Inai da owo-owose hai pomparentaano Apuno suruga
(Mk. 9:33-37; Luk. 9:46-48)
18
1 Koie tempo meleuhiramo ana guruno i Yesus kando mpetukana, « Inaihomo da owo-owose hai pomparentaano Apuno Suruga? »2 Yahopo i Yesus kai poboboi me'asa ana'ate, kai tena'o mentade hai tongado, 3 kai kanahi, « Santo'u-to'uahano Kupo'awaakokomiu: Ki sami mpoboli'i ronga ki sami kana-kana die ana'ate, nami da'a nta mewiso hai pomparentaano Apuno Suruga. 4 Nangkuamo koie, inai da owawa larono kana-kana die ana'ate, yahomo da owo-owose hai pomparentaano Apuno Suruga. 5 Ronga inai da lawatio ana'ate da kana die tendenomo I'aku, iaamo da lawatiaku. »
Da mompokontuuna miano hai dosa
(Mk. 9:42-48; Luk. 17:1-2)
6 « Sawali inai da mompokontuuna hai dosa te'asa di'ira ana'ate da parasaeahaku, dadisi koie miano ki pontakirakoakono watu mpogili'a hai we'uno kai tinonduwako hai tahi da olaro. 7 Taperano masilaka die wita'ea tendenomo miano da mompokontuuna simbauno hai dosa. Menonaa, nai da'a nta paisa pura da mompokontuuna miano hai dosa, sawali ntaperano masilaka miano da moweweuhako.
8 Salakono limau atawa karu'u mokontuunako hai dosa, kolo'omo kau hawiako. Kana'umpe kolaloo moico mewiso dahano tora ngkaidaaha ronga asa lima atawa asa karu, ka'iaa kiu tinaburako hai bolo api naraka, dahosi mondo limau ronga karu'u. 9 Ronga kicua matau da mokontuunako hai bolo dosa, sungki'omo kau hawiako. Kana'umpe kolaloo moico mewiso dahano tora ngkaidaaha ronga asa mata, ka'iaa tinaburako hai bolo api naraka, dahosi mondo matau.
10 Mimpehawa'o, osie momparuru te'asa di'ira ana'ate. Kupo'awaakokomiu: Dahira mala'ekatido da sadia mera'iako ra'ino Tamangku hai suruga. [ 11 Nangkua kai leu Ana Nto Manusia tendenomo nta mokosalama'o miano da maradosa. »]
Parereno domba da isa
(Luk. 15:3-7)
12 « Kana'umpe ponto'orimiu? Ki daa miano da mompotuwu te'asa etu boto domba, kai molengu te'asa, nai da'a bara nta bintaa da sio pulu osio hai kabumbu kai lako u'ungkee koie da molengu? 13 Santo'u-to'uahano Kupo'awaakokomiu: Owo-owose'o mohendeno ki awaamo koie da molengu, ka'iaa ko'ira da sio pulu osio da sai molengu. 14 Kanamo na'ana Tamamiu hai suruga nai ehee ki da'a te'asa di'ira ana'ate da molengu. »
Mompokompehawa petila
15 « Ki daa petila'u da salakico, lakomo oliwi ntesincaa. Ki podedeakosi, nta petila'usi mbule. 16 Ki sai podedeako, pontitia penda te'asa atawa te'orua miano salako'u danta podeaho pera da kanahiu, kau nunu'o haratia da teburi, ‹ Tendenomo da orua atawa otolu miano saksii, yahopo kai manasa tesalano koie miano. › a 17 Ki sai ehepo modedeaho oliwindo, pokodungku'akondo'omo jema'a. Ki sai ehepo penda mompodedea, angga'omo kana me'asa miano mpontagi sima atawa miano ngkaapiri.b
18 Santo'u-to'uahano Kupo'awaakokomiu: Da pinoko'upalimiu hai wita'ea, poko'upalio na'ana Apuno suruga. Ronga da pinokontewalimiu hai wita'ea, pokontewalio na'ana Apuno suruga.
19 Ronga penda Kupo'awaakokomiu: Ki daa orua miano die hai comiu da boboto die hai wita'ea kando po'ita danta pino'itando, dahoo nta weehira Tamangku hai suruga. 20 Nangkuamo ki daa orua atawa otolu miano da tepo'awa tendenomo hindo nunu'aku, dahakumo itai kokeena. »
Parereno miano da sai ehe mo'ampuni
21 Yahopo kai leu koie i Petrus metukanaiho i Yesus, « Apua, dungku pempia salakiaku petilaku kaku ampunio? Pempitu? »
22 Kai polawani koie i Yesus, « Na'iaa pempitu, sawali pempitu pulu mo'ala te'o'opitu. 23 Kanamo die parereno pomparentaano Apuno suruga: Dahoo me'asa mokole danta palenga'akondo'o dosando anabuano. 24 Tempono metampu'u paresahira, kando leu mowawaakono me'asa miano da kodosa tepojuta-juta doi pera,c 25 ronga nai po'awa powadano. Nilakono koie mokole kanahi, ‹ Balu'omo koie miano, samotu'ano, anano, ronga luwu inawano kai wada'o dosano. ›
26 Koie miano sudu'omo mesomba kai kanahi, ‹ Sabara isala, luwuo dosangku dahakusi nta wada'o. › 27 Tade-tadenomo koie mokole lolaroo kai halalakiakono'o luwuo dosano kai kanahi, ‹ Lapasicomo. ›
28 Sawali tempono meluarako koie miano, nilakono tepo'awaakono simbauno da kodosa hai iaa asa etu doi pera.d Nilakono rako'o totohe'o kai kanahi, ‹ Wada'o dosau! ›
29 Nilakono sudu koie simbauno kai po'ita kanahi, ‹ Sabara isala, dosangku dahakusi nta wada'o. › 30 Sawali koie miano nasai ehe montarima, deenapo nalako'o wiso'o hai katorungku dungku kai wada'o dosano.
31 Tempondo ontoo bangu-banguno, taperano mopoe larondo ko'ira anabuano mokole meha-mehano, nilakodo mo'awaakono koie mokole luwu da kadadia. 32 Koie mokole boboiho koie miano kai kanahi, ‹ Co'o miano da mosa'o bangu'u; luwu dosau ariaku halalakiako'o nangkua po'itau. 33 Nau da'a bara paraluu nta lolaroo simbau'u kana ku'ari lolaroko? › 34 Nilakono koie mokole mosa'o larono, kai wiso'o koie miano hai katorungku kai pinakasea dungku kai wada'o luwuo dosano.
35 Kanasi na'ana Tamangku hai suruga nta poweweuno comiu ki sami laronto'umiu ampunio petilamiu. »