Su Mapagasil kanu Ilemu
8
Su ilemu enggu su tuntay na mana su 'bpananawag2 a lu pedtindeg kanu manga embalakan nu lalan
lu kanu manga untul'u manga bakulud.
3 Nia nin ibpananawag lu kanu manga lalan
enggu kanu bungawan nu manga padian na
4 “Sekanu a manga taw na pakikineg'u su ipebpayag ku sa lekanu.
5 Sekanu a manga babal a taw enggu paidu i tuntay nin
na tuntut kanu sa kapia na kapagitung enggu katuntay.
6 Pakikineg kanu sa mapia
ka su pedtalun ku na balapantag enggu benal.
7 Langun na pedtalun ku sa lekanu na bantang
kagina saki na 'gkabensian ku su kadtalu sa mawag.
8 Matidtu i kambitiala ku, dala kabudtud'in
enggu dala kasalimbut'in.
9 Malinawag a benal enggu ustu su langun na entu
kanu manga taw a aden ilemu nin enggu kasabut'in.
10 Nia nu pamili na su katuntay enggu su panduan ku
kumin kanu pilak enggu bulawan.
11 Ka su ilemu man na minuna pan i kabalapantag'in kanu balaalaga a watu,
ka dala makalepeng lun kanu langun nu makagkapia pan sa manggiginawa.”
12 Na saki su ilemu, sia sa laki su katuntay,
su kapia na kapagitung enggu kapia na kapamikil.
13 Su magilek kanu Kadenan a Mapulu na kabensian nin su galebekan a mawag.
Tembu 'gkabensian ku su kapulu na muletad, su kamamasela, su kanggula sa mawag enggu su bigkug i kambitiala nin.
14 Sia sa laki su mapia a manga panduan, mangapia a ilemu, katuntay enggu kapegkagaga.
15-16 Sia pakanggulalan sa laki na pakandatu su manga datu enggu pakapangaden silan sa manga mapia a atulan,
na maitu bun su 'gkangaunutan enggu su 'gkangasaligan na pakakamal silan sa matidtu.
17 Na ipegkalimu ku su malimu sa laki
enggu matun aku nu 'bpangilay sa laki sa senep sa atay.
18 Sia sa laki su kakawasan enggu dala kapedtaman nin su entu.
Na sia bun sa laki su kabadtugan enggu su katidtu.
19 Na minuna pan sa pagelin a bulawan enggu pilak i makaenggay ku sa lekanu.
20 Su manga ukit ku na matidtu enggu wagib.
21 Na enggan ku sa kakawasan su apia entain a malimu sa laki
taman sa penun ku sa kakawasan su 'bpanaguan nilan.
22 “Unan pan nu kinapangaden nu Kadenan a Mapulu kanu langun-langun sia sa dunia
na lu aku den sa lekanin.
23 Iganat pan sa punan-punan na pinamili aku den nu Kadenan.
Saki i nauna sa langun unan pan nu kinapangaden nin sa dunia.
24 Na pedtapid aku den kanu Kadenan a Mapulu
kanu timpu a da pan kaludan, da pan manga bualan,
25 da pan manga kapalawan, da pan manga bakulud
26 enggu kanu timpu a da pan mapangaden su kalupan taman kanu namakadalem lun
atawa ka apia ngin a libubuk kanu kalupan.
27 Kanu kinapangaden nu Kadenan a Mapulu kanu kawangan-kawangan
enggu su pageletan nu langit enggu su lupa na lu aku den.
28 Na kanu kinapangaden nin kanu kawang-kawangan
enggu kanu kinabungkas'in kanu manga bualan nu manga lagat,
29 su kinapangaden nin kanu manga dedsan nu lagat
asal'a di 'bpelipil su manga ig enggu su kinapangaden nin kanu manga palaus'u dunia
30 na mana saki su mapulu nu kabpangaden a lu kanu tapid'u Kadenan.
Uman-uman gay na 'gkagalawan aku a benal nu Kadenan
enggu sangat bun mambu a 'gkagalawan ku su Kadenan.
31 Na sangat a nalilinian ku su dunia a pinangaden nu Kadenan
taman den kanu manusia a pinangaden nin.”
32 “Na tembu saguna dua na manga wata, na pakikineg aku nu.
kagina sangat i kapia nin kanu apia entain a unutan nin su manga ukit ku.
33 Pakikineg'u sa mapia su manga panduan ku
enggu itagu nu a benal sa ginawa ka enggu kanu kaadenan na katuntay.
34 Mapia den a benal kanu apia entain a taw a mamamantag sa laki
enggu dili edsimpang-simpang sa kanu kapakikineg'in sa laki.
35 Ka su apia entain a makatun sa laki na mana bun nakabungkal sa mapia a uyag-uyag
taman sa palihalan sekanin nu Kadenan a Mapulu.
36 Ugaid'a su di makatun sa laki na mana nin bun tinipu i ginawa nin
kagina su di malilini sa laki na timbang a nia nin linamig na su kapatay.”