Su Kinasugu kanu Sapulu enggu Dua a Pinamili nu Isa al-Masih
9
Na linimud'u Isa al-Masih su sapulu enggu dua a pinamili nin ka inenggan nin silan sa kabarakat enggu bagel sa kapamugaw kanu manga saitan enggu kapagkapia kanu manga pedsakit. 2 Na sinugu nin silan sa kapangusiat pantag kanu kapendatu nu Kadenan enggu kapagkapia kanu aden manga sakit'in. 3 Na pinanutuman nin silan sa “Da kanu edtatanggit sa apia ngin kanu kandadalakaw nu: dala tudek, dala 'bpanaguan, dala pegken, dala kuleta enggu dala bun ped pan a balegkas. 4 Na apia endaw i kaludepan nu a walay na lu kanu den ba tumpa taman sa kaganat'u menem kanu entu a dalepa. 5 Na apia endaw menem a dalepa i dili temalima sa lekanu na ganati nu taman sa ipubpug'u su libubuk'u ay nua kanu kasangulan nu manga taw lu a amadan sa sungkang kanilan.” 6 Daka ginemanat den mambu su 'bpamangunut kanu Isa al-Masih ka tinaneb'ilan den su langun nu embala-bala a manga dalepa ka inipangusiat'ilan den su Mapia a Tutuma enggu pinagkapia nilan bun su manga pedsakit.Su Kinalingasa na Itungan nu Datu Hirud
7 Guna makauma sa pakinegan nu Datu Hirud su langun nu entu a nanggula na di den pakatelen i manggiginawa nin ka aden midtalu sa mimbibiag 'bpaluman su Yahiya a Nanalawat. 8 Ugaid'a nia pedtalun nu ped a manga taw na sekanin su Nabi Ilias.b Su ped menem na isa sekanin kanu manga nabi paganay a mimbibiag 'bpaluman. 9 Na nia pidtalu nu Datu Hirud na “Pinaputukan ku den man sa ulu su Yahiya. Entain basi i mama a entu a 'bpanudtulen nu manga taw?” Tembu pidsamikalan mangilay nu Datu Hirud su Isa al-Masih.
Su Kinapakan kanu manga Taw a manga Lima Ngibu i Kadakel'in
10 Na guna den makambalingan su manga sinugu nu Isa al-Masih na pinanudtul'ilan sa lekanin su langun nu pinggula nilan. Entu pan ka pinaunut'u Isa al-Masih silan lu kanu dalepa a bedtuan sa Bitsaida sa da kasipati. 11 Guna makineg'u madakel a taw i lu ba silan mibpawang na tinundug'u manga taw silan. Na pidsakaw-sakaw mambu silan nu Isa al-Masih sa mapia. Na nangusiat sekanin makapantag kanu kapendatu nu Kadenan enggu pinagkapia nin su manga taw a aden manga sakit'in.
12 Na guna su pedsukilep den na inubay sekanin nu sapulu enggu dua a pinamili nin sa nia nilan lun pidtalu na “Nakadtawan-tawan i nia a dalepa, paganat ka den i madakel a nia a taw ka enggu silan makalu kanu manga inged taman den kanu embala-bala a dalepa lu ka enggu silan makapangilay sa makan nilan enggu katulugan nilan.” 13 Nia nin inisumpat kanilan na “Sekanu i enggay kanilan sa makan.” Na nia nilan nadtalu na “Dala pegken tanu, nia tabia na lima timan bu a nia a pan enggu dua timan a seda. Ngintu, mamasa tanu sa ipakan tanu kanu langun nu taw a nia?” 14 Na su manga mama bu a tinemalabuk na manga lima ngibu den i kadakel'in. Na nia pidtalu nu Isa al-Masih kanilan na “Pandudulumpuk'u silan mayan sa enggaga-limapulu kataw.” 15 Na pinggula den mambu nu 'bpamangunut lun su entu. 16 Na kinua nu Isa al-Masih su lima timan a pan enggu su dua timan a seda ka tinemingada sekanin kanu langit ka midsukul-sukul enggu pinugi nin su Kadenan. Entu pan ka pidtebi-tebi nin ka inipatalagad'in kanu 'bpamangunut lun lu kanu madakel a taw. 17 Daka nakakan su langun nu taw taman sa nangausug silan. Na aden pan nangasama nu manga taw keman a nia kadakel a nalimudan lun na sapulu enggu dua kabukag.
Su Kinataw nu Simiun Pitru u Entain su Isa al-Masih
18 Na isa a gay na nangeni-ngeni su Isa al-Masih ugaid'a lu bun su 'bpamangunut lun. Na inidsan silan nu Isa al-Masih sa “Entain aku kanu kapegkasabut'u madakel a taw?” 19 Na nia nilan inisawal na “Seka kun su Yahiya a Nanalawat, na nia menem kadtalu nu ped na seka kun su Nabi Ilias, su ped menem na isa ka kun kanu manga nabi paganay a mimbibiag 'bpaluman.” 20 Na nia nin menem inidsa kanilan na “Ugaid'a sa lekanu na entain aku?” Na nia inisumpat'i Pitru na “Seka su Masih a inibpasad'u Kadenan.” 21 Na inibpaliugat'u Isa al-Masih kanilan i apia sakataw na dala muna edtaluan nilan lun su nia.
Su Mauma a Kamalasayan nu Isa al-Masih enggu su 'Bpamangunut lun
22 Na pidtalu nin pan kanu 'bpamangunut lun i “Su Kaka nu Manusia na dait a mukit sa madakel a kamalasayan enggu dait a ikias sekanin nu 'gkangaunutan nu manga Yahudi enggu su manga mapulu nu 'bpamangurban taman den kanu manga gulu nu pangitaban. Na imatayan sekanin ugaid'a kanu ikatelu nin gay na embibiag sekanin 'bpaluman.”
23 Daka pidtalu nin kanu langun nu manga taw lu i “U entain i miug mabaluy a makaunut sa laki na dait a lipatanan nin su kiug'u ginawa nin enggu uman-uman gay na dait a pamusayn nin su kayu nin a pinambalawagac ka munut sa laki. 24 Ka apia entain i kiugan nin lemipuas su umul'in na makin madala sa lekanin su entu. Ugaid'a apia entain menem i kadalan na umul sabap sa laki na makatalima sa uyag-uyag a da taman nin. 25 Na ngin i katagan nin kanu taw amaika makua nin su langun nu kakawasan sa dunia ugaid'a di nin matalima su uyag-uyag a da taman nin? 26 Na apia entain a taw i ikaya nin i 'bpaginugut sekanin sa laki enggu kanu kadtalu ku na ikaya bun sekanin nu Kaka nu Manusia kanu katingguma nin a linangkapan nu sigay enggu su sigay nu Ama taman kanu sigay nu manga malaikat a suti. 27 Ugaid'a saben-sabenal a pedtalun ku sa lekanu i di matag matay su ped sa lekanu sia taman sa di nilan mailay su kapendatu nu Kadenan.”
Su Kinasigay nu Isa al-Masih
28 Na nakalabi sakapadian i naipus kanu kinadtalu nu Isa al-Masih sa entu, na pinaunut'in si Pitru, Yuhan enggu Yakub ka tinemakedeg silan kanu palaw ka nangeni-ngeni silan. 29 Na gagalu nu kabpangeni-ngeni nu Isa al-Masih na midsalin su palas'in a migkaputi a benal su balegkas'in a pedsigay. 30-31 Na nakatekaw demun 'bpapayag i dua kataw a mama a pedsigay bun, na su Nabi Musa enggu Nabi Ilias su entu. Inimbitiala nilan su Isa al-Masih pantag kanu kapatay nin a kahanda nu Kadenan a mangagan den 'gkauma lu sa Awrusalim. 32 Na si Pitru enggu su manga ped'in na minatay na tulug ugaid'a endaw i kinagedam'ilan na nailay nilan su sigay nu Isa al-Masih enggu su dua kataw a manga mama a pedtindeg kanu ubay nin. 33 Na kanu kapengganat'u dua kataw a entu a mama kanu Isa al-Masih na nia pidtalu ni Pitru sa lekanin na “Mapulu, mapia ka sia tanu. Basi mapia u mumbal kami sa telu timan a balal: satiman i leka, satiman i kanu Nabi Musa enggu satiman menem i kanu Nabi Ilias.” Na nadtalu nin i entu sabap sa di nin den 'gkatawan u ngin i edtalun nin. 34 Na gagalu nu kapedtalu ni Pitru na nakatekaw demun silan natangguban na gabun. Na nagilekan su 'bpamangunut lun. 35 Daka aden suala a nakabpun kanu gabun sa nia nin pidtalu na “Nia ba su Tunggal a wata ku a pinamili ku. Pakikineg'u sekanin.” 36 Endaw i kinapupus'u suala na sakataw nu Isa al-Masih bun den lu kanu pedtindegan nin. Na da i entu muna edtalu-talua nu 'bpamangunut lun kanu apia entain.
Su Kinapagkapia nu Isa al-Masih kanu Wata a Inasukan na Saitan
37 Na kanu kinagkapita na mimbaba su Isa al-Masih enggu su telu kataw a 'bpamangunut lun ebpun kanu palaw, na inalaw menem silan nu madakel a taw. 38 Na aden mama lu kanu madakel a taw a 'bpelalis sa “Gulu, 'bpangenin ku sa leka i ilay ka pan su wata ku a mama a tunggal. 39 Inasukan sekanin na saitan enggu pakatekaw demun pakalalis enggu papegkegkelen nu saitan taman sa papembula-bulan nin su ngali nin. Na papegkapasangan nin a benal enggu tatap'in 'bpagasukan. 40 Na pinangeni ku kanu 'bpamangunut sa leka i paawan nilan pan su saitan ugaid'a dala nilan magaga.” 41 Na nia nadtalu nu Isa al-Masih na “Ngin den a kada na salig i nia a manga taw saguna! Sangat a namakasibay kanu den! Ngin ba i kauget'a kadtangen ku sa lekanu enggu katigkel ku sa lekanu? Isia nengka i wata nengka a nan.” 42 Na gagalu na kapedtundan nin kanu wata na tinunggad menem'u saitan su wata ka sinaing'in. Ugaid'a pidtaluan nu Isa al-Masih su saitan sa awan nin su wata taman sa migkapia mambu su wata, entu pan ka inimbalingan nin su wata kanu ama nin. 43 Na su langun nu manga taw na nangagaip kanu entu a kabarakatan nu Kadenan.
Su Kinapayag'u Isa al-Masih kanu Manggula nin
Kanu kapegkagaip'u manga taw kanu langun nu pinggula nin na pidtalu nin kanu 'bpamangunut lun i 44 “Di nu 'bpelipatani su nia ba a pedtalun ku sa lekanu a su Kaka nu Manusia na ipalad den lu kanu manga kuntela nin.” 45 Ugaid'a di nilan 'gkasabutan su pedtalun nin ka inipagena kanilan su maena nu entu ka enggu di nilan 'gkatuntayan. Na 'gkagilekan menem silan 'bpagidsa pantag kanu maena nin.
Su Badtug sa Langun sia kanu Kapendatu nu Kadenan
46 Guna su maitu na mibpapalawa su 'bpamangunut lun u entain kanilan i badtug sa langun. 47 Ugaid'a 'gkatawan bun nu Isa al-Masih su 'gkapagitung'ilan tembu kinemua sekanin sa wata ka pinadtindeg'in sia kanu ubay nin 48 ka nia nin pidtalu kanilan na “Apia entain i temalima sa maya ba kanu manga wata a nia sabap sa 'bpaginugut sekanin sa laki na mana bun saki i tinalima nin. Na apia entain i temalima sa laki na tinalima nin bun su sinemugu sa laki. Ka u entain i ibaba nin i ginawa nin kanu manga ped'in na entu ba i mabadtug sa langun.”
Su Tidtu a Tampil
49 Na nia pidtalu ni Yuhan kanu Isa al-Masih na “Mapulu, aden nailay nami a 'bpamugaw sa saitan a sia nin ipenggulalan kanu ingala nengka na sinapalan nami kagina dikena tanu sekanin kaped.” 50 Na nia pidtalu nu Isa al-Masih sa lekanin na “Di nu sekanin pedsapali kagina apia entain i di pedsungkang sa lekanu na tampil'u.”
Su Kapedsangul'u Isa al-Masih 'Bpawang sa Awrusalim
51 Na sagay-sagay na pegkasiken bun su kutika a kapambalingan kanu Isa al-Masih lu sa sulega na tinalanged'in mambu sa ginawa nin i lemu sekanin sa Awrusalim. 52 Sinemugu sekanin sa taw a pinauna nin lu sa kanu inged a Samaria ka enggu nilan 'gkapagadilan su kapegkauma nin. 53 Ugaid'a da kiug su manga taw sa Samaria sa katalima nilan lund ka nasabutan nilan i lu sekanin pebpawang sa Awrusalim. 54 Na guna mailay nu 'bpamangunut lun a si Yakub enggu Yuhan su entu na nia nilan pidtalu kanu Isa al-Masih na “Mapulu, u miug ka bu na mangeni kami sa apuy a ganat sa sulega ka idadsang'ami kanilan ka enggu silan 'gkabinasa.” 55 Ugaid'a linengian silan nu Isa al-Masih ka dinaway nin. 56 Guna su maitu na lu silan minangay kanu ped a dalepa.
Su Kaunut kanu Isa al-Masih
57 Na sia kanu kabpelalakaw nilan na aden mama a midtalu sa “Munut aku sa leka sa apia endaw ka 'bpawang.” 58 Na nia pidtalu nu Isa al-Masih sa lekanin na “Su manga asu sa damakayu na aden manga pesu nilan a kapangintelenan enggu su manga papanuk sa kawang-kawangan na aden manga salag'ilan a kapangintelenan ugaid'a su Kaka nu Manusia na dala dalepa nin a kapangintelenan nin.”
59 Na nia menem pidtalu nu Isa al-Masih kanu sakataw a mama na “Unut ka sa laki.” Ugaid'a nia inisumpat'u mama na “Mapulu, pauli aku pan muna ka apasen ku pan lemebeng su ama ku.” 60 Nia inisumpat'u Isa al-Masih sa lekanin na “Isalig'engka den kanu namamatay i kalebeng'ilan kanu namamatay.e Ka nia ka enggula na ipayag'engka su kapendatu nu Kadenan.”