Su manga Papata sa Kaabung kanu Kadaluakan
6
Dua na manga wata, amaika pangakun nengka su nautang'u ped a taw,2 na amaika maitu ba i manggula na nalitagan ka
sabap kanu inibpasad'engka a entu.
3 Amaika maitu, na nia ka enggula na ipangumpaya nengka i ginawa nengka lu sa lekanin
asal'a makapukas ka kanu kinaiket sa leka sa kapasadan sa kanu entu a taw;
pamagayuki ka sa latan ka nin sa nanam.
4 Di ka a benal ipedtatalipenda su kapamagayuk'engka sa lekanin.
5 Ilipuas'engka i ginawa nengka a mana su papanuk
atawa ka saladeng kanu padulat'u talinganup.
6 Sekanu a mangapauk, edsusuliman nu enggu paganadi nu
su ula-ula nu manga puliga ka enggu kanu 'gkaadenan na akal.
7 Apia dala pedsugu kanu manga puliga, dala pendatu kanilan
atawa ka 'bpangulu kanilan
8 na 'bpelimud silan sa 'gkakan sa timpu na kabpanenang
enggu 'bpagadil silan gagalu na timpu na kapedsabpet.
9 Ugaid'a sekanu a mangapauk, na kanu pan guna i kadtatakena nu
enggu kambangun nu?
10 Na u edtulug-tulug kanu bu enggu 'bpapangintelenen kanu bu
atawa ka edsasakupu kanu bu sa lima,
11 na di nu katukawan na makatingguma sa lekanu su mapasang a 'gkatamanan a mana su kauma nu tanegkawn a minggumatalem;
mana kanu bun pinanegkawan a dala nasama lun.
12 Su taw a dala katagan nin enggu daluaka
na di kasaligan i kambitiala nin.
13 Pedsalimbuten nin su pagidsan nin sa ukit'a kapebpesek-pesek'in bu
enggu kapenggulingan nin bu kanu lima enggu ay nin.
14 Su pamusungan nin na nia nin bu dalem na kasalimbut enggu kagkahanda sa dikena mapia.
Tatap sekanin penggalebek sa 'gkadsabapan nu di kapamagayun nu taw.
15 Na sabap sa entu na makatekaw makatingguma sa lekanin su dikena mapia,
na mabina-binasa den sekanin a da den 'bpagumbayan lun.
16 Na aden pitu timan a di a benal kasuatan nu Kadenan a Mapulu ka pakangingilu lun:
17 su entu na su kapulu na muletad, kabudtud,
kapangimatay sa dala kadupangan nin,
18 su kangguniat sa mawag,
su taw a adil a benal sa kanggula sa kadaluakan,
19 su kadsaksi sa dikena bantang
enggu su taw a mapadsudsuga sa edsusuled.
Manga Papata sa Kaabung sa Kagkiuga
20 Dua na manga wata, paginuguti ka su manga ipedsugu nu ama nengka
enggu su manga panduan nu ina nengka.
21 Ipamula nengka i entu kanu pamusungan nengka
enggu itimbang'engka a mana balig a di 'gkapitas sa leka.
22 Nia ba i mabaluy a makaagak sa leka kanu langun nu enggulan nengka,
temiakap sa leka kanu kapedtulug'engka enggu mamapata sa leka kanu kambangun nengka.
23 Kagina su manga kasuguan nilan enggu su manga panduan nilan na mana palitan a pakatayaw sia kanu kabpelalakaw nengka.
Su manga kapendaway nilan sa kapatidtu sa leka na lalan i entu kanu mapia a uyag-uyag.
24 Nia bun ba i demalinding sa leka
kanu takiuga a babay a mamis i kanggudila nin.
25 Da ka a benal mapabimban kanu kanisan nin
enggu su kapembimban nin sa leka.
26 Ka su kadulug kanu sundal a babaya na 'gkabayadan sa mana bu alaga na makan
ugaid'a su kadulug kanu takiuga a babay na umul i sambi nin.
27 Ngintu, su mama a endadalemet sa apuy kanu kasakupuan nin na di matutung?
28 Ngintu, su demampu kanu waga na apuy na di malupang?
29 Na maitu bun ba su mama a dulugen nin su kaluma nu ped'in
na nanget a masiksa sekanin.
30 Na su taw a nanegkaw sabap sa kapegkagutem'in
na katuntayan pan sekanin nu manga taw.b
31 Ugaid'a apia ka maitu na u masigkem sekanin
na dait a papamayaden sekanin sa makapitu takep apia maibped pan su kaaden nin.
32 Na labi den su mama a 'gkiuga na sangat i kababal'in
kagina nia nin bun bininasa na su ginawa nin.
33 Nanget a pakasakitan sekanin
enggu makatalima sa dala taman nin a kayayan.
34 Kagina amaika su kaluma a mama ka mangalikud na mana apuy a pegkaleg sa kalipunget'in;
dala 'bpelasamen nin amaika manuli-suli.
35 Di sekanin magaga na bitiala
enggu di sekanin kabayadan na apia ngin i kadakel'in.