I Yesus nilawati hai Yerusalem
(Mk. 11:1-11; Luk. 19:28-40; Yah. 12:12-19)
21
1 Sadungkudo koie i Yesus ronga ana guruno hai kampo Betfage pu'u ntangkeno Zaitun okudahio Yerusalem, kokeenamo pontena'ano orua ana guruno lako teperi'ou. 2 Kanahino, « Milakomo hai kampo da nirora'into, dakomiumo nta ontoo me'asa kolodai da tekoo dahoo anano. Miwuwuhiomo kami wowahira na'ai. 3 Ki daa miano da metukana, mimpo'awaakono, ‹ Apu da paraluukio. › Dahomo nta nilakono wukahiakomiu'o. »4 Koie da kadadia pekonaanomo hapa da ari kanahino Apu Alla kana da pinokodungkuno nabii, yahoo:
5 « Po'awaakondo ihino kota Sion.a
Ontoomo, mokolemiu leu hai comiu!
Taperano moluu larono
kai pe'ulea hai kolodai, ronga anano. »b
6 Lako'iramo ana guruno nunu'o koie petenano. 7 Ndowawaamo koie kolodai ronga anano. Kando lapa'akono'o babundo, yahopo kai pe'ulea koie i Yesus. 8 Me'alu to'uo miano da woleako babundo hai wawo batatana, meha miano lako'iramo mpolasiki rumpa kando daa rambahako hai bolo sala.c 9 Miano me'alu da mperi'ou ronga da mperumbuihakono koie i Yesus, mempogora'iramo kanahi,
« Sombaa leeno mokole Daud!
Nibarakati'o miano da leuhako neeno Apu! d
Sombaa Apu da hai montoehano! »
10 Satesoopakondomo hai kota Yerusalem, kando tekangka miano ngkapa mpetukana, « Inaiho koie miano? »
11 Kanahi'iramo ko'ira miano me'alu, « Adiemo Yesus, nabii da mebinta hai Nazaret wonua Galilea. »
I Yesus mokowuaho raha mpesombaa
(Mk. 11:15-19; Luk. 19:45-48; Yah. 2:13-22)
12 Satelaroakono koie i Yesus hai uluano raha mpesombaa, kai saarihira pera miano da mpobalu ronga da mpo'oli kokeena. Kai bantule'o ko'ira meda mpontuka'ando doi ronga totoro'ando mpobalu ticokou. 13 Kai koharatia, « Dahoo teburi hai Boku Haratiano Apu Alla kanahi, ‹ Rahangku nta neeno yahoo laica amalaa, › sawali icomiu mina weweuho poo'iahando parampo. »e
14 Kando meleu ko'ira miano mopusu ronga da upi ngkaru hai Yesus hai uluano raha mpesombaa kai pokontidohira. 15 Sawali ko'ira kapala pua'ima ronga guru agama Yahudi mosa'ondoo hindo ontoo niweweuno koie i Yesus da tinekangkaako, ronga anadalo da mpogora hai uluano raha mpesombaa kanahi, « Sombaa leeno i Daud! » 16 Kando anuo koie i Yesus, « Nami da'a bara modeaho hapa da kanahindo ko'ira anadalo? »
Kai lawanihira, « Dahakusi modeaho. Nami mpaisapo bara mobasa haratia da kanahi: ‹ Aricomiu mompasadia poreree mebinta hai ana'ate'ete ronga ana'ate da mesuusu. ›? » f 17 Kai peluarako bintanihira hai Yerusalem kai lako hai kampo Betania ronga kokeenamo poturiano.
I Yesus montundari keu ara
(Mk. 11:12-14, 20-24)
18 Sadumondono laro mpohule'ano i Yesus hai kota, kai mokohuloo. 19 Kai ontoo asa pu'u ngkeu ara hai pampa sala kai lako hai pu'uno, sawali nai te'asa wukupo koma wuano, te'iaasi riri mpena.g Kanahiomo i Yesus koie hai keu, « Co'o nau da'amo nta paisa kowua samengka-mengkauno. » Nilakono koie keu ara moleu.
20 Sando ontoomo ko'ira ana guruno hapa da kadadia, kando mebanga kanahi, « Kana'umpe koie keu ara kai tade-tadeno moleu? »
21 Kai lawanihira koie i Yesus, « Santo'u-to'uahano Kupo'awaakokomiu: Kimi mparasaea ronga sai bata-bata, dakomiumo nta tule'i moweweu hapa Ku'ari weweuho die keu ara. Ronga na'iaa te'iaasi koie, deenapo nta tena'o koie tangkeno kai polinca tehawiako hai bolo ntahi, dahoo nta menona dadi. 22 Hapa da pino'itamiu kimi me'amala, dahoo nta tetarima sawali kimi mparasaea. »
Petukana pebintaano kuasano i Yesus
(Mk. 11:27-33; Luk. 20:1-8)
23 Sapewisonomo koie i Yesus hai uluano raha mpesombaa kai pompotisu. Dahomo konainoo mompotisu kando meleu raro ngkapala pua'ima ronga kamotu'ano miano Yahudi mpetukana, « Kuasano inai kami ntule'i moweweu da niweweumiu? Inai da moweekomiu koie kuasa? »
24 Polawaniomo koie i Yesus, « Dahaku na'angku nta mosabahako te'asa petukanangku hai comiu. Kimi lawaniaku, dahaku nta mo'awaakomiu inaiho da ari moweehaku koie kuasa. 25 Inaiho da tena'o i Yahya pompobaho kai pobaho? Apuno suruga atawa manusia? »
Yahopo nde'e kando mpekapetukanai kanahi, « Kito kanahi, ‹ Apuno suruga, › dahoo nta kanahi, ‹ Yo hapa kasami ehe parasaeaho? › 26 Sawali kito kanahi, ‹ Manusia, › momeekita hai miano me'alu, kana'umpe luwu miano poneendo koie i Yahya yo nabii. »
27 Dadi, ndolawaniomo koie i Yesus, « Nako da'a to'orio. »
Kai po'awaakondo, « Kicana koie, naku da'a na'angku nta mo'awaakomiu inaiho da ari moweehaku kuasa kaku to'ori hedoo koie da niweweungku. »
Parereno orua anadalo
28 « Kana'umpe ona po'awamiu dadaano: Me'asa miano dahoo orua ana ntamano. Kai lako hai anano da tetukaka kai tena'o kanahi, ‹ Die oleo lakomo mohedo hai uma angguru. ›
29 Polawanino, ‹ Kuda'asi. › Nangkuamo perumbuino kai pesosoori yahopo kai lako.
30 Yahopo penda kai lako tena'o anano ko'orua kana hai anano da tetukaka. Kai polawani koie anano, ‹ Dahakusi, ama, › sawali nai da'a lako. »
31 Kai petukana i Yesus hai ira ponggawano miano Yahudi kanahi, « Ko'orua anadalo koie, inaimo da nunu'o po'eheno tamando? »
Polawanihiramo, « Da tetukaka. »
Koharatia'omo koie i Yesus, « Santo'u-to'uahano Kupo'awaakokomiu, miano mpontagi sima ronga tina endeo, i'iramo nta meri'ou mewiso hai pomparentaano Apu Alla ka'iaa comiu.h 32 Kana'umpe Yahya pompobaho leu tisu'akomiu'o bangu da tekona, nami ehe parasaeaho, sawali miano mpontagi sima ronga tina endeo parasaeaho. Ronga comiu, mau kimi ontoo hindo mpoboli'imo, nami ehe manda ronga nami parasaeaho. »
Parereno miano mpohedo uma angguru
(Mk. 12:1-12; Luk. 20:9-19)
33 « Mimpodedeahomo penda die me'asa parere. Dahoo me'asa apuno wita da mombulaiho umano angguru, ario walaa kai tomu ronga mongkekei bolo pompio'ano wua angguru, yahopo penda kai powangu olompu mpodaga'a da montoe. Sa'arino koie, kai pasewaa hai ira miano da biasa mpe'uma angguru, yahopo nde'e kai lako hai suere wonua.i
34 Saleuho wula mpe'upuiha angguru, pontena'omo koie apuno wita kando lako atano tarimaakono'o tila angguruno hai miano da hedoo. 35 Sawali ko'ira miano da hedoo koie uma ndona lawa rako'ira ata ntinenano koie apuno wita: da me'asa nilangku, suereno pinepate, me'asano penda nidodoriako watu. 36 Koie apuno wita pontena'omo penda atano suere da me'a-me'alupo ka'iaa isono. Sawali pengkenaasi poweweundo. 37 Perumbuino koie apuno wita tena'akondo'omo ana pine'ihino, kanahino, ‹ Dahiramo nta pa'angga'o anaku. ›
38 Sawali sando ontoo hicuamo anano, mengkanahi'iramo, ‹ Koiemo nta tewali apuno, tompepateemo kato alaa wita nta tilarino. › 39 Kando rako'o ronga hawiako hai bungku walano koie uma, yahopo kando pepatee. »j
40 Petukanaihiramo koie i Yesus, « Ki leumo koie apuno uma hapa nta poweweuno ko'ira da hedoo wita? »
41 Polawanihiramo, « Dahoo nta gasa'ira ko'ira miano mosa'o dungku sampe mate, ronga uma angguruno dahomo nta pasewaa hai suere miano danta konianto'u tila'o wuano koa wotuno. »
42 Koharatia'omo koie i Yesus, « Nami mpaisapo bara basaa da teburi hai Boku Haratiano Apu Alla:
‹ Watu da ari hinawiakondo tuka,
tewaliomo watu mpompu'ui.
Yahomo da ineheno Apu Alla,
nangkuamo kai tekangkaako matanto. › k
43 Nangkuamo koie, Kupo'awaakokomiu: pomparentaano Apu Alla dahoo nta inala mebinta hai comiu kai weehakondo'o suere suku danta ehe nunu'o petenano. [ 44 Miano da tuuna hai wawono koie watu dahoo nta telolotu ronga inai da nidapono koie watu dahoo nta mopuro. »]