Su manga Papata nu Ama
4
Dua na manga wata, pakikineg'u sa mapia su papata sa lekanu nu ama nuka amaika ipamamantag'u i entu na 'gkaulad su kasabut'u.
2 Su manga panduan ku a nia sa lekanu na masela i katagan nin
tembu itagu nu sa ginawa.
3 Apia saki na minukit aku bun sa pidtalu a kawawatai,
pinadtaya nu dua a lukes enggu tunggal bu a wata.
4 Na nia inipamandu sa laki nu ama ku na “Ipamula nengka kanu pamusungan nengka sa senep sa atay su manga panduan ku sa leka.
Paginuguti ka su manga kasuguan ku sa leka asal'a 'gkalendu i kapaguyag-uyag'engka.
5 Di ka lemipatani atawa ka temangkai su manga kadtalu ku sa leka
ugaid'a makin ka paginapas i katuntut'engka sa ilemu enggu katuntay.
6 Di ka pedtaligkudani su ilemu ka dalindingan ka nin.
Ulami ka, ka tiakapan ka nin.
7 Ka nia ba su manga balapantag sa langun na su ilemu enggu su katuntay.
Na tembu paginapas ka i katuntut'engka lun apia nia nin pan kaaden i maibped pan su langun nu kaaden nengka.
8 Enggi ka sa kabalapantag su ilemu enggu ulami ka
ka enggan ka nin sa kabadtugan.
9 Na mabaluy i entu a sansangan kanu ulu nengka
a menggay sa leka sa kabadtugan.”
Su Kaukit kanu Matidtu a Lalan
10 Dua na manga wata, pakikineg ka enggu paginuguti ka su manga kasuguan ku
ka makapaguyag-uyag ka sa mauget.
11 Inipamandu ku den sa leka su katuntut kanu ilemu
enggu initutulu ku den sa leka su matidtu a lalan
12 ka asal'a dala makabangen
taman sa embantas su uyag-uyag'engka.
13 Itagu nengka sa ginawa su manga panduan ku.
Di ka a benal mitasi;
ulami ka, ka namba i seged'u uyag-uyag'engka.
14 Di ka a benal mukiti su lalan nu manga daluaka a taw;
sibayi ka su entu.
15 Tangkai ka su manga maitu ba a ukit;
di ka silan munuti ka makin nia ka papanalus na su leka a ukit.
16 Kagina su manga taw a daluaka na di makatulug atawa ka di silan makalenek
taman a di silan makanggula sa mawag atawa ka di nilan makapalusak su ped a taw.
17 Ka timbang a nia nilan den pegken na su kadaluakan
enggu nia nilan den 'bpaginemen na su kapamunu.
18 Su ukit'u manga matidtu a taw na mana su kapedsebang'u senang kanu kasisi na mapita-pita
a nia nin kapegkauget na 'bpangilut i katayaw nin.
19 Ugaid'a su ukit menem'u manga daluaka a taw na mana su sangat i kalibuteng'in
a di nilan 'gkailay u ngin i makapagebpa sa kanilan.
20 Dua na manga wata, pakikineg ka sa mapia su manga panduan ku sa leka;
di ka bu mapalambas kanu sabala a tangila nengka.
21 Di ka semuguti a makapitas i entu sa leka
ugaid'a makin nengka itagu sa ginawa.
22 Kagina su apia entain i makatun sa nia ba
na kaenggan sa mapia a kanggulawas enggu 'gkapia su uyag-uyag'in.
23 Nia balapantag sa langun na tiakapi ka sa mapia su pamusungan nengka
kagina san ba pakaganat su talaguy nu uyag-uyag'engka.
24 Da ka pedtalu sa kalebutan atawa ka da ka embitiala sa dala katagan nin.
25 Nia ka enggula na da ka mapadsimpang-simpang
ka makin ka papanalus su manga mapia a ukit'engka.
26 Na pagitung ka sa mapia su langun nu enggulan nengka
ka enggu ka embantas.
27 Da ka a benal edsibay-sibay;
lidasi ka a benal su manga kadaluakan a galebek.