I Yesus pasala'ira guru agama ronga miano golonga Farisi
(Mk. 1:38-40; Luk. 11:37-52, 20:45-47)
23
1 Kai koharatia koie i Yesus hai miano me'alu ronga hai ana guruno, 2 « Guru agama ronga miano Farisi pinoweehi kuasa danta mompotisu parentano i Musa. 3 Nangkuamo koie, mimpodedeaho ronga nunu'o pera dahando tenakomiu. Sawali da niweweundo mi'osie monunuti; kana'umpe nasando da'a nunutio kana da pompotisudo. 4 Ira mompokompetagia miano da mohali ronga moweweu atora da mobea, sawali teponohapo koma nando paisa itaihira kando to'ori moweweuhako.5 Luwuo niweweundo te'iaasi nta popo'ontonio miano; kadu-kadu podioha burino ayati da nidaitakondo hai tapu ra'indo ronga hai limando pomperadamihira poko'owose'o kai ontoosi miano. Kanapo na'ana porambuino babundo da mentii pomperadamihira pokomentiiho.a 6 Hai ndo'ua po'ehendo totoro'a da moico, hai laica sambahea'a po'ehendo kadera da te'angga. 7 Taperando mohende ki sosampotae nte'angga'ira miano hai bolo ntadoha, ronga kindo nineehako tuangguru.
8 Sawali comiu mi'osie ehe nineehako tuangguru, kana'umpe gurumiu te'iaasi me'asa, ronga luwumiu mpetila. 9 Mi'osie meki'ama hai nai-naimo die wita'ea, kana'umpe Tamamiu te'iaasi me'asa, yahoo da hai bolo suruga. 10 Mi'osie ehe kimi nineehako tuangguru, kana'umpe gurumiu te'iaasi me'asa, yahoo Mokole Pompokosalama da ari nidandino Apu Alla. 11 Inai da owo-owose anggano hai comiu, yahomo danta tewali atamiu. 12 Miano da pa'angga'o wotoluno dahoo nta pinaruru, ronga miano da owawa larono dahoo nta pina'angga.
13 Masilakakomiu guru agama ronga miano Farisi, da mompe'anu-anuto'u! Comiumo da totampo'ira miano danta mpewiso hai pomparentaano Apuno suruga. Siangkopo pantamiu nami ehe mewiso, deenapo miano da mokea mewiso yahomo da lako tinotampomiu.
[ 14 Masilakakomiu guru agama ronga miano Farisi, da mompe'anu-anuto'u! Mirampasio laicando ntina walu, yahopo kami amala mentaa podampomiu sinalakimiu hai matando miano me'alu. Koiemo sababuno kami daa nta nihukuma kai mobea.]
15 Masilakakomiu guru agama ronga miano Farisi, da mompe'anu-anuto'u! Mokeakomiu saru mompolei tahi ronga metotonga wonua te'iaasi mompokompewiso te'asa miano hai agamamiu. Sapewisono nunukomiu koie miano hai agamamiu, nilakomiumo mokontewalio mianono naraka da luku mpenduapo mosa'ono ka'iaa comiu.
16 Masilakakomiu ponggawa mopusu, da mpompotisu'ako kana die: Ki petunda'ako miano raha mpesombaa, nai da'a nta modea ntunda, sawali ki petunda'ako wulaa da hai bolo raha mpesombaa, dahoo nta modea ntunda. 17 Comiu miano mpore ronga da mopusu! Maina da kontu'uma te'angga: wulaa atawa raha mpesombaa? Mainakaa koie raha mpesombaa da pokonte'angga'o koie wulaa.
18 Dahoo penda pompotisumiu: Ki petunda'ako miano pontunua pesomba, koie miano nai da'a nta modea ntunda; sawali ki petunda'ako pesomba da hai wawono koie pontunua pesomba, dahoo nta modea ntunda. 19 Taperamiu mopusu! Maina da kontu'uma: pesomba atawa pontunua pesomba? Mainakaa koie pontunua pesomba da pokonte'angga'o koie pesomba. 20 Nangkuamo koie, ki daa te'asa miano da metunda'ako pontunua, batuano iaa metunda'ako pontunua ronga luwuo pesomba da da'a hai wawono. 21 Ronga ki daa miano da metunda'ako raha mpesombaa, koie batuano metunda'ako raha mpesombaa, ronga Apu Alla da da'a hai bolono. 22 Ronga ki daa te'asa miano da metunda'ako suruga, koie batuano metunda'ako kaderano Apu Alla ronga da totoro hai wawono koie kadera.
23 Masilakakomiu guru agama ronga miano Farisi, da mompe'anu-anuto'u! Pera giuno ponahulib dakomiusi tompa'o tila hopuluno hai Apu Alla. Sawali da kolalo kontu'uma hai larono agama, kanano mongkote, kopololaro, konianto'u, nami giu'o. Santo'u-to'uahano, ko'ira parenta da kontu'uma paraluu kami weweuho, ronga meha-mehano mi'osie limpakio. 24 Comiu ponggawa mopusu! Mi'oniniomo buroto da hai bolo ntondemiu, sawali yo unta da owose'ea dakomiusi udooho.
25 Masilakakomiu guru agama ronga miano Farisi, da mompe'anu-anuto'u! Bungkuno mangkoonamiu ronga pirimiu milodiuho kai mowua, sawali larono taperano sadaka pono'ako inala mperukusi ronga korotoamiu. 26 O miano Farisi mopusu! Lodiuho meri'ou larono mangkoonamiu dahomo nta itai mowua ronga bungkuno.
27 Masilakakomiu guru agama ronga miano Farisi, da mompe'anu-anuto'u! Comiu kana to'u koburu da ari pinarada mopila, hai bungkuno moicoo, sawali hai bolono pono'ako wuku ronga luwuo pera da tewuha. 28 Kanamo na'amiu: Hai bungku, ki ontokomiu miano, moicoo, sawali pelaroamiu taperano da mompe'anu-anuto'u ronga sa'ia-iaa.
29 Masilakakomiu guru agama ronga miano Farisi, da mompe'anu-anuto'u, himi mpoweweu koburundo nabii ronga miano da ari tora moico naamo maiasando dakomiusi bunga-bungaa. 30 Kanahimiu, ‹ Kico daapo rodahira mbuemami iponoha, nako da'a nta itai mompepate raro nabii. › 31 Dadi, mimangaku pantamiu hicuamo comiu leedo miano da ari mpompepate raro nabii! 32 Kicana koie, mi'osie bintaa niweweu ntesala da ari tinampu'uno pembue'amiu! 33 Comiu ule molori leeno ule molori. Osie momperahi-rahi kanahi, dakomiu nta to'ori pokosalama'o wotolumiu mebinta hai naraka.
34 Podedeaho moi-moico. Dahaku nta montena'akomiu nabii, miano da motu'a mpinehawa, ronga guru agama. Asa ntilara dakomiu nta mepatehira, ronga asa ntilara dakomiu nta basiropahira, naamo mehano dakomiu nta rorasaihira hai laica sambahea'a, ronga dakomiu nta lulu'ira mebinta hai me'asa kota dungku suere kota. 35 Nangkuamo koie, dakomiu nta nihukuma tendenomo pera miano da pinepatemiu ronga da pinepatendo pembue'amiu. Aricomiu mompepate miano da sai hina sinalakino, metampu'u hai Habel da sai hina salano, dungku Zakharia anano Berekhya da ari pinopatemiu olotano raha mpesombaa ronga pontunua pesomba. 36 Santo'u-to'uahano Kupo'awaakokomiu: Luwuo akoie dakomiu nta dudunduo, comiu miano diekana-kana! »
I Yesus lolaroo kota Yerusalem
(Luk. 1:34-35)
37 « O miano Yerusalem, miano Yerusalem, comiu da pepatehira raro nabii ronga watuihira miano da tinena leu hai comiu! Manturu'akumo mokea kongkosakohira anamiu, kana tina manu da kongkosako anano hai tonto panino, sawali nasami ehe. 38 Mi'ontoomo die raha mpesombaamiu dahoo nta nibintani kai mongio. 39 Kupo'awaakokomiu: Metampu'u diekana-kana, nami da'amo nta paisa ontoaku dungku kai leuho dahamiu nta kanahi: Nibarakati'o miano da leuhako neeno Apu. »c