Su Kambibiag'u Namamatay
12
“Na kanu entu ba a gay na makauma su mapulu a malaikat a su Mikail a su pegkelung sa lekanu. Na aden makauma a timpu na sangat a kamalasayan a dala pamun manggula iganat sa kinabaluy a bangsa kanu dalepa a Israil. Ugaid'a kanu entu ba a gay na mamakalipuas su manga taw nengka a namakasulat su ngala nin kanu libelu. 2 Na su madakel a pamedtulug kanu lupaa na mamakagedam,b su ped kanilan na makatalima sa uyag-uyag a da taman nin, ugaid'a su ped menem kanilan na makayaya taman sa taman. 3 Su manga balaitungan na semigay a mana su kaliwanag'u kawang-kawangan, silan ba a nia su manga pedtutulu kanu madakel a taw kanu matidtu a lalan. Semigay silan taman sa taman a mana su manga bitun. 4 Ugaid'a seka Danyil, na su inipaalung ku a nia sa leka na di ka pan ipebpayag enggu tikup ka sa mapia taman sa di pan mauma su kapupusan. Madakel a taw i magaluyan mamikal ka enggu mangiseg su katuntay nilan.”5 Na guna mapasad su entu, na saki si Danyil, na aden nailay ku a dua kataw a midtindeg lu kanu duakambala a adteban nu pulangi. 6 Na isa kanilan i minidsa kanu mama a nakambalegkas sa mapia a ginis a lu pedtindeg kanu liwawaw nu pulangi sa nia nin inidsa lun na “Kanu pan guna i kapupus'u mamakagaip a nia a 'gkanganggula?” 7 Na su mama a entu a nakambalegkas sa mapia a ginis na inikayang'in su duakambala a lima nin. Na nakineg ku a midsapa sekanin kanu Kadenan a 'bpaguyag-uyag taman sa taman sa nia nin pidtalu na “Mapupus su nia kanu dalem'u telu lagun enggu tenga amaika mapasad den su kapegkalasay nu manga taw nu Kadenan.” 8 Na nakineg ku su entu ugaid'a da ku katuntayi. Tembu nakaidsa ku lun i “Hu mapulu ku, na ngin i kaliuwan nu nia?” 9 Na nia nin inisawal na “Danyil, ganat ka den, kagina su manga kadtalu a nia a inipaalung ku sa leka na di ka pan ipebpayag enggu tikup ka sa mapia taman sa mauma su kapupusan. 10 Madakel i ikelasen a iling-iling'u putaw na sayaban. Ugaid'a su manga taw a dupang na mapalalayun bun su kadupang'ilan. Dala kanilan i makatuntay kanu katuntayan nu manga balaitungan a taw. 11 Maipus pan su sangibu enggu dua gatus enggu siyawpulu a gay iganat kanu kutika a kapatelen kanu uman-uman gay a kagkurban sa kurban a pedtutungen langun enggu su kabetad kanu pakangingilu a pakagiabu a sabapan na katagak kanu Suti a 'Bpagagaman. 12 Mapia den a benal kanu taw a makapagangapa kanu kauma nu kapupus'u sangibu enggu telu gatus enggu telupulu enggu lima gay. 13 Ugaid'a seka na palalayun ka su ukit'engka taman sa kapupusan. Na mauma ka nu limu nu Kadenan ugaid'a pambibiagen ka 'bpaluman nu Kadenan kanu mangauli den a gay ka enggu nengka matalima su palihala a inadil sa leka.”
Wassalam