Parereno waipode da mandara ronga da pore
25
1 « Pomparentaano Apuno suruga nta kanamo daano die parere: Hopulu waipode mpetiwawa mpo'ala hulu tee'asando kando lako lawatio tama niwawa. 2 Olima da pore, olima da mandara. 3 Olima da pore dahosi huludo, sawali nando da'a mompasadia epuno nta posowodo. 4 Olima da mandara dahoo huludo ronga sadia'o bitolo epuno huludo. 5 Tama niwawa nai oru leu, dadi ko'ira waipode mokokotundu'iramo kando mentekoturi.6 Mengkauhomo malo nde'e kai pinodea gora kanahi, ‹ Leuhomo tama niwawa! Mileumo mpelawati! ›
7 Ko'ira hopulu waipode mpewanguhiramo kando pokomelangaa huludo. 8 Waipode da pore mogau'akondo ko'ira da mandara, ‹ Powee'etekami e'eno hulumiu, kana'umpe hulumami nta mateemo. ›
9 Kanahi'iramo ko'ira waipode da mandara, ‹ Nai tewali! Kana'umpe nato da'a nta mpekoa ki luwunto. Dadisi milako mo'oli hai pabalu! › 10 Kando melako nde'e ko'ira waipode da pore mpo'oli epu. Konainoo dahiramo melako, kai leu tama niwawa. Ko'ira olima waipode da sadiamo mpewiso'iramo hai ndo'ua mperonga tama niwawa kai tinampo wamba.
11 Nai da'amo mengkau kando leu ko'ira waipode da pore, kando mpeboboi, ‹ O apuno ndo'ua, ungkahiakami'o wamba. ›
12 Sawali koie tama niwawa namolawani, ‹ Santo'u-to'uahano kupo'awaakokomiu, naku da'a to'oricomiu. › »
13 Koharatia'omo koie i Yesus, « Nangkuamo koide, mimpedagai to'umo, nasami da'a to'orio oleono kana-kanapo damuno nta leuhangku. »
Parereno doi wulaa
(Luk. 19:11-27)
14 « Dadaano pomparentaano Apuno suruga nta kanamo die parere. Me'asa tama nta lako hai wonua suere, kai boboihira atano danta padala'akono'o luwu hapa-hapano. 15 Tee-tee'asa miano tila'o danta pinokopadalano, me'asa miano lima rewu doi wulaa,a me'asa miano rua rewu doi wulaa, yahopo me'asa miano penda asa rewu doi wulaa. Kai bintanihira nde'e.
16 Koie ata da montarima lima rewu sai-saino lako padala'o, kai po'awa laba lima rewu doi wulaa penda. 17 Kanamo na'ana koie da mo'awa rua rewu doi wulaa, kolaba rua rewu. 18 Sawali ata da montarima asa rewu lako'omo iaa mongkekei bolo, yahopo kai wuniako doino apuno kokeena.
19 Mengkauhomo nde'e koie, kai pohule apundo ko'ira ata kando mpetampu'u mpedoa. 20 Koie ata da montarima lima rewu leuhomo sitoro'o doi wulaa lima rewu ronga kanahi, ‹ Apua, mi'ari moweehaku doi lima rewu, mi'ontoomo, laba da inawangku dahoo lima rewu penda. ›
21 Kanahiomo koie apuno, ‹ Moicoomo, co'o ata ngkototu ronga konianto'u. Hiuna teperahi-rahi hicu poweeko pohedoa da te'ete, diekana-kana dahaku nta moweeko pohedoa da owose. Pewisomo nunu'aku hai laro sanaa'angku! ›
22 Yahopo kai leu na'ana koie ata da ari montarima rua rewu doi wulaa ronga kanahi, ‹ Apua, doi da orua rewu mi'ari moweehaku, mi'ontoomo: laba da inawangku dahoo rua rewu penda. ›
23 Kanahiomo koie apuno, ‹ Moicoomo, co'o ata ngkototu ronga konianto'u. Hiuna mpinarasaeahako da te'ete, dahaku nta parasaeahako'o da me'alu. Pewisomo nunu'aku hai laro sanaa'angku. ›
24 Merumbui leuhomo koie ata da ari montarima doi asa rewu, kai kanahi, ‹ Apua, kuto'oricomiu miano da mosoko, da mongkotu na'iaa pohawuamiu, ronga montawuhako na'iaa potasu'amiu. 25 Kuna momee, dadi yahomo nde'e kaku lako wuniako doimiu bolo wita. Diemo, apua, doimiu. ›
26 Kanahiomo koie apuno, ‹ Co'o ata mosa'o ronga mongare! Nau da'a bara to'oriaku hicu pongkotu na'iaa pohawuangku ronga montawuhako na'iaa potasu'angku? 27 Kicana koie paraluu'o kau wiso'o doicu hai bank dungku kaku pohule, kaku tarimaa ronga bungano. ›
28 Kai tena'ira ko'ira atano meha kanahi, ‹ Mi'alaamo koie asa rewu doi wulaa, kami weehakono'o miano da modio hopulu rewu doi wulaa. 29 Kana'umpe naiho da mompokodio, dahoo nta pinoweehi kai me'a-me'alupo. Sawali inaiho da sai mompokodio, da pinokodiono dahoo nta inala mpiha. 30 Ronga koie ata da sai koguna mihawiakomo dahano dompa rondoma, kokeenamo dahano perurumatea ronga pompokiki'a baka. › »
Pe'adili'a ki oleo kiama
31 « Ki dungku nta leuhano Ana Nto Manusia da pinoko'owose merongahira luwuo mala'ekatino, nta totoro'ano hai kadera mpomokole'ano da tereree. 32 Luwuo suku dahoo nta tekongko hai ulu ra'ino. Yahopo kai tila orua'o kana-kana miano mpompakani tindahako dombano ronga wembeno. 33 Miano da pinarereako kana domba dahoo nta tinindahako hai muanano ronga da kana wembe hai suwano.
34 Sa'arino koie mokole dahomo nta kanahi hai ko'ira miano da hai muanano, ‹ Mimeleumo pera da nibarakatino Tamangku. Tarimaa pomparentaano hi ari mompasadia'akomiu sa'isono da'a wita'ea. 35 Kana'umpe tempongku mokohuloo, comiu moweehaku mongkaa. Tempongku mokokondo'u, comiu moweehaku mondo'u. Tempongku tewali miano sumoo, comiu lawatiaku hai laicamiu. 36 Tempongku sai mepakea, comiu moweehaku babu. Tempongku morungku, comiu dodonganiaku. Tempongku tinorungku, leukomiu awaaku. ›
37 Yahopo ko'ira miano da nunu'o po'eheno Apu Alla kando daa nta molawani, ‹ Apua, nimpia kako ari ontokomiu mokohuloo, kako poweekomiu mohambuako, atawa mokokondo'u, kako poweekomiu mondo'u? 38 Nimpia kako ari ontokomiu kana miano sumoo, kako lawaticomiu hai laicamami? Nimpia kami ari sai mepakea, kako poweekomiu babu? 39 Nimpia kami ari morungku atawa metorungku, kako leu hai Comiu? ›
40 Koie mokole dahoo nta molawani, ‹ Santo'u-to'uahano Kupo'awaakokomiu: Hai hapa ariamiu moweweuhako da kana koie, mau ki te'asa miano raro mpetilaku da marasai die, kowatinomo himi weweuhakuo! ›
41 Yahopo kai daa nta kanahi koie mokole hai ira miano da meda'a hai suwano, ‹ Polaimo mebinta hai ra'incu, miano masilaka! Pewisomo bolo api da sai pinokopopate da ari pinasadia nta tarono ponggawano bilisi ronga mala'ekatino. 42 Kana'umpe tempongku mokohuloo, nami mpoweehaku mongkaa, kanapo Kumokokondo'u, nami mpoweehaku mondo'u. 43 Kutewali miano sumoo, nami lawatiaku hai laicamiu. Sai hina pakeaku, nami mpoweehaku pakea. Kumorungku ronga tetorungku, nami dodonganiaku. ›
44 Yahopo kando daa nta lawanio, ‹ Apua, nimpia kako ari ontokomiu mokohuloo atawa mokokondo'u atawa kana miano sumoo atawa sai mepakea atawa morungku atawa tetorungku, kasako da'a tulumicomiu? ›
45 Koie mokole molawani, ‹ Santo'u-to'uahano Kupo'awaakokomiu: Tempomiu sai ehe montulumi sala te'asa miano da marasai die, pengkenaamo hi sami ehe tulumiaku. › 46 Ko'ira miano dahira nta mo'awa karasai mobea da sai hina puraano, sawali miano da nunu'o parentano Apu Alla dahira nta mo'awa tora ngkaida'a. »