Su Manga Palibasan
sia kanu Kitab Zabur
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a kitab na bedtuan sa Manga Palibasan a inisulat'u Nabi Sulaiman enggu su manga ped pan a manga balaitungan. Ugaid'a kadakelan kanu nia a Palibasan na su Nabi Sulaiman i sinemulat lun. Su Nabi Sulaiman na nia bun ba su Ragya Sulaiman a wata nu Nabi Daud a datu nu manga taw a Israil. Na su manga taw a Israil na 'bpaginugut silan sa su Kadenan a Mapulu a nangaden kanu langun na minenggay sekanin sa ilemu sia sa liwawaw na dunia a dait a tuntuten nu manusia.
Su nia a manga Palibasan na initulun kanu manga balaitungan a taw taman den kanu manga kalukesan, na isa su Nabi Sulaiman sa tinulunan kanu dala pagidsan nin a kabalaitungan.
Su nia a manga Palibasan na kakuayan sa balapantag a guna-guna enggu mangapia a panduan a makadtabang kanu uyag-uyag'u manusia.
Na inisulat su nia sa ukit a bayuk ka asal'a malemu makalangag enggu katanudan nu apia entain a mamatia lun.
Ibpamandu nu manga Palibasan i su ilemu na makatutulu kanu taw sa u ngin i dait a ula-ula enggu ngin ba i wagib a enggalebeken. 'Bpamanduan nin su manga taw sa panun i katuntut'ilan sa ilemu ka enggu nilan kaabungan su manga kababalan a galebek, labi lawan den su manganguda pamun ka enggu di silan mamakasibay kanu matidtu a lalan taman sa makapaguyag-uyag silan sa mapia.
Nakadalem kanu nia a kitab i inilagid su ilemu sa taw a 'bpangenggat kanu dala manga sabut'in a manganguda ka enggu silan kaadenan na tuntay. Na ipebpagilay bun sia ba su dua timan a embalangan nu kabpaguyag-uyag u ngin ba i dait a pamilin, su ilemu atawa ka su kababalan. Mailay su nia iganat sa sura 1 taman sa sura 9 kanu nia bun ba a kitab.
Nakadalem bun kanu nia ba a kitab su kambidayan nu ilemu enggu su kababalan. Na mailay su pantag kanu kambidayan nu ilemu enggu su kababalan iganat sa sura 10 taman sa sura 31 kanu nia bun ba a kitab. Sia kanu kabatia tanu lun na madakel pan gaid i katuntayan tanu a mangapia a ilemu.