Su Kabalapantag'u Ilemu
2
Dua na manga wata, pakikineg ka enggu itagu nengka sa ginawa su manga panduan kuenggu su manga kasuguan ku sa leka.
2 Ipamamantag'engka su manga ilemu
enggu itagu nengka sa ginawa su manga nasabutan nengka.
3 Paginapas ka i kaadenan ka na sabut
enggu tuntay
4 enggu pangilay ka su entu sa mana su pilak
atawa ka inipagena a kakawasan.
5 Na amaika maitu na kasabutan nengka den ba a entu su tidtu-tidtu a gilek kanu Kadenan a Mapulu
enggu katawan nengka den sa mapia u entain sekanin.
6 Kagina su Kadenan a Mapulu i 'bpagenggay sa ilemu;
sekanin su 'gkabpunan nu katuntay enggu mapia a pamikilan.
7 Pedsisinggumanan nin su kapia na kapagitung'u manga taw a 'bpaguyag-uyag sa matidtu;
sekanin i kelung'u manga taw a 'bpaguyag-uyag sa matidtu .
8 Pedtiakapan nin su lalan nu manga taw a mataw sa kawagib enggu di nin papedtadayn su ukit'u manga taw a matidtu.
9 Na amaika maitu na katuntayan nengka sa mapia su katidtu enggu su kawagib
enggu su kapadtimbang taman sa katawan nengka u ngin i dait a enggulan.
10 Kagina lemangkap den kanu pamusungan nengka su ilemu
enggu su katuntay na makaenggay sa leka sa kapia na ginawa.
11 Na su kapia na kapamikil'engka enggu su tuntay nengka
na entu bun ba i mabaluy a dalinding'engka.
12 Itangka ka nu ilemu sa di ka makailing kanu manga daluaka a taw
enggu kanu manga tagakalen,
13 su manga taw a tinaligkudan nilan su matidtu a lalan
ka nia nilan linamig na su bigkug a lalan.
14 Nia nilan 'gkalilinian enggu pakapia sa ginawa nilan
na su kapenggula sa mawag.
15 Su galebekan nilan na kapamagakal
enggu 'bpaguyag-uyag silan sa ukit'a kasalimbut.
16 Na su ilemu bun ba a nia i lemipuas sa leka
kanu sasat'u takiuga a babay a mamis i kanggudila nin.
17 Na tinagak'in su kaluma nin taman sa inawan nin sa kapantag su inibpasad'in
kanu adapan nu Kadenan kanu timpu a kinakawing lun.
18 Na apia entain i lemudep kanu walay nin na timbang a pebpatay
kagina entu ba su lalan a ipebpawang kanu dalepa nu namamatay.
19 Na su langun nu lemu sa lekanin na di den makambalingan
ka di nin den matun su lalan a ipebpawang kanu dalepa nu manga bibiag.a
20 Na kagina ka maitu na nia ka lalakawi na su lalan nu matidtu a taw
enggu da ka a benal semibay lu ba.
21 Kagina su taw a maguyag-uyag sa matidtu enggu matidtu
na mauget i kapaguyag-uyag'in sia kanu kalupan.b
22 Ugaid'a su manga daluaka a taw enggu su manga salimbuten
na mana manga utan a padtuden kanu kalupan.