Su Kaabung sa Kagkiuga
5
Dua na manga wata, ipamamantag'engka sa mapia su manga ilemu ku.Su manga panduan ku na di ka bu mapalambas kanu sabala a tangila nengka,
2 ka enggu nengka magkila-kila u ngin i mapia a enggulan nengka.
Na sia kanu kadtalu-talu nengka na mailay i aden sa leka su katuntay.
3 Kagina su kambitiala nu takiuga a babay na mana kamis'u teneb
enggu su kambitiala nin na mapia i sanad'in a mana su kalindeg'a lana,
4 ugaid'a nia nin ulianan na mana mapait a pakaduti
enggu mana kagalang'u sundang a duambala i galangan nin.
5 Lu ka nin agaken kanu dalepa nu namamatay
kagina su 'bpelalakawan nin na ibpawang sa kapatay.
6 Dala kapantag'in sa lekanin su lalan a ibpawang kanu uyag-uyag.
Di nin 'gkapamikil i su 'bpagukitan nin na bigkug.
7 Na kagina ka maitu dua na manga wata, pakikineg aku nengka,
di ka temaligkudani su manga kadtalu ku.
8 Tangkai ka su takiuga a entu a babay;
apia su bungawan nu walay nin na di ka a benal semupegi.
9 Ka amaika di ka maginugut na maagaw nu manga taw a dala lat a nanam'in sa leka su kabadtugan nengka
enggu su manga pinaginapas'engka.
10 Langun nu kakawasan nengka enggu pantiali nengka na ped a taw i kapianan lun.
11 Na sia kanu kabpaya nengka na makadegeng ka sa kapasang
ka nia bun den masama sa leka na lanitan enggu tulan bu.
12 Nia nengka madtalu na “Kanugun nin ka da ku itagu sa ginawa su manga kinadaway sa laki
enggu su kinapatidtu sa laki na inikias ku bu.
13 Pinalambas ku kanu sabala a tangila ku su manga panduan nu namamandu sa laki.
14 Saguna na paidusama aku matagu sa masela a kayayan sia kanu luk'u madakel a taw.”
15 Nia man dait na su kaluma nengka bu i dulug ka,
iling-iling'u kalut na da ka den semageb lu kanu salakaw a kalut.
16 Da ka den 'bpangilay sa ped a babay
ka su kaluma nengka bu i indulug'engka
17 kagina lekanu bu i entu dua a tiwalay,
da kanu mapasalet sa ped a taw.
18 Edsukul-sukuli ka su babay a pinakawingan nengka kanu timpu nu kanguda nengka
a pakaenggay sa leka kanu kangunguday a galebek.
19 Manisan a benal sekanin a mana su ulak a makabimban,
tatap ka masukul sa lekanin enggu kanu lilini nin sa leka.
20 Dua na manga wata, ngintu, dait ba a mabimban ka kanu kaluma nu ped a mama?
Ngintu, alus ba a indulug'engka su takiuga a babay?
21 Ka dala man makapagena kanu Kadenan a Mapulu;
pedsusulimanen nin su langun na guay-guay nu manusia.
22 Nia bun man pakaulipen enggu pakapuket kanu daluaka a taw
na su galebekan nin bun a mawag.
23 Nia bun makapalusak lun na su di nin kakumpen kanu ginawa nin;
nia bun makapatay lun na su kababal'in.