Su manga Pamandu sa Kaabung kanu Takiuga a Babay
7
Dua na manga wata, paginuguti kaenggu itagu nengka sa ginawa su manga panduan ku sa leka.
2 Paginuguti ka su manga kasuguan ku sa leka ka makapaguyag-uyag ka sa mapia.
Tiakapi ka sa mapia su manga panduan ku sa leka a mana bun su kapedtiakap'engka kanu ginawa nengka.
3 Itimbang'engka su entu sa mana sising a di 'gkapitas sa leka
taman sa ipamula nengka kanu pamusungan nengka.
4 Itimbang'engka su ilemu sa mana nengka lusud sa tian a babay
enggu su katuntay na itimbang'engka sa masupeg a benal a pagali nengka.
5 Kagina nia bun ba i makadalinding sa leka
kanu sasat'u takiuga a babay a mamis i kanggudila nin.
Su Takiuga a Babay
6 Na aden isa a gay a 'bpanandeng aku lu kanu paliungan nu walay ku,
7 na aden nasandeng ku a manganguda a mama a dikena pamun matua i kapagitung'in,
na nadsagipa ku i sakataw kanilan na dala a benal akal'in.
8 Lu sekanin 'bpagangay kanu ligid'u embalakan nu lalan
a ipebpawang kanu walay nu isa a babay.
9 Na kanu entu ba a kutika na pedsukilep den ka magan den pegkagabi.
10 Daka inalaw sekanin nu takiuga a babay a mimbalegkas sa mana balegkas'a sundal
ka 'bpagakalan nin su manguda a entu.
11 Mategel i kambitiala nin, dala kaya nin
enggu di sekanin lemenek sa walay.
12 Na tatap sekanin 'gkailay lu kanu manga lalan, lu kanu manga padian
enggu lu kanu ligid'u embalakan nu manga lalan.
13 Na inambit'in enggu sinium'in su manguda a entu taman sa dala sekanin mamamala lun edtalu sa
14 “Nia pan i kapasad ku 'gkurbana
na madakel i nasama a pegken lu kanu walay ku.
15 Tembu linemiu aku ka 'gkapangilay ku a benal seka.
Na mapia pan ka natun ku seka.
16 Su 'bpagigan ku na inampisan ku den sa mapia a ginis
a ganat pan sa dalepa a Egypt.
17 Pigkamutanan ku den i entu sa kamutan a inumbal pan ebpun sa mira, alu enggu sinamun.
18 Na unut ka sa laki ka endulug ta kanu kalalamagan.
19 Dala lu sa walay su kaluma ku
ka aden inangayan nin a mawatan a dalepa.
20 Midtapik sekanin sa madakel a kuleta
enggu kanu manga temundug pan a padian i kauli nin.”
21 Na sabap sa pakabimban i kambitiala nin
enggu mamis i kanggudila nin na nagaga nin mamitiala su manguda.
22 Daka minunut den mambu sa lekanin su manguda a mama a mana sapi a pedtundanen kanu 'bpanumbalian
atawa ka mana saladeng a ipedsedseg kanu padulat
23 ka enggu 'gkasugat'a busug sa pusung.
Mana bun sekanin papanuk a pendudsuk lu kanu litag ugaid'a di nin 'gkatawan i entu ba i pakapatay sa lekanin.
24 Na kagina ka maitu dua na manga wata, na pakikineg'u
enggu paginuguti nu su manga panduan ku sa lekanu.
25 Da kanu a benal mapabimban kanu ukit'u maya ba a babay
enggu da kanu munut kanu ukit'in.
26 Ka madakel den a benal a manga mama i nakapalusak'u nia a babay enggu nabinasa nin.
27 Su walay nin, na entu ba su bungawan
a ipebpawang kanu dalepa nu namamatay.