Nta nirowakiano raha mpesombaa
(Mk. 13:1-2; Luk. 21:5-6)
24
1 Sapeluarakonomo koie i Yesus mebinta hai uluano raha mpesombaa, kando meleu ana guruno tisu'akono'o pera laica pe'ompuno raha mpesombaa. 2 Kai koharatia, « Mi'ontoomo bara na'amiu ko'ira luwu? Santo'u-to'uahano Kupo'awaakokomiu: Nahina te'asa watu danta tesusu hai wawo sawatuno; luwuo dahoo nta nirowaki. »Petampu'uano karasai
(Mk. 13:3-13; Luk. 21:7-19)
3 Sa'arino koie, kai lako i Yesus totoro hai wawo ngkabumbu Zaitun, kando meleu ana guruno mogau'akono tesinca kanahi, « Po'awaakami, impia nta kadadiahano ronga hapa peto'ono nta leuhamiu ronga kompura-puraano die wita'ea? »
4 Kai polawani kanahi, « Mimpedagai kai osie da'a miano da pokomporekomiu! 5 Me'aluo miano danta leu meneehako neengku kanahi, ‹ I'akumo Mokole Pompokosalama! › Me'aluo miano danta pinokomporendo. 6 Dakomiu nta modeaho gorano mamusua ronga leleno, sawali mi'osie memomee. Luwuo koie dahoo nta kadadia, sawali na'iaapo kompura-puraano. 7 Kana'umpe me'asa wonua nta mamusu bali'o da me'asa wonua, ronga pada-pada mokole nta mpedaluhiramo. Me'aluo wonua danta konaa kemurota ronga lelu. 8 Sawali ko'ira luwu te'iaapo tampu'uno karasai, kana me'asa tina da metampu'u dedea ntia nta mompokohina.
9 Koie wotu dakomiu nta pinakasea, ronga pinepate, ronga luwu suku dahoo nta kokoleakomiu tendenomo himi nunu'aku, 10 ronga me'aluo miano danta tebalia parasaeano, kando mpekasoro-soroako hai pedalu ronga mpekokolea. 11 Me'aluo kanabi-nabii danta leu mompokompore miano me'alu. 12 Niweweu ngkabaria nta same'a-me'aluno dungku isa pekalolaroando miano me'alu. 13 Sawali miano da motende parasaeano dungku kompura-puraano, koiemo danta pinokosalama. 14 Lele Mohende dadaano pomparentaano Apu Alla nta nileleako hai upu-upuo wita, kai podeaho luwu suku, yahopo nde'e kai dungku kompura-puraano. »
Karasai owose ronga kanabi-nabii
(Mk. 13:14-23; Luk. 21:20-24)
15 « Dakomiu nta ontoo pososa'o da mowuwusei mentade hai rahano Apu Alla, kana haratia da ari pinokodungkuno nabii Daniela (kahioomo pera da mobasa die boku kai pekokooho batuano). 16 Sami ontoo koie, kahioomo miano da meda'a hai wonua Yudea kando mpolai hai tangkeno. 17 Miano da hai landa-landano laica,b osiemo mewiso hai bolo laica nta mo'ala hapa-hapano, 18 ronga miano da da'a hai uma, osiemo mohule mo'ala pinodaino.
19 Taperando nta marasai koie tempo tina da mentia ronga da metesusu. 20 Mi'amala, kimi daa nta molai kai osie konaa wula mokoseoha ronga osie konaa oleo mpekolia. 21 Kana'umpe koie tempo dahoo nta kadadia karasai owose da sai paisapo dadi sa'isono da'a wita'ea dungku diekana ronga da sai da'amo nta paisa kadadia pendua. 22 Ki sai da'a Apu Alla moko'okundaa tempono, te'asapo miano nahina danta salama. Sawali tendenomo umati nirurukino, yahomo kai daa nta poko'okundaa koie tempo.
23 Koie tempo ki daa miano da kanahi, ‹ Ontoopo, Mokole Pompokosalama dahoo diceena! › atawa da kanahi, ‹ Dahoo na'ai! › osie parasaea. 24 Kana'umpe dahira nta mesaba kaguru-gurusalama ronga kanabi-nabii. Dahira nta mompokoda'a peto'o owose ronga tinekangkaako kando akala'o umati nirurukino Apu Alla, kindo daa nta tule'i. 25 Peehawa'o! Kupo'awaakokomiu meri'ou hi sai da'apo kadadia. 26 Dadi, ki daa da kanahi, ‹ Ontoo, Mokole Pompokosalama dahoo hai lueno! › mi'osie lako. Atawa da kanahi, ‹ Ontoo, dahoo hai bolo suo! › mi'osie parasaea. 27 Kana'umpe ki daa nta leu Ana Nto Manusia, dahoo nta kana kila tepana molinyaa mebinta hai mata oleo dungku hai pada oleo. 28 Maina dahano wata mate dahanomo meda'a sico da mpongkaa bangke. » c
Leuhano Ana Nto Manusia
(Mk. 13:24-32; Luk. 21:25-33)
29 « Satekabuno koie karasai, oleo dahoo nta rondoma. Wotiti nai da'amo nta koniwinca, ronga olimpopo nta mentutuuna mebinta hai langi ronga ko'ira apuno laamoa dahira nta molelu. 30 Koiesi wotu kai inonto peto'ono Ana Nto Manusia hai langi, ronga luwu suku hai wita'ea dahira nta mperurumate, kando ontoo Ana Nto Manusia leu mewawono seru hai langi meronga kuasano ronga tereree'ano da owose.d 31 Kai tena'ira mala'ekatino mpeluarako ronga puurio torompe da owose unino, kando kongkosakohira miano nirurukino mebinta hai ko'opaa matano ngalu, mebinta asa tapuno wita dungku tapuno langi.
32 Po'alamo pompotisu mebinta hai keu ara: Samo'usono olota sampa ronga montampu'u kotuna, minto'oriomo hi okudamo wula modaraano oleo. 33 Kanamo koie na'ana kimi ontoomo luwuo da kadadia arumai, minto'oriomo hi okudamo tempono, hi daamo hai mata wamba. 34 Santo'u-to'uahano Kupo'awaakokomiu: Di'ira miano da tora diekana, nando da'apo nta mate luwu, ki sai ari luwu koie kadadia. 35 Langi ronga wita'ea dahoo nta isa, sawali haratiaku nai da'a nta paisa isa.
36 Nahina te'asa miano da to'orio oleono ronga wotuno, pera mala'ekati hai suruga, ronga Ana Nto Manusia nahina da to'orio, tabeano pantano Tamangku. »
Pe'oliwi kato mpedagai
(Mk. 13:33-37; Luk. 17:26-30, 34-36)
37 « Ki daa nta leu Ana Nto Manusia, nta kanasi dadaano nabii Nuh iponoha'ea. 38 Daanopo sai e'e waa owose, miano mempongkaa, mempondo'u, mengkawi ronga pinakawi, kana koie ngkaida'amo, dungku oleo mpewiso'ano i Nuh hai bolo bangkano. 39 Temponopo e'e waa lolowihira, yahopo kando mento'orio hi daa da kadadia. Kanamo koie na'ana ki daa nta leu Ana Nto Manusia. 40 Akoie tempo, ki daa orua miano da hai uma, me'asamo danta niwawa, me'asa danta nibintani. 41 Ki daa orua tina da meronga mogili, me'asa danta niwawa, ronga me'asa danta nibintani.
42 Dadi, mimpedagai, nasami da'a to'orio oleono nta leuhano Apumiu. 43 Mimpeehawa'o! Kicanano ntei laica dahoo to'orio damu opia malo kai daa nta leu miano mpononako, dahoo nta medagai kai osiesi mewiso hai laicano. 44 Nangkuamo koie, kami mpedagai na'amiu, kana'umpe Ana Nto Manusia ki daa nta leu, nahina da teto'o-to'ori. »
Parereno sangkinaa da konianto'u ronga da mosa'o banguno
(Luk. 12:41-48)
45 « Ki daa sangkinaa da konianto'u ronga motu'a mpinehawa, iaamo danta tinaarakono apuno nta wawaihira ko'ira sangkinaa meha ronga moweehira mpongkaa ki dungku tempono. 46 Konantuaraa sangkinaa da konainoo weweuho pohedoano kai leu apuno. 47 Santo'u-to'uahano Kupo'awaakokomiu: Koie apuno nta sai-saino tisu'o kai dagai'akono'o luwuo hapa-hapano. 48 Sawali ki tibo koie sangkinaa mosa'o banguno ronga kanahi hai larono, ‹ Nai da'apo nta oru leu apungku, › 49 yahopo kai petampu'u langkuihira ko'ira sangkinaa meha, naamo mongkaa ronga mondo'u meronga-ronga miano molangu. 50 Sawali dahoo nta leu apuno konaa oleo da sai tepatantu, ronga damu da sai tino'ori, 51 ronga dahoo nta pepatee ronga nta mokompengkenaa hukumano miano da mompe'anu-anuto'u. Kokeenamo dahano perurumatea ronga pompokiki'a baka. »