Su Manga Palibasan
sia kanu Kitab Zabur
Su Katagan nu manga Palibasan
1
Nia ba su manga palibasana nu Nabi Sulaiman a datu na Israil a wata nu Nabi Daud. 2 Su manga palibasan a nia na makaenggay sa ilemu enggu papata enggu makadtabang sa katuntay kanu manga panduan nu balaitungan. 3 Nia nin i nia kahanda na kapamanduan nin su taw sa gugud a kapaguyag-uyag, a nia nin maena na katidtu na palangay, 'gkataw sa ngin i wagib enggu kapadtimbang. 4 Makaenggay i nia sa kataw kanu manga taw a paidu i tuntay nin enggu makapamandu kanu manganguda sa kapia na kapamikil enggu kapia na kapagitung. 5 Pakikineg kanu bun, sekanu a manga taw a masela den i natuntayan nin a ilemu. Su kapedtuntut'u sa ilemu na makin makatutulu sa lekanu sa katuntay. 6 Makadtabang su kapedtuntut sa ilemu sa kasabut kanu maena nu manga palibasan, sindil enggu paantukan nu manga balaitungan.7 Su senep sa atay a gilek kanu Kadenan a Mapulu na ludsuan nu tidtu-tidtu a ilemu
ugaid'a su manga taw a babal na di nilan 'bpagenggan sa alaga su ilemu enggu su kapapedtidtu kanilan.
Su manga Papata sa Panun i Kalidas kanu manga Mawag a Taw
8 Dua na manga wata, paginuguti ka su kapatidtu sa leka nu ama nengka
enggu di ka bun ipegkias su panduan nu ina nengka.
9 Kagina mabaluy i entu a kabadtugan nengka a mana sansangan kanu ulu nengka
enggu mana muntia a inimbalig sa leka.
10 Dua na manga wata, u pamitialan ka menggat'u daluaka a manga taw
na da ka a benal munut kanilan.
11 Amaika edtalun nilan sa leka i “Unut ka sa lekami
ka magayan tanu sa apia entain den ka imatayan tanu apia su dala kadupangan nin a taw.
12 Na imatayan tanu su apia entain apia nia nin kaaden i timpu na 'bpanasangan pamun i kanggulawas'in
a mana bun su manga taw a namamatay den kanu pakubulan.
13 Na madakel i makua tanu kanilan a mapulu i alaga nin a tamuk,
penun tanu su walay tanu kanu mangakua tanu kanilan.
14 Na tembu unut ka den sa lekami
ka su langun nu mangakua tanu a tamuk na embad-baden tanu.”
15 Dua na manga wata, da ka a benal munut kanilan
ka makin ka silan lidasi.
16 Kagina malemu gaid kanilan i kanggula sa mawag
enggu kapangimatay.
17 Ka dala man katagan nin su litag
amaika 'gkailay bun nu papanuk su kabpelitag lun.
18 Ugaid'a su nia a manga taw, na nia nilan bun 'bpelitagan na su ginawa nilan,
ka silan bun i 'bpagimatay kanu ginawa nilan.
19 Na maitu ba i manggula nu manga taw a mamantiali sa dikena mapia a ukit.
Ka silan bun i mininasa kanu ginawa nilan.
Su Kapakikineg kanu Ilemu
20-21 Su ilemu na makalagid kanu 'bpananawag lu kanu kadakelan nu taw,
lu kanu manga lalan
enggu lu kanu bungawan nu manga siudad.
22 Nia nin ibpananawag na “Sekanu a manga dala akal'in
na kanu pan i katelen nu kanu manga dala katagan nin a ukit'u?
Sekanu a mangasudi na kanu pan i katelen nu edsudi?
Na sekanu menem a manga babal a taw
na kanu pan i katelen nu sa di nu kapegkalilini kanu manga ilemu?
23 Na pakikineg'u su manga ipendaway ku sa lekanu
ka ipayag ku sa lekanu su dalem'u pamusungan ku
enggu su 'gkapagitung ku.
24 Ugaid'a da nu pakikinega enggu ipamamantag su kabpananawag ku sa lekanu.
25 Inawan nu sa kapantag su manga papata ku
enggu su manga inidaway ku sa lekanu.
26-27 Kagina ka maitu na edtatawan ku bu mambu sekanu
amaika aden makatingguma sa lekanu a sangat i kapasang'in
a manga bataluan, manga kamutuan enggu manga tiuba.b
28 “Na amaika maitu na makapangeni silan sa laki sa tabang ugaid'a di ku silan edtabangan
taman sa pangilayn aku nilan na di aku nilan mambu matun.
29 Ka da nilan kalilini su tidtu a manga ilemu
enggu da nilan ikagilek sa senep sa atay su Kadenan a Mapulu.
30 Da nilan talima su manga indawan ku
enggu da nilan ipamamantag su manga kinadaway ku sa kanilan.
31 Sabap sa entu na katepengan nilan su kapait'u unga nu galebekan nilan
enggu su manga mawag a kahanda nilan.
32 Kagina nia bun makapatay kanu manga taw a dala akal'in na su kategas'u ulu nilan bun,
nia makagkaid kanu manga babal a taw na su di nilan kapamamantag.
33 Ugaid'a su langun menem'u makikineg sa laki na makapaguyag-uyag sa malilintad
enggu dala ikagilek'in a manggula nin a mawag.”