeno Apu Alla da tora, po'awaakamimo kicuamo co'o Mokole Pompokosalama, Anano Apu Alla. »
64 Kai polawani koie i Yesus, « Kanamo koie da kanahimiu. Sawali Kupo'awaakokomiu, metampu'u diekana, dakomiumo nta ontoo Ana Nto Manusia totoro hai muanano da makuasa ronga leu mewawono seru. »e
65 Yahopo pua'ima'ea kai hiakako babuno,f kai kanahi hai ira kamotu'a, « Mokea mengkengkenaiho Apu Alla! Nta hapantopo mo'u'ungke saksii? Diekana mimpodeahomo hi pengkengkenaiho Apu Alla. 66 Kana'umpe po'awamiu diekana? »
Polawanihiramo kanahi, « Kahioomo kai pinopate! »
67 Yahopo kando me'o'oniuho ra'ino ronga me'o'anuo, ronga miano meha tapa'o kanahi, 68 « Ndoka koharatia mo'awaakami, o Mokole Pompokosalama, inai da o'anuko? »
I Petrus mehapuiho i Yesus
(Mk. 14:66-72; Luk. 22:56-62; Yah. 18:15-18, 25-27)
69 Koie tempo i Petrus dahano totoro hai uluano laica, kai leu me'asa pontadehi ntina kanahi hai iaa, « Ico'o na'au peronganosi i Yesus, koie miano Galilea. »
70 Sawali namehapu hai ra'indo luwu miano kanahi, « Naku da'a to'orio hapa da patuduu. »
71 Pesabahakono koie i Petrus hai wamba katondo, koie tina suere da montadehi ontoomo kai kanahi hai miano da meda'a kokeena, « Die miano, peronganosi koie i Yesus, miano Nazaret. »
72 Kai pehapu penda ronga mesumpa, « Naku da'a to'orio i'aku koie miano. »
73 Nai da'a lembahi, kando leu miano da mentade kokeena hai Petrus kanahi, « Matantuo, co'o na'au yahosi salakodo, mentoda'ano yahoo hai gau'u. »
74 Yahopo kai petampu'u metundari ronga mesumpa, « Naku da'a mekato'oriakono koie miano. » Koiesi tempo kai totorea manu. 75 Nilakono mokopehawa'o hapa da ari kanahino i Yesus, « Nai da'apo nta totorea manu, dakomo nta mehapuihaku tepentolu. » Yahopo kai peluarako ronga mewowo kana da inuhu pelaroano.