Su Kinasugu nu Isa al-Masih kanu Sapulu enggu Dua a Pinamili nin sa Kapangusiat kanu Mapia a Tutuma
10
Na linimud'u Isa al-Masih su sapulu enggu duaa kanu 'bpamangunut lun ka inenggay nin kanilan su bagel sa kapamugaw kanu manga saitan enggu kapagkapia kanu langun nu sakit enggu penggedamen nu taw. 2 Na nia su sapulu enggu dua a 'bpamangunut lun a pinamili nin a masugu nin, nia muna-muna sia na si Simiun a bedtuan bun sa Pitru, entu pan ka si Anduk a suled bun ni Simiun Pitru, su edsuled a si Yakub enggu si Yuhan a manga wata ni Zabidi, 3 si Pilipus, si Bintulumi, si Tumas, si Mataya a nangubela sa buwis, si Yakub a wata ni Alpayus, si Tadius, 4 si Simiun a 'bpaninindeg kanu dalepa enggu si Yahuda Iskalia a temipu kanu Isa al-Masih.5 Na su sapulu enggu dua a nia a sinugu nu Isa al-Masih na nia nin lun pidtalu na “Da kanu a benal lemu kanu dalepa nu manga dikena-Yahudi atawa ka lu kanu siudad'u manga taw sa Samaria. 6 Ka nia nu 'bpawangi na su manga tupu nu Israil a mana nangatadin a bili-bili. 7 Na sia kanu kabpelalakaw nu na ipangusiat'u i ‘Masupeg den a benal su kapendatu nu Kadenan.’ 8 Pagkapia nu su 'bpamedsakit, pambibiag'u su namamatay, suti nu su 'bpamedsakit sa debpig,b bugawi nu sa saitan su manga taw a inasukan na saitan. Da kanu mapabayad ka da bun bayad'u kinatalima nu sa nia. 9 Da kanu mananggit sa apia salad a kuleta kanu uyut'u. 10 Da kanu bun mananggit sa apia ngin a taguan atawa ka ped pan a balegkas atawa ka ampis'a ay udi na tudek. Ka nanget man a matalima nu gumagalebek u ngin i nasisita nin sa kapaguyag'in.c
11 “Na apia endaw a siudad atawa ka dalepa i kabpawangan nu na edsipati nu sa mapia u entain i dait a tumpan nu a temalima sa lekanu, na lu kanu demun ba taman sa kaganat'u menem. 12 Na kanu kaludep'u kanu walay na salam kanu. 13 Na amaika su taw nu walay a entu ka makadait kanu salam'u, na embarakat su entu kanilan. Ugaid'a amaika di silan makadait kanu entu a salam'u na di embarakat su entu kanilan. 14 Na apia entain i di temalima sa lekanu atawa ka di makikineg kanu usiatan nu na sia kanu kaganat'u kanu walay atawa ka kanu siudad na ipubpug'u su libubuk'u ay nu.d 15 Saben-sabenal a pedtalun ku sa lekanu i su entu ba a dalepa a da talima sa lekanu na labi a maugat i kukuman kanilan sia kanu Gay nu Harikiamate kumin kanu dalepa a Sudum enggu Gumura.”f
Dait a di Magilek kanu Kapamungkaid
16 Nia pan pidtalu nu Isa al-Masih na “Pakikineg kanu, pedsugun ku sekanu a mana manga bili-bili lu kanu manga taw a mana asu a pakagkaid. Kagina ka maitu na pakatindep'u su kapagitung'u a mana su manga nipay ugaid'a ilingi nu bun su malapati a da 'gkagkaidan nin. 17 Pangingat kanu kanu manga taw ka ipalad kanu nilan kanu 'bpamangukum enggu ipabetay kanu nilan lu kanu pedsambayangan nilan. 18 Na sabap sa laki na iadap kanu nilan kanu manga gubilnadul enggu manga sultan na makadsaksi kanu kanilan enggu kanu manga dikena-Yahudi pantag sa laki. 19 Na sia kanu kaadap'ilan sa lekanu na di nu 'bpelidua i ginawa nu u ngin i edtalun nu, ka kanu entu ba a kutika na itutulu sa lekanu u ngin i dait a edtalun nu. 20 Ka dikena man sekanu i pedtalu a entu ka su Suti a Ruh nu Kadenan i pedtalu sia pakanggulalan sa lekanu. 21 Na kanu entu a manga timpu na su manga edtetebped sa pused na paimatayan nin su tebped'in sa pused a 'bpaginugut sa laki enggu maitu bun ba su ama na paimatayan nin su wata nin. Na su manga wata menem na semungkang kanu manga lukes'ilan a 'bpamaginugut sa laki taman sa paimatayan nilan. 22 Na sabap sa laki na kabensian kanu nu langun nu taw. Ugaid'a su taw a temigkel kanu paginugut'in taman sa kapupusan na malipuas. 23 Na amaika 'bpamungkaidanan kanu kanu siudad na ganati nu su entu ka lu kanu menem kanu ped a siudad. Ka saben-sabenal a pedtalun ku sa lekanu i di nu paman malapat su manga siudad sa Israil na makambalingan den su Kaka nu Manusia.g
24 “Na dala mulit a kalawanan nin su gulu nin enggu dala ulipen a kalawanan nin pan su mapulu nin. 25 Nia taman na malepeng'in bu su gulu nin enggu maitu bun ba su ulipen kanu mapulu nin. Na amaika su ulu nu sakambinabatan ka pedtawagen sa Bilsibulh na labi lawan den su sakambinabatan nin!
26 “Na da kanu man magilek kanilan ka dala man inipagena a di makapayag atawa ka dala natangguban a di kasawan. 27 U ngin i edtalun ku sa lekanu na ipayag'u kanu manga taw enggu u ngin i ibpagedung ku sa lekanu na edtalu nu sa matanug sia kanu kaadapan nu madakel a taw. 28 Na da kanu magilek kanu manusia a nia nin bu 'gkagaga 'bpagimatay na su badan ugaid'a di nin magaga mimatay su ngiawa. Nia nu man ikagilek na su Kadenan a pakagaga pembinasa kanu badan enggu ngiawa lu sa naraka taman sa taman. 29 Ugaid'a apia ka maitu na apia su manga papanuk a pamugun a mababa den sa langun i alaga nin na dala isa bu kanilan a maulug kanu lupa a dikena kahanda nu Ama nu a lu sa sulega. 30 Na sekanu menem, na apia su kadakel'u buk'u na katawan nu Kadenan. 31 Tembu da kanu magilek sa manggula ka labi paman i kabalapantag'u kumin kanu manga pamugun.
32 “Na apia entain i ipayag'in sia kanu adapan nu manga taw i 'bpaginugut sekanin sa laki na idsaksi ku bun sekanin sia kanu adapan nu Ama ku a lu sa sulega sa nalusud sekanin sa laki. 33 Ugaid'a apia entain menem i kemias sa laki sia kanu adapan nu manga taw na ikias ku bun mambu sekanin sia kanu adapan nu Ama ku a lu sa sulega.”
Su di Kapamagayun'u Sakambinabatan sabap kanu Isa al-Masih
34 Na pidtalu pamun nu Isa al-Masih i “Di nu man 'bpagitunga i su kinasia ku sa dunia na madtatanggit ku su kalilintad ka su kinasia ku na dikena kalilintad i madtatanggit ku ka kabpipitas. 35 Ka nia ku kinasia na ‘Pabpipitasen ku su wata a mama kanu ama nin, maitu bun su wata a babay kanu ina nin enggu pabpipitasen ku bun su mamanugang a babay kanu panugangan nin a babay, 36 taman sa nia den magkuntela nu taw na su mismu a sakambinabatan nin den.’i
37 “Na apia entain i ikalimu nin su ama nin atawa ka ina nin sa labi lawan pan kumin sa laki na di makaluyud sa laki. Na apia entain bun i ikalimu nin su wata nin a mama atawa ka babay sa labi pan sa laki na di bun makaluyud sa laki. 38 Na maitu bun ba su apia entain i di nin pamusayn su kayu nin a pinambalawagaj sa kaunut'in sa laki na di bun makaluyud sa laki. 39 Ka apia entain man i kiugan nin lemipuas su umul'in na madala sa lekanin su entu ugaid'a apia entain menem i kadalan na umul sabap sa laki na makatalima sa uyag-uyag a da taman nin.”
Su manga Balas
40 Nia pan pidtalu nu Isa al-Masih na “Apia entain i temalima sa lekanu na tinalima aku nin bun. Na apia entain menem i temalima sa laki na tinalima nin bun su sinemugu sa laki. 41 Na apia entain i temalima kanu nabi sabap sa kanabi nin na makatalima su entu a taw sa ngin i balas'u nabi. Na apia entain menem i temalima kanu ikelas sabap kanu kaikelas'in na makatalima su entu a taw sa ngin i balas'u ikelas a taw. 42 Na apia entain i mapainem sa apia sakabasu bu a ig kanu mababa den sa langun a taw a aden paginugut'in sa laki, na saben-sabenal a pedtalun ku sa lekanu i natalatantu a balasan su entu a taw.”