Su Senep sa Atay a Kasalig kanu Kadenan a Mapulu
3
Dua na manga wata, ipamula nengka kanu pamusungan nengka su manga panduan ku sa lekaenggu su manga kasuguan ku sa leka.
Di ka i entu 'bpelipatani
2 kagina entu ba i makapagkalendu kanu umul'engka,
enggan ka nin sa tidtu a kalilintad sia kanu pamusungan nengka.
3 Di ka pebpitas kanu ginawa nengka su kakalimu enggu su katidtu
ka itimbang'engka a mana balig a di 'gkapitas sa leka
taman sa ipamula nengka su entu kanu pamusungan nengka.
4 Amaika enggulan nengka su entu ba na kasuatan ka nu Kadenan
taman den kanu manga taw enggu mapia i labitan nu taw sa leka.
5 Na salig ka kanu Kadenan a Mapulu sa senep sa atay
enggu di ka pedsaligi su ngin i nasabutan nengka.
6 Na su langun nu enggulan nengka na itapenay nengka kanu Kadenan a Mapulu
ka ipailay nin sa leka u ngin i dait a enggulan nengka.
7 Di ka magitung i masela den i nasabutan nengka.
Nia ka enggula na ikagilek'engka su Kadenan a Mapulu;
tangkai ka su galebekan a dikena mapia.
8 Na entu ba i menggay sa leka sa mapia a kanggulawas enggu makapagkabagel kanu badan nengka.
9 Na pugi ka su Kadenan a Mapulu sa ukit a kaenggay nengka lun kanu manga kaaden nengka enggu kanu muna-muna a unga nu manga masabpet'engka.
10 Na amaika enggulan nengka su langun nu entu na mapenu na sabpet su manga kamalig'engka
enggu mamelapay sa mapia a alak a ig'a ubas su manga 'bpanaguan nengka.
11 Dua na manga wata, di ka ipegkias su kapapedtidtu nu Kadenan a Mapulu sa leka.
Di ka mapagkalat i ginawa nengka sa kapendaway nin sa leka,
12 kagina papedtidtun nu Kadenan a Mapulu su langun nu ipegkalimu nin
a mana bun su ama kanu ipegkalimu nin a wata nin.
Su Tidtu a Kakawasan
13 Sangat i kapia nin kanu taw
amaika naadenan sekanin na ilemu enggu katuntay.
14 Kagina su ilemu na minuna pan sa bulawan atawa ka pilak i makaenggay nin.
15 Minuna pan i kapia nin kanu manga balapantag a manga watu
ka dala makalepeng lun kanu langun nu makagkapia pan sa manggiginawa.
16 Nia ba i mapagkalendu kanu umul'engka, mapambantas kanu kauyagan nengka
enggu menggay sa leka sa kabadtugan.
17 Tutulun ka nin sa mapia a lalan a makasukul sa leka,
ka su langun nu 'bpagukitan nin na kalilintad.
18 Ka su ilemu na mana su kayu a 'bpagenggay sa uyag-uyag kanu apia entain a pedsilung lun
ka mapia den man a benal kanu taw amaika semilung sa lekanin.
19 Pinangaden nu Kadenan a Mapulu su dunia
sa ukit'u ilemu nin.
Sia nakanggulalan kanu kataw nin na linimbag'in su langit enggu su lupa.
20 Binungkasan nin bun su bualan nu manga ig sia nakanggulalan kanu ilemu nin
enggu pinabubus'in su ulan ganat kanu kawang-kawangan.
21 Dua na manga wata, ulami ka su ilemu enggu su katuntay sa di madala sa leka;
usal ka su entu sa mapia a kapamikil.
22 Ka nia ba i mapagkalendu kanu umul'engka
enggu mapagkapia kanu palangay nengka
23 taman sa tiakapan ka nin kanu manga makagkaid
asal'a di ka makasiud.
24 Makatulug ka sa mapia sa dala geda-geda nin
enggu malilintad su kapangintelenen nengka.
25 Na da ka enggeda-geda sa aden makatekaw a makatingguma a manga kabinasan
a mana su 'gkanggula nu manga taw a daluaka.
26 Kagina su Kadenan man a Mapulu i pamagel'u ginawa nengka
enggu itangka ka nin kanu manga padulat a makagkaid.
Su Unga nu Ilemu
27 Di ka mangelen i kaenggay nengka kanu manga dait a 'bpagenggan
amaika 'gkagaga nengka bun.
28 Di ka den mapagkapita i kaenggay nengka lun
amaika 'gkagaga nengka bun 'bpagenggay kanilan su entu sa sagugunay.
29 Di ka pegkahandai sa mawag su pagubay nengka
a masela i salig'in sa leka.
30 Di ka lemimbul su ped'engka sa dala sabap'in
enggu dala penggulan nin sa leka a mawag.
31 Di ka pedsekeli su taw a nia nin galebekan na mawag
enggu di ka milingi su manga galebekan nin.
32 Kagina sangat a 'gkabensian nu Kadenan a Mapulu su manga taw a nia nin galebekan na mawag
ugaid'a masupeg sekanin kanu manga taw a 'bpaguyag-uyag sa matidtu.
33 Ipedsinta nin su sakambinabatan nu manga taw a nia nin galebekan na mawag
ugaid'a pebpalihalan nin su sakambinabatan nu manga taw a 'bpaguyag-uyag sa matidtu.
34 Pedtatawan bu nu Kadenan a Mapulu su manga mategel edsudi
ugaid'a ipegkalimu nin su manga taw a mababa i muletad'in.
35 Su taw a balaitungan na makapulu
ugaid'a su taw a babal na makagkayaya.