Parereno ndo'ua kawi'a
(Luk. 14:15-24)
22
1 Yahopo koie i Yesus kai pomparereakondo penda kanahi, 2 « Dadaano pomparentaano Apuno suruga yahoo kana me'asa mokole da mendo'uahakono anano. 3 Kai tena'ira sangkinaano boboihira miano da ari tinitia leu hai ndo'ua, sawali ko'ira miano nando ehe meleu. 4 Kai tena'ira penda sangkinaano meha kanahi, ‹ Po'awaakondo ko'ira miano da ari tinitiangku: Santo'u-to'uahano, pompetokangku tepasadia'omo, poso'eangku ronga ana sapi molombi ariakumo sumbele'o, luwuo mondo'omo, mileumo hai ndo'uangku. ›5 Sawali ko'ira miano da tinitia nando mpompaduli: dahoo da lako hai galuno, dahoo da lako urusio pohedoano, 6 meha-mehano rorako'ira ko'ira sangkinaano koie mokole, pakaseahira ronga pepatehira. 7 Yahopo kai masusa koie mokole, kai tena'ira surudaduno lako pepatehira ko'ira miano pompopate ronga tunuo kampodo.
8 Sa'arino koie, yahopo kai po'awaakondo sangkinaano, ‹ Ndo'ua tepasadia'omo, sawali da tinitia nando pantasi mera'iako hai aku. 9 Milakomo hai koa-koa'o sampano sala kami ntitiahira pera miano da inawamiu kando meleu hai ndo'ua. › 10 Yahopo kando melako ko'ira sangkinaano hai sampano sala kongkosakohira pera miano da inawando, da mosa'o banguno ronga da moico banguno, dungku kai pono nde'e koie bantea ndo'ua.
11 Tempono koie mokole mewiso nta tepo'awaakondo mianoi ndo'ua, kai ontoo me'asa miano da sai mepakea ndo'ua. 12 Kanahiomo, ‹ O tokia, hapa kau leu nau da'a mepakea ndo'ua? › Sawali koie miano tara'usa mengio. 13 Yahopo kai tena'ira sangkinaano, ‹ Pungoo karuno ronga limano kami ntaburako dahano dompa rondoma, kokeenamo dahano perurumatea ronga pompokiki'a baka. ›
14 Kana'umpe me'aluo da kinebai, sawali te'ete'o da teruruki. »
Mesima hai mokole'eano Roma
(Mk. 12:13-17; Luk. 20:20-26)
15 Yahopo miano golonga Farisi mempogau'ako kando to'ori akala'o kai dungku sala mpogau'a. 16 Kando tena'ira ana gurudo ronga anabuano mokole Herodes kando lako metukanaiho, « O tuangguru, koto'oriosi hicua comiu miano mongkote ronga montulokomiu himi mpompotisu miano kai nunu'o da po'eheno Apu Alla, ronga hi sami pompaduli atawa meruruki miano. 17 Kana'umpe po'awamiu: Tewalio bara mowada sima hai mokole'eano Roma atawa nai tewali? »
18 Sawali koie i Yesus nanto'orio akalado da mosa'o, koharatia'omo, « Hapa kami daa soba-soba'aku, comiu miano da mompe'anu-anuto'u? 19 Ndoka wawaakuo koie doi mpowadamiu sima. » Kando wawaakono'o nde'e asa doi pera. 20 Yahopo kai petukanaihira, « Gambarano inai ronga inai da teburi neeno die hai doi? »
21 Polawanindo, « Gambarano ronga neeno mokole'eano Roma. »
Kai po'awaakondo i Yesus kanahi, « Miweehakono'o anuno mokole'ea, ronga miweehakono'o na'ana tarono Apu Alla. » 22 Sando podeaho ko'ira miano, nilakodo mentekangka kando melako bintanio.
Petukana dadaando miano mate kindo mpewangu
(Mk. 12:18-27; Luk. 20:27-40)
23 Koie oleo kando meleu hai Yesus miano golonga Saduki, da sai akui'o hindo mpewangu miano mate. Kando petukanaiho kanahi, 24 « O tuangguru, pompotisuno i Musa kana die: Ki tibo tama mate, nahina anano, petilano paraluu'o kai kawinio waluno kai to'ori da'a leeno koie petilano da mate. a 25 Na'ai dahira opitu tama mpetitilado. Da tetukaka kawi kai mate nai podio lee. Yo waluno pinakawi hai tuaino. 26 Kana koiemo dadaano mebinta hai tuaino da ko'orua, da ko'otolu, dungku da ko'opitu. 27 Kompura-puraano kai mate na'ana koie tina. 28 Larono opituhira koie mpetila, inaimo kontu'uma samporano koie tina ki dungkumo oleo mpewanguando miano mate? Hindona ari mpesamporaiho luwundo. »
29 Kai lawanihira koie i Yesus, « Dakomiu tesala, tendenomo nasami nto'orio haratiano ronga kuasano Apu Alla! 30 Kana'umpe ki oleo mpewangua, nahinamo danta kawi atawa pinakawi, sawali nta tora kana mala'ekati hai suruga. 31 Sawali dadaando miano mate hindo mpewangu, nami da'a bara basaa haratiano Apu Alla kanahi: 32 ‹ Akumo Apu Alla Apuno i Ibrahim, Apuno i Ishak, ronga i Apuno Yakub? › Apu Alla na'iaa Apuno miano mate, sawali yahoo Apuno miano ntora. » b
33 Miano me'alu da modeaho nilakodo mentekangkaako pompotisuno.
Parenta da kontu'uma
(Mk. 1:28-34; Luk. 10:25-28)
34 Sando podeaho ko'ira miano golonga Farisi hi tibo koie i Yesus mokobangaohira miano golonga Saduki, nilakodo mentekongko, 35 ronga dahoo me'asa guru agamano miano golonga Farisi da metukana nta soba-soba'o, 36 « O tuangguru, parenta hapa da kontu'uma hai bokuno nabii Musa? »
37 Kai polawani, « Lou'o Apu Alla Apuu, asa mpelaroau ronga asa sangkoleou ronga pera ponto'oriu.c 38 Koiemo parenta da kontu'uma ronga da lamoro me'asa. 39 Ronga parenta ko'orua, da pengkenanosi yahoo: Lolaroo simbau'u kana tongko wotoluu.d 40 Ko'orua petena die da ulea mponohaamo luwu parenta da teburi hai bokuno nabii Musa ronga bokuno pera nabii. »
I Yesus leeno i Daud
(Mk. 12:35-37; Luk. 20:41-44)
41 Konaa ntekongkoando miano golonga Farisi, kai petukanaihira koie i Yesus kanahi, 42 « Kana'umpe po'awamiu mekona hai Mokole Pompokosalama? Leeno inai koie? »
Polawanihiramo kanahi, « Leeno i Daud. »
43 Koharatia'omo i Yesus, « Kicana koie, hapa sababuno Sangkoleono Apu mokonto'orio i Daud kai peki'apu hai Mokole Pompokosalama kanahi, 44 ‹ Apu Alla koharatia hai Apungku: Totoromo hai muanangku, dungku pera bali'u Kudiohira hai tonto karu'u. › e 45 Dadi, ki tibo i Daud neehakono'o Apuno, kana'umpemo kaicuasi penda leeno? » 46 Nahina te'asa miano da tule'i molawani, ronga metampu'u koie oleo nahina te'asa miano da moseka metukanaiho penda.