Su Manga Palibasan nu Datu Sulaiman
10
Nia su manga palibasan nu Sulaiman.Su wata a balaitungan na ikagalaw nu lukes'in,
ugaid'a su wata a babal na ikalidu na ginawa nu lukes'in.
2 Su kakawasan a nakua sa dikena mapia na dala mapia a unga nin,
ugaid'a su kapaguyag-uyag sa matidtu na makalipuas sa kabinasan.
3 Su manga taw a matidtu na dili isugut'u Kadenan a Mapulu a kaguteman,a
ugaid'a su manga taw a dupang na di nin sugutan su pegkahandan nilan.
4 Su kapauk na makamiskin,
ugaid'a su kakamangun na magkagkaaden.
5 Su wata a balaitungan na maginapas sa kalimud'in sa kauyagan kanu timpu nu kapedsabpet,
ugaid'a su wata a semakupu bu sa lima kanu timpu nu kapedsabpet na pakayaya.
6 Su matidtu a manga taw na palihalan,
ugaid'a su dupang a taw na pakapagena nu mamis a kadtalu nin su mawag a niat'in.
7 Su tademan kanu manga matidtu a taw na malegen kalipatanan,
ugaid'a su manga daluaka a taw na malemu kalipatanan.
8 Su taw a aden tuntay nin na maginugut sa manga panduan,
ugaid'a su taw a embitiala sa kababalan na silan bun i pembinasa kanu ginawa nilan.
9 Su taw a maguyag-uyag sa matidtu na dili kagkaidan,
ugaid'a su aden ibpamagena nin na mapayangas bun.
10 Su apia entain i semundul sa kasalimbut na nia nin unga na kasamukan,
ugaid'a su demaway kanu dikena mapia a penggalebeken na makapangaden sa kalilintad.b
11 Su manga kadtalu nu manga matidtu a taw na mana su bualan a pakaenggay sa uyag-uyag,
ugaid'a su dupang a taw na pakapagena nu mamis a kadtalu nin su mawag a kahanda nin.
12 Su kakalimu na 'gkapenas'in su langun nu kalimbanan,
ugaid'a su kabensi na makapasundul sa di kapamagayun.
13 Su taw a aden tuntay nin na nia 'bpeliu kanu ngali nin na ilemu,
ugaid'a su taw a dala akal'in na nanget a masiksa.
14 Su taw a balaitungan na makin nin pan 'bpagumanan su nasabutan nin,
ugaid'a su kambitiala nu taw a babal na nia nin unga na kabinasan.
15 Su kakawasan nu kawasa a taw i pendalinding lun a mana su siudad a pinagalad sa mabagel,
ugaid'a su miskinan a taw na nia bun makabinasa lun na su kamiskin nin.
16 Nia matalima nu taw a matidtu na uyag-uyag a mapia,
ugaid'a su dupang menem a taw na nia nin matalima na kasiksan.
17 Su taw a ipamamantag'in su kapatidtu lun na makatalima sa uyag-uyag a mapia,
ugaid'a su dili mamamantag kanu kapatidtu lun na makalusak.
18 Su ipamagema nin i libuteng'a atay nin kanu ped'in na budtuden
enggu su edtetebuan nin i pagidsan nin na babal.
19 Su taw a aden tuntay nin na maulam sa kadtalu nin,
ugaid'a su taw a tagedteben na malemu gaid makandusa.
20 Su bitiala nu taw a matidtu na mana pilak i kabalapantag'in,
ugaid'a su 'bpagitungen nu manga dupang a taw na dala katagan nin.
21 Su bitiala nu taw a matidtu na masela i guna nin kanu madakel a taw,
ugaid'a su taw a babal na mamamatay sabap kanu kadala na tuntay nin.
22 Su palihala nu Kadenan a Mapulu i papegkawasa kanu taw
enggu di nin silan 'bpagenggan sa lidu na ginawa.c
23 Su taw a aden tuntay nin na nia nilan kalilinian na kapaguyag-uyag sa aden ilemu nin,
ugaid'a su babal a taw na nia nin kalilinian na kadaluakan a galebek.
24 Su 'gkapaginagkay nu matidtu a taw na 'gkakua nin,
ugaid'a su ipegkagilek'u daluaka a taw a manggula nin na entu bun ba i manggula nin.
25 Amaika makatingguma su mana bagyu a bataluan na mamakabayug su daluaka a taw,
ugaid'a su taw a matidtu na di silan magkeleng-keleng taman sa taman.
26 Su taw a mapauk na di kalinian nu penggalebekan nin
ka mana silan madsem a makagigilek sa ngipen enggu mana bel a makagkalipedes sa mata.
27 Su gilek kanu Kadenan a Mapulu na makagkalendu sa umul,
ugaid'a su taw a daluaka na 'gkababa i umul'in.
28 Su 'gkainam'u taw a matidtu na nia nin unga na kagalaw,
ugaid'a su 'gkainam'u taw a daluaka na dala kapegkatuman nin.
29 Su taw a 'bpaguyag-uyag sa matidtu na 'bpangelungan nu Kadenan a Mapulu,
ugaid'a pembinasan nin su penggula sa kadaluakan.
30 Su taw a matidtu na di makaawa kanu pendalepan nin,
ugaid'a su taw a daluaka na nanget a makaawa.
31 Su kambitiala nu taw a matidtu na 'bpagenggay sa ilemu,
ugaid'a su tagakalen i kambitiala nin na pembinasan nu Kadenan.
32 Su taw a matidtu na katawan nin u ngin i makasuat a kadtalu,
ugaid'a su kadtalu nu taw a daluaka na kabudtud bu.