Parereno miano da mpo'oleo gadi hai uma angguru
20
1 « Kana diemo parereno pomparentaano Apuno suruga: Dumondo'ea kai peluarako koie apuno uma angguru mo'u'ungke miano danta mohedoakono. 2 Samentepokonando asa doi pera asa oleo, nilakono tena'ira kando lako hai umano. 3 Telaa-laa oleo peluarakoomo penda koie apuno uma, kai ontohira miano suere hai tadoha da sai kopohedoa. 4 Kai kanahi, ‹ Milakomo na'amiu mohedoakuo hai uma angguruku kaku gadicomiu kana biasano. › 5 Yahopo kando lako. Totoro oleo ronga owawa oleo kai peluarako penda koie apuno uma dada'iaamo niweweuno.6 Nta kiniwiahomo kai peluarako penda kai awahira miano suere da sai kopohedoa kai petukanaihira, ‹ Hapa kami mpoo'ia mpena na'ai asa oleo? ›
7 Kando mpolawani kanahi, ‹ Nahina miano da mokompohedokami. ›
Kanahiomo, ‹ Milakomo na'amiu mpohedoakuo hai uma angguruku. ›
8 Sakiniwiano nde'e, koie apuno uma tena'o mandorono, ‹ Boboihiramo da mpohedo kau wada'ira metampu'u da leu merumbui dungku da leu meri'ou. › 9 Kando leu da metampu'u mohedo nta kiniwiahomo, kando niwada tee'asa doi pera.
10 Tempondo leu da mpohedo mebinta dumondo, pomperahi-rahindo dahira nta mo'awa me'a-me'alupo, sawali dada'iaamo tee'asa doi pera. 11 Tempondo tarimaa gadindo, nilakodo leu mpengungu hai apuno uma kanahi, 12 ‹ Comiu wada'ira da mpohedo mperumbui te'iaasi asa damu pengkenaasi cami da mpohedo mobea ronga mepu'ai tuntu oleo. ›
13 Sawali apuno uma nalawanio koie miano, ‹ O tokia, naku da'a sai adili hai co'o. Na'iaa bara niboboto'akonto asa doi pera larono me'asa oleo? 14 Alaamo gadiu kau lako. Kupoweehira na'anda da mpohedo mperumbui kana gadiu nangkuamo po'ehengku. 15 Malenguakuomo po'atoroku hapa-hapangku nunu'o po'eheno larongku! Atawa nasinggirako, hicuna ngkolaro? › »
16 Kai koharatia i Yesus, « Kanamo die, miano da merumbui dahoo nta meri'ou ronga miano da meri'ou dahoo nta merumbui. »
Kompentolunomo i Yesus tuluraa nta karasaino
(Mk. 10:32-34; Luk. 18:31-34)
17 Dahomo koie i Yesus hai bolo sala me'o'ala hai Yerusalem, kai boboi ntesincahira ana guruno da hopulu ka'orua kai po'awaakondo, 18 « Diekana dakitamo mpe'o'ala hai Yerusalem ronga kokeenamo dahano nta sinoro Ana Nto Manusia hai ira kapala pua'ima ronga guru agama, ronga dahanomo inotuhi nta nimateakono. 19 Dahanomo nta sinoro hai miano da sai to'orio Apu Alla. Dahandomo nta poko'anu-anuo, rorasaiho, kando basiropaa hai keu mpinotalambe dungku mate. Sawali oleo ko'otolu, dahosi nta niwangu mbule. »
Pino'itano tinano Yakobus ronga Yahya
(Mk. 10:35-45)
20 Yahopo samotu'ano i Zebedeus ronga ko'ira anano kando leu hai Yesus, kando mpesomba hina daa da pino'itando. 21 Kai petukana koie i Yesus, « Hapa da pinokeahakou? »
Polawanino koie tina, « Poweehira totoro'a di'ira anaku, me'asa hai muanamiu ronga me'asa hai suwamiu, hai laro pomparentaamiu danta leu. »
22 Sawali polawanino koie i Yesus kanahi, « Nami da'a to'orio da pinokeahakomiu. Tule'icomiu bara mondo'u hai pondo'ua ngkarasai danta nindo'ungku? »
Kando lawanio kanahi, « Tule'icami. »
23 Kai po'awaakondo koie i Yesus, « Hai pondo'uangku dakomiu nta mondo'u keena, sawali nta totoro hai muanangku atawa hai suwangku, naku tule'i nta mompoweehiako. Dahosi Tamangku nta weehakondo'o miano da pinasadia'ako. »
24 Sando podeaho ko'ira ana guruno da hopulu, nilakodo sosa'oki laroihira ko'ira miano metitilado. 25 Sawali koie i Yesus naboboihira luwundo kai kanahi, « Dakomiumo to'orio, mokoleno suku suere kuasai to'uhira mianono ronga ko'ira ponggawa mokoraa pomparentando. 26 Sawali comiu nai tewali kana koie. Deenapo inai da mokea owose hai comiu, kahioomo kai tewali sangkinaamiu. 27 Ronga inai da mokea te'a-te'angga, kahioomo kai tewali atamiu, 28 kana Ana Nto Manusia nai da'a leu kai kosangkinaa, sawali kai tesangkinaa, ronga kai soroo penaano nta pohudano miano me'alu mebinta hai sinalakindo. »
I Yesus mompokontido orua miano mopusu
(Mk. 10:46-52; Luk. 18:35-43)
29 Tempondo koie i Yesus ronga ana guruno bintanio kota Yerikho, nilakodo miano me'alu mperumbuihakono. 30 Dahoo orua miano mopusu da totoro hai wiwi sala modedeaho ki tealo koie i Yesus, kando pehohou, « Apua, leeno i Daud, lolarokami! »a 31 Ko'ira miano me'alu i'ireihira ronga tena'ira mengio. Sawali sapeko-pekorando mehohou, « Apua, leeno i Daud, lolarokami! »
32 Kai todo koie i Yesus kai boboihira kanahi, « Hapa da po'ehemiu kaku weweuhakomiu'o? »