Dadaano tineposincaako
(Mk. 10:1-12)
19
1 Sa'arino koie i Yesus mompotisu kokeena, bintaniomo wonua Galilea kai lako hai wonua Yudea asa poleno laa e'e Yordan. 2 Me'alu to'uo miano da nunu'o kai pokontidohira kokeena.3 Kando meleu miano golonga Farisi mpetukana, patudundo nta soba-soba'o, kanahi, « Po'eheno sarano agamanto, tewaliosi bara koie tama kai bintaa samotu'ano tendenomo hapa-hapa'atesi? »
4 Kai polawani i Yesus kanahi, « Matantuomo aricomiumo basaa haratia da kanahi: ‹ Iso-isono Apu Alla weweuhira tama ronga tina. › a 5 Ronga haratia ko'orua kanahi, ‹ Nangkuamo yo tama kai daa nta bintaa tamano ronga tinano, kai boboto'akono samotu'ano, yahopo orua'ira kando tewali asa wotolu. › b 6 Dadi, na'iaamo orua miano, sawali me'asamo. Nangkuamo koie, hapa da ari pinokobobotono Apu Alla nai tewali posincaa miano. »
7 Yahopo kando mpetukana ko'ira miano golonga Farisi kanahi, « Kicana koie, kana'umpe nabii Musa kai petena moweweu sura ntineposinca ki daa tama nta bintaa samotu'ano? » c
8 Kai polawani i Yesus, « Kai palalesakomiu i Musa bintanio samotu'amiu, tendenomo himi lalo'ea masusa pinaguru, sawali iso-isono na'iaa kana koie. 9 Sawali Kupo'awaakokomiu, inai da bintaa samotu'ano, mainakaa koie samotu'ano nai da'a meduluakono da sa'iaa samporano, kai pongkawini tina suere, koiemo tama da moweweu ngkabaria. »
10 Yahopo kando mengkanahi ana guruno Yesus, « Kicanamo koie dadaano mesamotu'a, nta moicoano osiemo mesinca. »
11 Sawali nalawanihira, « Nai da'a luwu miano nta mongkurami nunu'o koie haratia, tabeano miano da ari pinatantuno Apu Alla. 12 Kana'umpe dahoo miano da sai tule'i mesinca hina mebinta sa'isono tehina nai koa. Dahoo penda da sai tule'i mesinca tendenomo poweweuno suere miano. Dahoo penda miano da moruruki sai nta mesinca kai tepoweweusi nunu'o petenano Apu Alla. Inaiho da kuramio die pompotisu, kahioomo kai nunu'o. »
I Yesus mobarakati ana'ate
(Mk. 10:13-16; Luk. 18:15-17)
13 Yahopo kando meleu ko'ira miano mpowawaakono ana'ate kai dampasako peleno hai rapando ronga amalaakondo, sawali raro ana guruno ndona awaihira ko'ira miano. 14 Yahopo i Yesus kai po'awaakondo ana guruno, « Poturusihiramo ko'ira ana'ate kando meleu hai Aku! Mi'osie tabe'ira, kana'umpe miano da kana di'ira yahomo danta merapio pomparentaano Apuno suruga. » 15 Sa'arino dampasako peleno hai rapando barakati'ira, yahopo kai lako.
Tora mongura da kawasa
(Mk. 10:17-27; Luk. 18:18-27)
16 Dahoo me'asa miano da leu metukanaiho i Yesus kanahi, « O tuangguru, yo hapa nta niweweungku da moico kaku to'ori mo'awa tora ngkaidaaha? »
17 Polawaniomo koie i Yesus, « Yo hapa kau daa metukanaihaku niweweu hapa da moico? Te'iaasi me'asa da moico. Kiu daa mokea tora ngkaida'a, nunu to'uo parentano Apu Alla. »
18 Petukanaamo koie miano, « Ki parenta mainamo koie? »
Koharatia'omo koie i Yesus, « Osie mompepate, osie meduluakono da sa'iaa samporau, osie mononako, osie mesaksii ngkule, 19 pa'angga'o tamau ronga tinau, lolaroo simbau'u kana tongko wotoluu. » d
20 Polawaniomo koie tora mongura, « Luwu koie parenta dahakumo nunu'o. Hapapo penda da sai koa? »
21 Kai polawani i Yesus, « Kiu daa mokea mondo'ako pololaro, pohulemo kau balu'o luwuo kawasau, kau titila'akondo'o miano ngkadee-dee, dakomo nta awaa kawasa hai suruga. Sa'ariu koie, leumo kau nunu'aku. »
22 Sapodeaho koie tora mongura, kai lako ronga mopoe larono, hina me'alu inawano. 23 Yahopo koie i Yesus kai anuhira ana guruno, « Santo'u-to'uahano Kupo'awaakokomiu: Mohalio pewiso'ano miano ngkawasa hai pomparentaano Apuno suruga. 24 Kupo'awaakokomiu, mobu-mobunaa yo unta molaahi birino seu, ka'iaa miano ngkawasa nta mewiso hai pomparentaano Apuno suruga. »
25 Sando podeaho koie ana guruno i Yesus, taperando tekangka ronga kanahi, « Kicana koie, inaihomo nde'e danta salama? »
26 Kai o'ontohira koie i Yesus ronga koharatia, « Kicua manusia nai tule'i, sawali kicua Apu Alla nahina da sai tule'i. »
Tilano miano da nunu'o i Yesus
(Mk. 10:28-31; Luk. 18:28-30)
27 Yahopo kai polawani koie i Petrus kanahi, « Kobintaniomo nde'e luwu kako nunukomiu, hapamo nta pinelawemami? »
28 Koharatia'omo koie i Yesus, « Santo'u-to'uahano Kupo'awaakokomiu: Hai dunia ntonia danta leu, dahoo nta totoro Ana Nto Manusia momparenta hai kadera pomokole'ano. Koie tempo comiu da nunu'aku dakomiu nta totoro hai kadera pomparentaa, kami mparentahira da hopulu orua sukuno miano Israil.e 29 Ronga pera miano da bintaa laicano, petilano tama atawa tina, tamano, tinano, raro anano, atawa umano, tendenomo hi nunu'aku, perumbuino dahirasi nta mo'awa luku asa etuno ronga nta mo'awa tora ngkaida'a. 30 Sawali me'aluo miano da meri'ou diekana nta tebalia kai tewali da merumbui, ronga da merumbui diekana dahoo nta tebalia kai tewali da meri'ou. » f