Kitab'u Nabi Yunus
Su Tutuma kanu Kadtaubat
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Na langun tanu a 'bpamalitiala kanu Kadenan na nakakineg den pantag kanu Nabi Yunus. Apia 'bpagadatan tanu bun su Nabi Yunus na paidu bu sa lekitanu i nakabatia kanu Kitab a pantag sa lekanin.
Na migkahanda su Kadenan sa nakasalin nami su tudtulan nu Nabi Yunus sa basa a Maguindanaon a sia nakadalem kanu Danden a Inipayag. Su entu ba a tudtulan na ininggulalan nu Kadenan sa basa na Hibru. Kagina ka kapasangan kanu matia sa basa na Hibru na inisalin nami sia kanu basa a Maguindanaon su entu ba a tudtulan ka enggu tanu 'gkatuntayan su ukit'u Kadenan enggu su manga pinggalebek'in kanu timpu nu Nabi Yunus.
Na nia nakadalem kanu Kitab na sia pimbata su Nabi Yunus kanu sangibu enggu pat gatus lagun unan nu Hijra, udi na walu gatus lagun unan nu timpu nu Isa al-Masih. Kanu entu a timpu na nia kamal kanu dalepa nu Nabi Yunus na su ikadua a Jereboam a sultan nu Israil. Na su entu ba a bangsa na Israil na lu sa kabalangkayan na Saudi Arabia.
Na pabpelun nu Kadenan su Nabi Yunus sa Ninibah a sakup'u balapantag a inged a lu kanu pendatuan nu bangsa a Asura. Na kanu entu a timpu na su Ninibah na isa kanu 'bpangunanan a inged sia sa dunia. Su manga taw nin na mataw den semulat enggu matia enggu mategel pan i kambalay nilan. Sabap kanu kabagel'ilan na apia nia nin kaaden i mangagaw pan silan sa inged na magaga nilan, enggu 'gkalabit bu su ngala nin a “Ninibah” na 'gkagilekan den su pakakineg lun.
Ugaid'a di nilan besen pedsimban su Kadenan a Allahu Ta'ala ka nia nilan pedsimban na su manga balahala. Sangat i kadaluaka nilan ka su manga bilanggu na 'bpagebisen nilan su bibil'in, udi na 'bpagupisan nilan su taw a entu apia nia nin kaaden i bibiag pamun. Mapasad'ilan mimatay na pamutukan nilan sa ulu entu pan ka padtatambakan nilan. Su kaped a bangsa na ipegkagilek'ilan su nia a inged na labi-labi den su bangsa a Israil a dalepa nu Nabi Yunus.
Na kanu entu a gay na migkahanda su Kadenan sa kukumen nin su dusa nu manga taw sa Ninibah. Kagina ka maitu na napamili mambu nu Kadenan su Nabi Yunus a makapayag kanu kukuman nin.
Na nia mauli sia na mangeni-ngeni tanu kanu Kadenan sa pamaguman-umanan nin su manga lidseki nin ka enggu tanu 'gkatuntayan sa mapia su manga ukit'in enggu su dait a kapedtaubat sa apia endaw den sia sa liwawaw na dunia. Edsukul-sukul kami kanu apia entain i enggihad matia kanu nia ba a manaut a libelu pantag kanu Nabi Yunus ka palihalan tanu nu Kadenan enggu basi aden bun makua tanu lun a guna-guna a kapaganadan nu muliataw tanu.