Su Ilemu enggu su Kababalan
9
Su ilemu na mana su napatindeg sa walaya pibpalausan nin sa pitu timan.
2 Na napasumbali sekanin sa manga binatang ka midsela-sela sekanin
enggu napapagadil sa manga mapia i nanam'in a 'bpangenken enggu manga mapia a 'bpanginemen a alak a ig'a ubas.
3 Na entu pan ka sinugu nin su manga panunugun nin a babay sa lemu silan kanu manga kapuluan nu manga dalepa
ka enggu nilan makapasampay su katigan nin a
4 “Sekanu a manga taw a kulang i tuntay nin na pamedsia kanu.
Na maitu bun su sekanu a manga taw a dala sabut'in,
5 na pamedsia kanu ka enggu kanu makakan kanu inipapagadil ku a manga mapia i nanam'in a 'bpangenken
enggu manga mapia i nanam'in a 'bpaginemen a ig'a ubas.
6 Tagak'u den su kadala na katuntay enggu paguyag-uyag kanu sa pagidsan nu aden manga sabut'in
asal'a makapaguyag-uyag kanu sa mapia.”
7 Na edsudian bu nu mangasudi a taw su apia entain a mapatidtu kanilan;
pakasakitan nu daluaka a taw su apia entain i demaway lun.
8 Tembu di nu mapatidtu su mangasudi a taw kagina kabensian kanu nilan bu.
Ugaid'a nia nu patidtu na su manga taw a balaitungan ka ikalimu kanu nin.
9 Na amaika nia nengka pamandun su taw a balaitungan na makin mangiseg su katuntay nin.
Na maitu bun ba, amaika nia nengka pamandun su matidtu a taw na makin mangiseg su kasabut'in.
10 Na su senep sa atay a gilek kanu Kadenan a Mapulu na ludsuan man nu ilemu
enggu su kasabut kanu kaisa-isa nin a Suti a Kadenan na ludsuan nu tidtu a katuntay.
11 Ka sia makanggulalan kanu ilemu
na 'gkalendu su uyag-uyag'engka.
12 Na su ilemu ba a nia i makaenggay sa leka sa balas
ugaid'a amaika edsudian nengka su ilemu na seka bun i makatala sa mapasang.
13 Na su kababalan na mana su tagedteben a taw,
paidu i tuntay nin enggu dala kaya nin.
14 Na lu sekanin 'bpamagagayan kanu bungawan nu walay nin
a lu tampal kanu kapuluan nu siudad.
15 'Bpanawagen nin su 'bpamangukit a 'bpagangay kanu manga galebekan nilan
16 sa nia nin ibpananawag na “Sekanu a manga taw a kulang i katuntay nin na pamedsia kanu!”
Na maitu bun ba, nia nin pedtalun kanu manga taw a dala sabut'in na
17 “Nia man labi i kapia nin a 'bpaginumen na su ig a 'bpanegkawn
enggu su pegken a ibpamagena bu.”
18 Ugaid'a su namelu sa lekanin na di nilan 'gkatawan i mamamatay silan,
ka mana nia nilan pibpawangan na su dalepa nu namamatay.